Додека Киев не исклучува никакви хипотези, Иран ги отфрла изјавите на некои земји, особено на Канада, дека Боингот 737 бил погоден од ракета.
„Нашиот тим сега доби пристап до црните кутии и планираме наскоро да започнеме со реконструкција на разговорите снимени на нив“, рече украинскиот министер за надворешни работи Вадим Пристајко на прес-конференција.
Пристајко изјави дека украинските иследници имаат „целосна соработка“ од Техеран и „целосен пристап“ до остатоците на местото на несреќата и комуникацијата на пилотот со иранската контролна кула.
Киев испрати педесет експерти во Иран за да ја испитаат несреќата на авонот на авиокомпанијата „ Украина Интернешнл ерлајнс“ што полета за Киев и се урна во средата, при што загинаа сите 176 патници и членови на екипажот, претежно Иранци и Канаѓани , како и единаесет Украинци.
Несреќата се случи неколку часа откако иранските ракети пукаа кон две американски бази во Ирак, како одговор на атентатот на иранскиот генерал Сулејмани во напад на САД неколку дена претходно.
САД, Канада, Велика Британија и Холандија оценија дека Боингот е соборен од иранска ракета, што Техеран енергично го негира.
„Едно е сигурно, авионот не беше погоден од ракета“, им рече на новинарите претседателот на иранската организација за цивилно воздухопловство Али Абеџеде.
Министерот за надворешни работи на Украина денеска изјави дека „не отфрла никаква претпоставка“. Ако се потврди дека причина за несреќата била ракета, Киев ќе бара казна за виновниците и обештетување, додаде тој.
„Ние прво ќе ги собереме сите информации, а потоа ќе извлечеме свои заклучоци“, додаде тој, истакнувајќи дека тој сака „фер и непристрасна“ истрага.