Македонија

Хан: Јас сакам да ви се обраќам со Северна Македонија

На Јоханес Хан повеќе му се допаѓа земјава да ја нарекува Северна Македонија отколку ФИРОМ. Ова го кажа по средбата со премиерот Заев.

Еврокомесарот за проширување Јоханес Хан денеска од Скопје уште еднаш ги повика граѓаните на Македонија да ја искористат отворената врата на ЕУ и НАТО и на референдумот на 30 септември, да го искористат своето право да ја определат својата иднина. Не ми се допаѓа кратенката ПЈРМ но вие ќе одлучите дали ќе ви се обраќам како Северна Македонија, рече Хан.

Каква одлука и да донесете ЕУ ќе биде на ваша страна, порача еврокомесарот за проширување Јоханес Хан по средбата со премиерот Зоран Заев. Но посочи дека референдумот на 30ти септември е уникатна можност за земјава, а граѓаните треба да ја искористат и да се изјаснат. Кратенката ПЈРМ не ми се допаѓа, но вие ќе одлучите дали ќе ви се обраќам како Северна Македонија, рече Хан.

На 30ти септември граѓаните ќе имаат уникатна можност да ја определат својата иднина. Ова е можност која се јавува еднаш во животот да се направи избор кој ќе има влијание не само на оваа генерација на луѓе туку и на следните генерации, нивните деца и внуци и на тие кои се уште не се родени. Ова е многу уникатна можност за граѓаните на земјава да донесат толку важна одлука.

Премиерот Заев уште еднаш го повтори ставот дека за граѓаните нема друга алтернатива освен интеграција во ЕУ и НАТО. Очекува тоа да се потврди и на референдумот.

Хан е во дводневна посета на земјава. Вчера имаше средба и со лидерот на опозициската ВМРО ДПМНЕ Христијан Мицкоски. Рече дека побарал од него партијата да се воздржи од употреба на референдумското изјаснување за партиски цели.

Мислам дека политичките партии треба да се воздржат од одрекување на ова за партиски потреби и цели. Мислам дека секој треба да одлучи преку своите интереси и гледишта и во ваков значаен момент не е време да се играат политички игри.

Еврокомесарот рече дека времето е се пократко, посочувајќи дека следната недела во Брисел почнува скринингот. Појасни дека се работи за сериозен и сложен процес, кој не се однесува само на правни одредби, туку како што рече, тоа го опфаќа и секојдневниот живот на граѓаните како квалитетот на воздухот, прехранбените производи, образованието, здравството, и сите сектори кои имаат влијание врз секојдневиот живот.

Македонија

ВМРО-ДПМНЕ:ДУИ се обидува да поткупи гласачи дури и во верски објекти, секако одат во опозиција

ДУИ се обидува да поткупува гласачи дури и во верски објекти, залудни сценарија, секако ќе одат во опозиција.

Функционери на ДУИ се забележани дури и во места како Виница, Кочани, Берово, Делчево каде во верски објекти со полицајци се обидуваат да поткупуваат гласачи.

Со ова се обидуваат да освојат голем резултат, мислејќи дека така ВМРО-ДПМНЕ ќе мора да седне со нив, но се лажат.

ДУИ оди во опозиција и со тоа треба да се помират.

Залудно е и полнењето кутии. Примерите кои се нотирани во Липково, не им помогнаа во првиот круг, нема ниту сега во вториот.

Времето кога го купуваа гласот на народот завршува. Време е Македонија да ја вратиме на народот. Македонија повторно твоја!, се наведува во партиското сопштение.

Свет

Хамас тврди дека негова делегацијата оди во Каиро за да разговара за примирје во Газа

Делегација на исламската милитантна група Хамас денеска ќе замине за Каиро за да ги продолжи разговорите за можен договор за прекин на борбите во Газа, соопшти групата доцна синоќа, пренесе ДПА.

- Додека го нагласуваме позитивниот дух со кој раководството на движењето одговори кога го проучуваше предлогот за прекин на огнот што го доби неодамна, одиме во Каиро во истиот дух за да постигнеме договор, се вели во соопштението на Хамас.

Се додава дека Хамас и „палестинските сили на отпорот се решени да го созреат договорот, на начин што ќе ги исполни барањата на нашиот народ за целосен прекин на агресијата, повлекување на окупациските сили, враќање на раселените, олеснување за нашите луѓе, почеток на реконструкција и комплетирање на сериозен договор за размена“.

Според извор од Хамас, има уште некои точки кои треба да се разговараат и имало потреба од повеќе појаснувања. Откако тие ќе се разјаснат, движењето ќе го објави својот конечен став.

- Но, можам да ви кажам и според изјавата што штотуку ја испрати движењето, одговорот ќе биде позитивен, изјавил изворот од Хамас за ДПА.

Месечното посредување на Египет, Катар и САД меѓу Израел и Хамас допрва треба да резултира со пробив. Во последните денови се интензивира и дипломатскиот притисок за постигнување договор.

Свет

СЗО: Копнен напад врз Рафа ќе доведе до крвопролевање

Израелски копнен напад врз градот Рафа на крајниот југ на Појасот Газа, каде што хуманитарните групи проценуваат дека се засолниле 1,2 милиони Палестинци, може да заврши со „крвопролевање“, предупреди Светската здравствена организација (СЗО).

Генералниот директор на СЗО, Тедрос Аданом Гебрејесус, на X напиша дека напад врз Рафа може да има „страшни последици“.

- СЗО е длабоко загрижена дека целосната воена операција во Рафа може да доведе до крвопролевање и дополнително да го ослабне и онака кревкиот здравствен систем, напиша Гебрејесус.