Во двете контроли кои биле направени во Меѓународниот сојуз утврдено било дека таму воопшто не се водела сметководствена евиденција , а не била приложена ниту веродостојна документација за ваучери за донации дадени на социјално загрозени семејства. Од УЈП информираат дека парите од склучените договори за изградба на комплекси за стари лица кои биле склучени со фирмите ДРИМ БИЛДИНГ и Пелистер преку Македонската авторска агенција воопшто не легнале на сметка на Меѓународниот сојуз , туку им биле уплатени на пензионерката Лилјана Тодоровска, како носител и Јасна Мандиќ како координатор на проектот.. Записниците од извршениот увид вчера во притворот во Шутка му биле доставени и на Боки 13. Но тој одбил да ги прими со образложение дека поднел неотповиклива оставка, но УЈП го товари за дела направени во времето кога бил претседател.
Неправилности биле евидентирани и во работењето на „1ТВ“ но тука нема основ за кривична пријава, информираат од УЈП. Иако во меѓувреме, како што велат, 1ТВ на Боки 13 му го префактурирала мебелот кој бил во телевизијата, а кој тој е задолжен да го плати. Се работи за трпезариска маса, кујна, гарнитури и други работи.
Кривична пријава ќе биде поднесена и за БМЈ медиа груп, која е во сопственост на Јасна Мандиќ и таткото на Боки 13, Миле Јовановски. Тој зел милионска позајмица од ова правно лице која не била вратена. Според УЈП, не се чисти ниту промоциите за концертите на Марија Шерифовиќ и Северина, односно иако биле евидентирани како приходи, за нив не е платен данок.
Од УЈП соопштија дека лице од Македонија не многу познато за јавноста се пријавило да ги преземе 1тв и БМЈ медиа груп и нивните долгови.