Свет

Како успеаја само двајца крадци да ја изведат кражбата на векот од музејот во Дрезден?

Германската полиција е во потрага по двајцата непознати крадци , додека медиумите објавија неверојатни детали како тие успеале да ограбат скапоцености вредни над милијарда евра, додека историчарите тврдат дека се ограбени непроценливи богатства.

Непознатите крадци кои провалиле во Зелената ризница во Дрезден, еден од најголемите историски музеи во Европа, со една од најголемите колекции на накит , која е ограбена рано утринава, влегле во зградата преку мал прозорец во приземјето, јави Би-Би-Си. Германските медиуми објавија дека крадците ги свиткале железните шипки на оградата од прозорецот и влегле преку мала дупка што ја направиле.

Постојат шпекулации дека крадците биле во можност да се пробијат во Зелениот трезор откако предизвикале пожар во блиската трафостаница поради што безбедносниот систем престанал да работи. Поточно, противпожарните оддели биле повикани утрово во 5:09 часот за гаснење на пожарот кај споменатата трафостаница. Крадците што влегоа во музејот, наводно, прво ја запалиле трафостаницата.

Според Си-Ен-Ен, полицијата добила повик за провална кражба во 04:59 часот. Директорот на одделот за криминалистички истраги Волкер Ланге изјави дека безбедносните камери ги фатиле двајцата крадци. „Крадците се приближија до витрината со накит, ја скршија и заминаа“, додаде Ланге. Витрината, наводно, била изградена од специјално безбедносно стакло и не се знае како е скршена.

Провалниците се уште се бараат. Полицијата била известена неколку минути по алармот за провална кражба на осомничено возило, наводно, користено во провалната кражба. Си-Ен-Ен пишува дека полицијата досега нема информација дека на крадците им било помогнато од „внатре“, но дека се испитува и оваа можноста.

Провалниците украле три комплети дијамантски накит од Трезорот, секој со по 37 парчиња, кои, според некои медиуми, вредат околу милијарда евра. Сè уште не е познато колку предмети биле украдени од музејот.

Локалниот политичар Роланд Волер изјави дека артефактите од Зелениот трезор се „непроценливи“. „Ова е напад врз културниот идентитет на сите во сојузната држава Саксонија“, додаде Волер. Мерион Акерман, директор на Фондот за државни уметнички колекции во Дрезден, изјави дека многу од украдените експонати датираат од 18 век и тешко се проценуваат затоа што не се за продажба. „Богатствата складирани во Зелениот трезор се толку добро познати што се надевам дека нема да го најдат своето место на црниот пазар “, додаде таа, барајќи од крадците да не ги кршат украдените експонати .

Весникот „Билд“ пишува дека станува збор за „веројатно најголемиот грабеж на уметнички дела од Втората светска војна“.

Само Зелениот трезор се состои од десет простории во кои има околу три илјади парчиња накит и други ремек-дела направени од злато, сребро, скапоцени камења, слонова коска и други вредни експонати. Изложбите што можат да се видат во Трезорот се собирани со векови.

Зградата во која се наоѓа Зелениот трезор беше тешко оштетена за време на Втората светска војна, но оттогаш е обновена. Туристите го посетуваат од 1724 година и тоа е вистинска атракција. Еден од највредните експонати на музејот во Дрезден, 41-каратниот зелен дијамант, во моментов е сместен во Метрополитен музејот на уметност во Њујорк, како дел од изложбата Making Marvels: Science and Slendor at Courts of Europe.

Меѓу највредните експонати е фигурата на Мавар со должина од 63,8 сантиметри, украсена со смарагди и 648 карати тежок сафир, инаку подарок од рускиот цар Петар Први.

Свет

Ужас во Аризона: Татко си ги пронашол двете тригодишни близначки удавени во базен

Полицијата ги објави имињата на близначките кои трагично загинаа откако нивниот татко ги извлекол нивните безживотни тела од базенот во дворот.

Тригодишните девојчиња, Валентина и Пеналапи Руиз, починале во четвртокот во болница во Феникс, Аризона, соопштија официјални лица, пишува Daily Mail..

„Прелиминарните информации сугерираат дека дошло до случајно давење“, соопшти вчера полицијата.

„Во овој момент, нема ништо што откриле иследниците што изгледа сомнително“, рече пожарникарот на Феникс, Роб Мекдејд, за таткото на близнаците кој се јавил на 911.

