До петок реконструкцијата на Владата ќе биде испратена до Собранието - Канал 5

Македонија

До петок реконструкцијата на Владата ќе биде испратена до Собранието

Идната недела пратениците ќе гласаат за новиот владин состав, потврди премиерот Заев и најави дека најдоцна до задутре ќе го испрати списокот на владиниот кабинет до Собрание .

До петок реконструкцијата на Владата ќе биде испратена до Собранието

За спикерот Џафери да може да ја закаже седницата на која треба новите министри да го поминат собранискиот филтер пред да стапат на функциите. Мандатарот има план, но не открива кои ќе станат нови министри, а кои ќе заминат од ресорите.

- Планирам до петок да ги доставам предлозите за реконструкција на Владата зошто Парламентот на почетокот на идната недела планира седница. Ако тоа се случи во понеделник или вторник следната недела веднаш по изгласувањето на реконструкцијата продолжуваме со промената на директорските места и да ги завршиме кадровските промени, вели Зоран Заев – претседател на Влада.

Од ДУИ велат дека за министрите веќе имаат договор со СДСМ, за директори пак се уште се преговара. За нивното назначување ќе се дебатира во Влада заедно со новите министри.

-Моментално зборуваме за размена, но и за нови именувања. Дебатата со СДСМ е завршена во врска со реконструкцијата. Четврток или петок предлозите ќе бидат во Собрание, а во понеделник ќе имаме нова Влада,истакна Бујар Османи – ДУИ.

Неофицијалните информации се дека Горан Милевски од Собрание се сели во министерството за локална самоуправа на местото на Сухејл Фазлиу, Садула Дураку во новото министерство за политички систем, а на негово место во ресорот животна средина ќе биде назначен Насер Нуредини.

И на вицепремиерското место на Хазби Лика најверојатно ќе има нов министер. Ќе се пополнат и празните места во земјоделство и култура.

Според најавите, реконструкцијата ќе значи промени во осум ресори, од кои шест се веќе познати а останатите две неофицијално ќе бидат од економскиот сектор.

YouTube video

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Турција му се нафрли на Нетанјаху- бара за него црвена потерница од Интерпол

Турција денеска објави дека ќе побара од Интерпол да издаде црвена потерница за израелскиот премиер Бенјамин Нетанјаху.

Турција му се нафрли на Нетанјаху- бара за него црвена потерница од Интерпол

Овој потег е дел од домашен кривичен случај поради напади врз активисти кои се обидоа да достават хуманитарна помош во Газа, објави Ројтерс.

Турција, членка на НАТО, остро ги критикуваше нападите на Израел врз Газа и претходно издаде домашни потерници за Нетанјаху поради војната во енклавата. Анкара постојано повикуваше на меѓународна акција против Израел за она што го нарекува кршење на човековите права и меѓународното право, обвинение што Израел го отфрла.

Новиот правен чекор беше поттикнат од инцидентот во мај кога израелските сили отворија оган врз најмалку два брода од флотилата „Глобал Сумуд“ во меѓународни води. Тоа беше уште еден обид за доставување хуманитарна помош во Газа откако Израел претходно блокираше слични мисии.

Турскиот министер за правда Акин Гурлек потврди на социјалната мрежа X дека се издадени потерници за Нетанјаху и уште еден осомничен. Како дел од постапката против вкупно 35 лица за пресретнување бродови во меѓународни води, тие се обвинети за геноцид, злосторства против човештвото и тортура.

„Врз основа на издадените налози за апсење против Бенјамин Нетанјаху, нашето Министерство за правда побара од Министерството за внатрешни работи да издаде црвени потерници на Интерпол за нив, за да можат да се бараат на меѓународно ниво“, рече Гурлек. Тој исто така рече дека Турција ќе ги искористи сите законски механизми за да го повика Израел на одговорност за неговите злосторства во Газа.

Црвената потерница е барање до полициските сили ширум светот да лоцираат и привремено да притворат лице во исчекување на екстрадиција. Интерпол го разгледува секое барање од земја-членка пред да одлучи да издаде потерница.

