Средба на премиерот Заев со швајцарската амбасадорка Техада и претставникот од НДИ, Хејзлет

Силна поддршка за независен, одговорен и ефикасен Парламент, во интерес на граѓаните и државата, била искажана од Техада и Хајзлет.

Премиерот Зоран Заев, имаше заедничка средба со Сибил Зутер Техада, амбасадорка на Швајцарија во Република Северна Македонија и со Роберт Скот Хејзлет, лидер на тимот на Програмата за парламентарна поддршка од НДИ.

Премиерот Заев изрази поддршка на проектот „Програма за парламентарна поддршка“, потпишан помеѓу швајцарската влада и Собранието на Република Северна Македонија, што има за цел зајакнување на капацитетите на Парламентот, а чијшто донатор е швајцарската Влада и се имплементира со поддршка од НДИ.

„Силно го поддржуваме овој проект и сите активности коишто се во насока на обезбедување што е можно поголема независност на Парламентот, што подразбира подготовка на закони коишто произлегуваат од самите пратеници, одговорно работење на пратениците, помирување помеѓу пратениците, нивно што е можно поголемо доближување до граѓаните кои им ја даваат довербата. Во овој драгоцен, редок и специфичен период за Република Северна Македонија, од голема важност е улогата на Парламентот и неговите капацитети за независно, одговорно, ефикасно и професионално работење во интерес на граѓаните и на државата“, рече премиерот Заев.

Претседателот на Владата, Заев, се заблагодари на Владата на Швајцарија и на швајцарската амбасада, како и на НДИ за поддршката на нашата држава во процесите на демократизација.

На средбата беше претставен десетгодишниот проект финансиран од Швајцарија, со којшто ќе се зајакнуваат организациските структури, надзорната и законодавната функција и транспарентноста на Собранието на Република Северна Македонија, а е разговарано и на кој начин премиерот Заев и Владата можат да придонесат во клучната цел, обезбедувањето независност во работата на Парламентот и на пратениците, се наведува во владиното соопштение.

Цакај: Предвремени избори во Македонија не се заради неуспехот со преговорите

Албанскиот министер за Европа и надворешни работи Гент Цакај оцени дека „предвремените избори во Македонија не се поради неуспехот да се отворат преговори со ЕУ".

Тој нагласи дека „во соседната земја" од поодамна се дискутирало за предвремени парламентарни избори, додавајќи дека предлогот на премиерот Зоран Заев „не е поврзано со одлуката на Советот на Европа".

– Дискусијата за предвремени избори во Македонија е од многу порано. Вие не можете да ги поврзете процесите. Предлогот за предвремени избори не е последица на одлуката на Советот, изјави Цакај на прес-конференцијата во Министерството за надворешни работи, одговарајќи на новинарско прашање околу можноста за предвремени избори и во Албанија.

Цакај, исто така, изјави дека „во Македонија имало ветувања дека овој процес (отворање на преговори) неизбежно ќе се случи", додека албанската Влада „не го гарантирала тоа".

Инаку, обраќањето на премиерот Заев се најде во ударните термини на сите албански медиуми, со посебен акцент на предлогот за предвремени избори и решителноста да се продолжи со реформите. /МИА

Традиционален саем на медот во Кочани со бесплатна едукација за потрошувачите

Во Кочани по 22. пат се одржува дводневниот Саем на медот, чиј организатор е локалното пчеларско здружение „Матица".

На манифестацијата, која е најголема од ваков вид во источниот регион, штандови имаат 25 пчелари и пчелни стопанства од Битола, Куманово, Тетово, Пробиштип, Свети Николе, Виница и од Кочани.

Покрај мед и пчелни производи, на посетителите на саемот им се нудат и пчеларски алати и опрема.

– Годинава беше релативно поповолна за пчеларството во споредба со претходните и произведовме квалитетен шумски мед. Во зависност од подрачјето во регионот во кој се наоѓаат пчелните семејства, количините се во рамки на просекот, односно околу 12 килограми од кошница. Присутни се и пчелари од беровскиот крај кои добија многу повисоки приноси од просечните. Иако немаме меѓусебен договор, сепак цената што ја бараат нашите пчелари се движи меѓу 350 и 400 денари за килограм, што е во рамки на рентабилноста, истакна претседателот на здружението „Матица", Благој Митев.

Новина на саемот годинава е обезбедената бесплатна едукација со печатен материјал и средби со потрошувачите на кои им се укажува за корисноста од употреба на медот, како да препознаат природен мед и за начинот на користење на другите пчелни производи.

Покровител на манифестацијата е општина Кочани, а градоначалникот Николчо Илијев истакна дека при крај е постапката за прогласување на Осоговскиот регион за заштитено подрачје што се реализира во соработка со Македонското еколошко друштво и Програмата за зачувување на природата во Македонија./МИА

Унијата на жени на ВМРО-ДПМНЕ примена во членство во Организацијата на жени на Европската народна партија

Унијата на жени на ВМРО-ДПМНЕ е примена за членка на  Организацијата на жени на Европската народна партија (EPP Women) на Конгресот кој се одржува во Виена 18-19 октомври 2019.

На состанокот во седиштето на Австриската народна партија присуствуваат претседателката на Унија на жени, Благица Ласовска и секретарот за меѓународна соработка на Унијата, д-р Христина Рунчева Тасев.

Со овој прием, се заокружува вклученоста на сите структури на партијата во Европската народна партија, која е најбројната партија во Европскиот парламент и се потврдуваат европските аспирации на ВМРО-ДПМНЕ и придонесот на жените во креирањето на политики на европско ниво.

На Конгресот на женската секција на Европската народна партија е усвоена резолуцијата “Женски визии за подобра Европа” која се однесува на приоритетите за делување на Европската комисија во периодот 2020-2024 година.

Центар за комуникации на ВМРО-ДПМНE 

притисни ентер