Мекдејд додаде дека децата биле под вода „неодредено време“ пред да пристигне помошта околу 15:30 часот во четвртокот.

Девојчињата биле итно пренесени во блиската болница каде што биле прогласени за мртви, соопштија официјални лица.

Воздушните снимки од домот покажале базен во облик на бубрег што немал ограда околу него.

Свет

Расте бројот на жртвите во поплавите во Бразил- најмалку 57 загинати, 67 исчезнати (ВИДЕО)

Бројот на загинати од поројниот дожд во јужната бразилска држава Рио Гранде до Сул се искачи на 57, соопштија локалните власти, додека десетици се уште не се пронајдени, пренесува Ројтерс.

Цивилната заштита на Рио Гранде до Сул соопшти дека 67 лица се уште се водат како исчезнати, додека повеќе од 32.000 луѓе се раселени поради невремето, кое зафати речиси две третини од 497-те градови во државата, која граничи со Уругвај и Аргентина.

Поплавите уништија патишта и мостови во повеќе региони во земјата. Невремето предизвика и лизгање на земјиштето и делумно уривање на брана во мала хидроцентрала. Друга брана во градот Бенто Гонкалвес исто така е во опасност од уривање, соопштија властите.

Во Порто Алегре, главниот град на Рио Гранде до Сул, езерото Гуаиба се излеа, поплавувајќи ги улиците. Меѓународниот аеродром во Порто Алегре ги укина сите летови на неодредено време.

Во следните 36 часа се очекуваат врнежи од дожд во северните и североисточните предели на државата, но количината на врнежи се намалува и би требало да биде далеку под врвот забележан претходно оваа недела, соопшти државната метеоролошка служба.

Сепак, „нивото на водата во реките треба да остане високо неколку дена“, изјави денеска гувернерот Едуардо Леите во видеото на неговите социјални мрежи, додавајќи дека е тешко да се каже колку долго.

Рио Гранде до Сул се наоѓа на географската точка меѓу тропската и поларната атмосфера, што создава метеоролошка шема со периоди на интензивен дожд и други со суша.

Локалните научници веруваат дека оваа шема се интензивира поради климатските промени.

Обилните дождови веќе го погодија Рио Гранде до Сул во септември минатата година, кога екстратропски циклон предизвика поплави во кои загинаа повеќе од 50 луѓе. Ова се случи по повеќе од две години постојана суша поради феноменот Ла Ниња, со само слаби дождови.

Шоу биз

Најбогатата актерка на светот има 3 милијарди долари, но ретко кој ја знае (ВИДЕО)

Кога ќе помислите на најбогатите актерки во светот, веројатно ви паѓаат на ум познати имиња како Џулија Робертс, Сандра Булок, Анџелина Џоли или Џенифер Анистон, но големи се шансите никогаш да не сте го чуле името на најбогатата актерка на светот.

Имено, оваа титула ѝ припаѓа на американската актерка Џејми Герц, чие богатство се проценува на 3,2 милијарди долари. Ако се прашувате која е, не сте единствените затоа што изгледа дека луѓето не можат да се сетат на неа.

58-годишната ѕвезда ја започнала својата кариера во 1981 година со улога во „Бескрајна љубов“ и оттогаш се појавила во голем број филмови, вклучувајќи ги „Изгубените момчиња“, „Твистер“, „Крстопат“, „Помалку од нула“, „Квиксилвер“ и „Шеснаесет свеќи“.

Покрај тоа, таа се појави во хит сериите Seinfeld, The Neighbors, Modern Family и This is Us, а неодамна глумеше во филмот „I Want You Back“ од 2022 година, но таа ретко се појавува на екранот.

Сепак, нејзиното богатство не се должи само на нејзината актерска кариера. Актерката е во брак со милијардерот и инвеститор Тони Реслер, со кого е косопственик на НБА тимот Атланта Хокс. Имаат четири деца, а интересно, кога се венчале во 80-тите, Џејми била хранителка бидејќи компанијата на нејзиниот сопруг пропаднала, но тој подоцна се опоравил и заработил милијарди.

Инаку, официјално најбогатата актерка на светот е холивудската ѕвезда Дина Мерил, чие богатство се проценува на 5 милијарди долари. Мерил починала во 2017 година, со што Џејми сега стана најбогатата жива актерка на светот.