Израелски одговор

Кога беше прашан за изјавата на Гурлек, кабинетот на Нетанјаху рече: „Патетичниот обид на турскиот претседател Таип Ердоган да ги заплаши лидерите и војниците на Израел, единствената вистинска демократија на Блискиот Исток, нема да успее“.

И Сирија се заострува

Односите меѓу Турција и Израел се затегнаа и оваа недела поради Сирија. Израел изврши воздушни напади врз воздухопловна база каде што, според израелските тврдења, би можеле да бидат распоредени турски сили. Тој напад беше осуден од Анкара и критикуван од САД. Сирија објави дека не планира да стационира турски војници во таа база.

Израел е вознемирен од турското влијание во Сирија, каде што Анкара е сојузник на претседателот Ахмед ал-Шара, кој го собори долгогодишниот лидер Башар ал-Асад во 2024 година. Од друга страна, Анкара тврди дека реториката и потезите на Израел во Сирија се мотивирани од претстојните парламентарни избори во Израел, закажани за октомври.

Тагови: Бенјамин Нетанјаху турција

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Формула

Формула 1 со досега невиден резултат- четири возачи во 0,0099 секунди

Возачот на Мерцедес, Џорџ Расел, ја освои пол-позицијата за спринт трката за Големата награда на Холандија во шампионатот на Формула 1. 

Формула 1 со досега невиден резултат- четири возачи во 0,0099 секунди

Расел стигна до пол-позицијата на патеката Зандворт со време од 1:11,567 минути.

Она што ја направи квалификациската сесија особено интересна беше фактот дека четворица возачи беа „оддалечени“ за помалку од стотинка од секундата.

Возачот на Мекларен, Ландо Норис, беше втор, 0,041 секунди зад Расел. Возачот на Ферари, Чарлс Леклер, го освои третото место, 0,055 секунди зад победникот во квалификациите. Оскар Пјастре од Мекларен беше четврти во квалификациите, 0,0099 секунди зад Расел.

Кими Антонели (Мерцедес), Макс Верстапен (Ред Бул), Луис Хамилтон (Ферари), Пјер Гасли (Алипина), Габриел Бортолето (Ауди) и Арвид Линдблад (Рејсинг Булс) исто така завршија меѓу првите 10.

Спринт трката за Големата награда на Холандија ќе се одржи во сабота во 12:00 часот, додека главната трка е во недела во 15:00 часот. Антонели е водечки во генералниот пласман со 219 бода, Хамилтон е втор со 169, а Расел е трет со 160 бода. Мерцедес е прв во конкуренцијата на тимови со 379 бода, Ферари е втор со 307, а Мекларен е трет со 220.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Најмалку шест цивили загинаа во руски напад со дронови врз трговски центар во Украина (ВИДЕО)

Најмалку шест лица загинаа, а околу 90 се повредени во напад со руски дрон врз трговски центар во централниот украински град Кривји Рог.

Најмалку шест цивили загинаа во руски напад со дронови врз трговски центар во Украина (ВИДЕО)

Локалните власти потврдија дека меѓу ранетите во нападот врз родниот град на претседателот Володимир Зеленски има шест деца, објави Ројтерс.

Регионалниот гувернер Олександр Ханжа објави на апликацијата Телеграм дека 21 лице е во сериозна состојба, вклучувајќи и едно дете. Тој објави фотографија од густ црн чад што се издига од погодената зграда.

Целен напад врз спасувачките екипи

Претседателот Зеленски го опиша нападот како „целосно циничен и мизерен“. Тој рече дека втор руски дрон ја погодил истата локација половина час по првиот напад, со намера да ги таргетира службите за итни случаи што пристигнале на местото на настанот.

„Ваквите напади не се ништо повеќе од терористички акти“, рече Зеленски на Телеграм, повикувајќи ја меѓународната заедница да ја смета Русија за одговорна.

Засилени воздушни напади

Нападот доаѓа во време кога Русија ги засилува воздушните напади врз Украина, а војната се приближува кон својата петта година. Во четврток, 17 лица беа убиени во руски напад со балистички ракети врз главниот град Киев. Украина, исто така, ги засили своите напади врз Русија, таргетирајќи ги нафтените постројки и логистичката инфраструктура во обид да ја ослабне способноста на Москва да води војна.

Тагови: дрон руски напад

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер