Иако синиот бран, како што го навестија соперничките демократи не се случи, сепак тие успеаја да ја вратат контролата врз еден од двата дома на Конгресот. Тие ја минаа неопходната бариера од 218 места во Претставничкиот дом, прв пат по осум години и со тоа најавија беспоштедна битка против политиката на Трамп, која во изминативе две години, беше речиси недопирлива. Тоа индиректно го најави првата демократка во Конгресот, Ненси Пелоси, која се очекува да го преземе водењето на Претставничкиот дом и да стане најмоќната политичарка во земјата.
-Утре е нов ден за Америка. Денеска е многу повеќе од демократи и републиканци, од денеска се враќа уставната рамнотежа на администрацијата на Трамп, изјави Ненси Пелоси, лидер на демократите во Претставничкиот дом.
Републиканците успеаја да го задржат Горниот дом на Конгресот, односно Сенатот, што на Трамп и натаму му даваат можност да носи извршни одлуки и да назначува судии. За се друго, тој ќе мора да бара амин од демократите, што го отвора прашањето – колку по неговата изолациска политика, тие ќе бидат расположени за компромис.
-Тие ќе имаат контрола на федералниот буџет, ќе можат да ги блокираат законодавните планови на Трамп, како финансирањето на ѕидот со Мексико. Тие ќе можат да покренуваат истраги за даночните пријави на Трамп и за потенцијален судри на интереси. На светска сцена, ќе се спротивстават на цврстите економски политики и светските предизвици, како Саудиска Арабија и Северна Кореја, изјави Аласдаир Сенфорд, аналитичар.
Но, Трамп не го допира новата реалност. Тој на Твитер прогласи голема победа, а себе си се издигна на највисокото место на заслуги.
-Само 5 пати во последниве 105 години актуелниот претседател освоил места во Сенатот на овие избори. Господинот Трамп има некоја магија во себе. Републиканците се неверојатно среќни што го имаат и јас сум зачуден колку добро поминаа тие, напиша Трамп на Твитер.
Конгресните избори, без апсолутен победник, кои судејќи според се, нема да донесат тектонски промени, сепак донесоа триумф на различноста. Во Конгресот овој пат влегуваат рекорден број жени, најмалку 93. Меѓу нив, две муслиманки, две домородни Американки и неколку Латиноамериканки. Колорадо избра гувернер кој отворено се изјасни дека е хомосексуалец.