Кој е јазикот на кој зборуваат Македонците во Грција?

Зборуваме македонски јазик и со различни македонски дијалекти, зашто македонскиот во Грција никогаш не беше кодифициран, вели лидерот на партијата на Македонците во Грција, Павле Васкопулос за Канал 5.

Зборуваме македонски јазик и со различни македонски дијалекти, зашто македонскиот во Грција никогаш не беше кодифициран, вели лидерот на партијата на Македонците во Грција, Павле Васкопулос за Канал 5, по изјавата на министерот Димитров, која во дел од јавноста беше протолкувана дека јазикот во земјава не е ист со оној на македонското малцинство во Северна Грција.

Васкопулос смета дека изјавата на Димитров, кој во меѓувреме, ја дообјасни својата изјава, сепак била дадена со внимателно одбран вокабулар, согласно Преспанскиот Договор, во делот дека земјава не смее да се меша во внатрешните работи на соседот.

-Кога Димитров зборува со грчки колеги тој мора да размислува како мисли еден просечен Грк, вели Воскопулос.

За новинарот Бранко Геровски, пак, изјавата на Димитров била непотребна, со која и самиот министер за нашол во дипломатски офсајд. Тој смета дека колку и да првичната изјава била ненамерна или несмасна, тој морал да внимава на термините во етнокултурна смисла како во случајот со Грчки Македонец. Геровски вели дека таква формулација не треба да има, исто како што не може да има ниту бугарски, ниту албански Македонец за да не се доведеме во ситуација да се самонегираме.  

-Мора да се внимава особено во овој период. Преспанскиот договор од нас не бара ниту да се негираме, ниту да се идентификуваме. Македонскиот јазик не смее да биде табу, вели Бранко Геровски, новинар 

Димитров пред два дена објасни дека македонскиот јазик за кој зборувал со грчката колешка Анагностопулу не го поистоветил со оној на македонското малцинство во Грција, туку со оној етничките Грци. 

Тој објасни дека согласно членот 7 суштината на Договорот е прифаќање на различното разбирање на термините Македонија и македонски, кои за нас значат едно, а за Грција друго. Вчера и владиниот портпарол Бошњаковски избегна да го спомене македонскиот јазик. Прашан каков јазик зборуваат Македонците во Егејска Македонија, тој рече дека дека тие зборуваат јазик поинаков од грчкиот, но оти Владата не е таа што треба да детерминира кој каков јазик зборува.

Филипче и Храповиќ потпишаа Меморандум за разбирање, се зајакнува соработката со Црна Гора во областа на здравството

Министерот за здравство Венко Филипче денеска во Подгорица во рамки на официјалната посета и заедничка седница на Владата на Република Северна Македонија и Владата на Црна Гора, се сретна со црногорскиот министер за здравство, Ќенан Храповиќ.

На средбата, соопшти Министерството за здравство, станало збор за продлабочување на соработката меѓу двете министерства во повеќе области, како што се имунизација и воведување на нови вакцини, развој на програми за скрининг и рано откривање на малигни заболувања, развивање на патронажни сервиси и здравствена заштита во рурални подрачја, регионализација на давање здравствени услуги, надминување на предизвиците со кои се соочуваат двете земји како што е одлив на медицински кадар и можности за размена на искуства, знаења и експертиза меѓу двете земји.

На заедничката владина седница министерот Филипче се заблагодарил за досегашната одлична соработка и најавил соработка со Министерство за здравство на Црна Гора во повеќе области, почнувајќи од делот на медицински туризам, односно користење на ресурсите и капацитетите на детската кардиохирургија за пациенти од Црна Гора кои имаат потреба од тоа и користење на центарот за рехабилитација во Игало за македонските државјани.

Со ова, на пациентите ќе им се понуди можност и пристап за користење на најдобрата експертиза и добивање поквалитетна здравствена услуга во овие области.

Министерот Храповиќ ја поздравил претстојната соработка и нагласил дека преку активностите кои ќе се одвиваат меѓу двете земји, како што е размената на кадри, воведување на телемедицина меѓу клиничките центри во Скопје и Подгорица, развојот на медицинскиот туризам и споделувања на искуства, најголем бенефит ќе почуствуваат граѓаните на двете земји.

На крајот од заедничката седница меѓу Владите, министрите Филипче и Храповиќ потпишале Меморандум за разбирање во областа на здравството и медицинските науки при што се согласиле да ја развијат и зајакнат соработката во областа на здравството во следните приоритетни области: реформи во системот на здравствена заштита и во системот на здравствено осигурување, законодавство во областа на здравството, промоција на здравје и превенција на хронични незаразни болести, развој на интегрирани служби за итна медицинска помош, едукација на медицински персонал за размена на практични искуства и знаења, електронски услуги во здравството, директна соработка меѓу медицинските факултети и здравствените установи, како и соработка во други области од заеднички интерес.

Најмалку 19 ученици загинаа додека скокаа од запалена зграда на интернат (Вознемирувачко видео)

Најмалку 19 ученици на возраст од 14 до 17 години загинаа при обид да се спасат од големиот оган во интернатот во индискиот град Сурат, во државата Гуџарат.

Најмалку 19 ученици загинаа додека се обидуваа да скокнат и да се спасат од петкатнииот објект во пламен , додека десетици се повредени. Од полицијата наведуваат дека црниот биланс би можел да се зголеми.

Од владата на Индија најавија финансиска помош за семејствата на настраданите момчиња. Премиерот Нарендра Моди нареди итна истрага за страшната несреќа и вети помош од владата.

Пожарот го гаснат 19 возила , како и локалното население.

Новиот граничен премин со Косово ќе се отвори во август

Новиот граничен премин меѓу Косово и Северна Македонија „Белановце-Станчиќ" ќе биде пуштен во употреба во август годинава, објави денеска порталот „Газета експрес".

Како што јави дописникот на МИА од Приштина, информацијата за порталот ја потврдил официјален извор од косовското Министерство за внатрешни работи, наведувајќи дека досегашните одлагања за отворање на преминот биле поради тоа што Северна Македонија првпат отвора заедничка гранична точка.

– Ова е првпат во Република Северна Македонија да се отвора заедничка гранична точка, затоа што во тој правец македонската страна имаше недостиг на легислатива за реализација на проектот и беше потребно доста време за донесување на законската инфраструктура, поради што доцнеше имплементацијата, вели изворот на „Газета експрес".

Иницијативата за отворање на граничниот премин потекнува од 2011 година, а неговата изградба, со финансиска помош од Европската Унија (ЕУ), почна во јуни минатата година, кога беше поставен камен-темелникот од страна на вицепремиерите на двете земји, Бујар Османи и Енвер Хоџај и амбасадорот на ЕУ во Скопје, Самуел Жбогар.

Приштинскиот портал наведува дека жителите на кумановскиот регион во Северна Македонија и гњиланскиот во Косово постојано се жалеле поради не реализацијата на проектот, затоа што биле принудувани да патуваат и по сто километри за, преку граничниот премин Блаце, да стасаат до местата на другата страна на границата, кои се инаку многу блиску едно до друго.

Отворањето на оваа гранична точка, пишува „Газета експрес", има стратешко значење поради географската позиција која ги поврзува трите држави, Косово, Северна Македонија и Србија, од аспект на развојот на економијата и трговија, движењето на луѓе и стоки и друго. 

притисни ентер