Тимоние го прекина молкот по француската блокада на Македонија во Брисел, но не кажа ништо поразлично од позицијата на Макрон. Според него, очекувањата во земјава биле премногу високо подигнати, а на датумот за почеток на преговори, вели дека не требало да се гледа како на награда за Преспанскиот договор. Порача дека одговорноста за не добивањето на датумот, не лежи само во Франција туку кај сите кои на земјава и дале ветувања дека тоа ќе се случи.
Користењето на терминот за Македонија како земја – модел или пример во регионот, според Тимоние е претерано. Истакна дека во земјава се уште има реформи кои треба да се спроведат, меѓу нив во судството, администрацијата, но и иселувањето на младите.
Тимоние порача и дека Франција веќе работи на новата методологија за членство во ЕУ, и додаде дека земјава треба да биде подготвена за самитот на Унијата во Загреб догодина. Појасни дека ставот на Макрон за новата методологија е обид да се воведе ред во безредието на Унијата.
Прашан за најавите дека францускиот претседател Макрон би ја посетил земјава, Тимоние вели дека до сега нема информации за такво нешто. Евентуалната посета на францускиот претседател на земјава во идниот период според него е неизвесна, имајќи предвид дека Македонија влегува во изборен период.