Ладен туш за грчкиот националист Панос Каменос.Шефот на грчката дипломатија, Никос Коѕијас, на прес-конференцијата по средбата со неговиот германски колега Мас во Атина, упати порака дека и без гласовите на партијата Независни Грци, имаат мнозинство во парламентот кое ќе го ратификува Договорот од Преспа..

Коѕијас смета на шестте пратеници од партијата Река на Теодоракис, како и уште неколкумина од останатите.. Кои не прецираше, но по последните поделби во пратеничката група на Каменос, не е исклучено дури и некој од неговите пратеници да даде поддршка, а во аналзиите се споменуваат и пратеници на ПАСОК и некои од независните.. Сириза има 145, а за мнозинство им се потребни 151 пратеник..

Грчкиот шеф на дипломатија сепак смета дека е рано за калкулации.. Прво посака да помине успешно референдумот и да ја има неопходната излезност, а потоа, како што рече, од страна на идната Северна Македонија да се направат и уставните промени, кои главно се поврзани со иредентизмот..

- Кога ќе заврши сето ова, што требаше да заврши во декември, но како што гледам ќе заврши кон средината или крајот на јануари, тогаш ќе дојде ратификацијата на договорот во грчкиот парламент. Исто така, во грчкиот парламент ќе дојде за ратификација одлуката на НАТО за интеграција на оваа земја во НАТО. Што значи дека ќе имаме две гласања во грчкиот парламент, а по кој ред ќе дојдат ќе одлучи претседателот на парламентот. Мнозинство за ратификација на овој договор постои и е јавно изразена од партијата СИРИЗА, од партијата Река и од многу одредени пратеници- објасни шефот на грчката дипломатија.

Коѕијас додаде дека „еден голем проблем е и името на црквата, но тоа, како што рече, сега не е тема”. Според него, договорот гледа кон иднината и на Балканот му дава стабилност и безбедност... „По 10-20 години никој нема да ги памти денешните кавги, а сите ќе сметаат дека се подразбира дека постои земја под името Северна Македонија, во која живеат луѓе кои се самоопределуваат, според нивните демократски права и говорат македонски јазик, рече Коѕијас.

Германскиот министер за надворешни, Мас, пак, ја повтори порака што ја упати завчера во Скопје - договорот го оцени како историски и изрази надеж дека тој ќе се спроведе, бидејќи придонесува за пријателството на двата народа и уште поважно, за стабилност во поширокиот регион.