Од Кабинетот на претседателот Иванов потврдуваат дека во петокот, во попладневните часови пристигнало уште едно од повеќето барања за помилување на дел од неправосилно осудените за упадот во Собранието од 27ми април поднеле молби за амнестија.. Кој го поднел и колку барања вкупно се пристигнати, во штуриот одговор од Кабинетот, одговор нема..
Информацијата се прошири викендов откако новинарот Зоран Божиновски на социјалните мрежи најпрво сподели сознанија, а потоа и образец за кој тврди дека го користеле блиските на Чавков, Митко Пешов, Душко Лазарв и уште 12 други обвинети, но според содржината на петицијата наводно во неа не е опфатен Александар Василевски - Нинџа.
Во дел од образложението стои дека во Македонија владее политички прогон, омаловажување и тотална дискриминација на осудените за случајот од 27ми април.
- Нашите најдраги се киднапирани од власта и незаконски се држат во притвор, врз основа на лажни службени белешки или пак врз основа на голо необразложено барање за притвор. Ви се обраќаме со петиција да го искористите својот авторитет и интегритет и веднаш согласно Вашите уставни и законски ингеренции да ставите крај на ваквото беззаконие и крајно шиканирачко однесување од страна на злосторничкото здружување на поединци.
Од претседателскиот Кабинет не откриваат какви се намерите на Претседателот и како ќе постапи со молбите.. Инаку, според законот за помилување во оваа фаза од постапката за 27ми април претседателот самостојно нема можност да ги помилува осудените. Блиските и роднините може да поднесат молби само откако пресудите ќе станат правосилни, а дотогаш можно е помилување само по предлог на Министерството за права. Од таму велат дека досега до министерството не е пристигната иницијатива за помилување.
Премиерот Заев неодамна кажа дека заврши времето за амнестии, а и да сака претседателот Иванов нема можност за тоа.
Последната аболиција Иванов ја направи во 2016та, кога објави одлуки за прекин на гонењето на сите случаи покренати од СЈО, но по жестоките реакции во јавноста истите ги повлече. Мандатот на Иванов завршува на 12 мај.