Дилемите и анализите кој пат да се фати, за да се обезбеди долгорочна стабилност и безбедност на земјата траеле кратко.
Во услови кога АРМ била во самиот зародиш и едвај да собрала сили за да го превземе чувањето на границите, Советот за безбедност со кој раководел претседателот Киро Глигоров, брзо пресекол.
-Имаше и размислувањата да се прогласи воена неутралност, но по направените анализи се заклучи дека НАТО нуди најголеми гаранции за безбедноста. Заклучокот беше донесен на 18 мај 1992 година, рече Гоцевски.
Досега, како прва формална одлука со која земјава бара прием во Алијансата се сметаше Декларацијата на Собранието од 1993 година. Дали оваа дамнешна определба ќе стане реалност, зависи од исходот на Референдумот.
Националниот координатор за НАТО, Пендаровски, вели дека сите анкети покажуваат дека од сите возрасни категории младите даваат најголема поддршка, но зависи дали ќе излезат на гласањето.
Хрватската амбасадорка Даниела Баришиќ, сподели дел од искуството на нејзината земја, која организираше Референдум за членство во ЕУ во 2012-тата.
-Практично половината од населението беше „ЗА“, но и понатаму има третина која мисли дека „ништо не се промени“, „работите се исти како пред членството во ЕУ и НАТО“, но никој не вели дека е полошо. Тоа е суштината – не е полошо – рече Баришиќ.
На Конференцијата говореше и претседателот на Собранието, Џафери. Уверен е дека Референдумот ќе биде успешен, а Македонија ќе стане 30-та земја членка на НАТО.