Во очекување на вечерните големи протести , најавувани претходните два дена , специјалците прават барикади и го насочуваат движењето на стотиците илјади Каталонци , кои се слеваат во Барселона.
Демонстрантите од утрово ја затворија границата со Франција, а најмалку уште 25 автопати се блокирани.
На аеродромот „Ел Прат“ во близина на Барселона, 55 летови беа превентивно откажани, од кои 36 од шпанската авиокомпанија Вуелинг. Другите летови во моментот се одвиваат според предвиденото.
Возовите и градското метро работат, но со минимален капацитет.
Илјадници демонстранти влегуваат во Барселона, започнувајќи го Маршот на слободата, долг најмалку 100 километри од пет каталонски градови. Ним им се придружи шестата колона од Кастелдфелс, град близу Барселона.
Студентите почнаа тридневен генерален штрајк и ќе се приклучат на протестите.
Собирите веќе започнаа на неколку места во главниот град на Каталонија.
„Ниту каталонската влада ниту каталонската полиција нема да толерираат насилно однесување“, рече министерот за внатрешни работи на Каталонија, Микел Бух.
Шпанскиот министер за внатрешни работи Фернандо Гранде-Марласка изјави дека туристите можат да ја посетат Барселона без никакви проблеми и страв за безбедноста.
„Ова предизвика голема штета на угледот на Каталонија. Но, Барселона може да се посети без проблеми, бидејќи тие беа испади на помали групи “, рече тој на прес-конференцијата во Мадрид.
Тој рече дека намалувањето на потрошувачката на електрична енергија денеска паднало за 7 проценти , што, како што рече, е показател дека штрајкот нема поголемо влијание. Пристаништата во Барселона и Тарагона се отворени и функционираат, изјави шпанскиот министер.
И додека се подготвуваат за до сега најголемите протести , малдите Каталонци ги искористија широките улици на Барселона без сообраќај за да се забавуваат со скокови во далечина.
Во понеделникот Врховниот суд во Мадрид осуди деветмина каталонски политичари на затворска казна од 9 до 13 години за организирање референдум за независност во 2017 година што беше забранет од уставниот суд и последователното прогласување на Република Каталонија. Тие беа осудени за поттикнување на востанието и трошење народни пари за организирање на забранет референдум.