Веќе в четврток, во Македонија доаѓа помошникот државен секретар за Европа и Евроазија, Вес Мичел. Во соопштението на Стејт Департментот се наведува дека Мичел ќе има средби со македонскиот премиер Заев, претставници на партиите и со бизнис заедницата. Целта е, како што се потенцира во соопштението, е да даде поддршка на Договорот од Преспа и на претстојниот референдум.

Во успешен договор за името е убеден и грчкиот премир Ципрас, кој денеска со часови зборуваше пред Европскиот Парламент. За него, спогодбата од Преспа е врв на грчките напори и пример, кој треба да го следи Западен Балкан.

-Со премиерот на ПЈРМ Заев успеавме да стигнеме до заеднички прифатливо решение за името без употреба на сила, туку преку дипломатија и дијалог. Овој договор за името може да биде модел за решавање на споровите во нашиот регион, изјави Алексис Ципрас, премиер на Грција.

На обраќањето на Ципрас, му претходеше дебата, на која тој беше прашан, но не одговори прецизно, како ќе се нарекува јазикот и националноста на Македонија, ако биде прифатен Договорот. Грчкиот премиер само одговори дека се надева оти ПЈРМ ќе го смени уставот и ќе се вика Северна Македонија. Ја обвини и опозицијата во двете земји.

-Г-нот Мицотакис од Грција и г-нот Мицкоски од ПЈРМ, кои и припаѓаат на Европската Народна партија, нѐ обвинуваат со потполно истите аргументи, адаптирани на земјата дека сме предавници и оти договорот е штетен, изјави Ципрас.

Ципрас потенцираше и дека една од главните придобивки за Атина од Договорот е дека во иднина Македонија нема да може да претендира на „античкото грчко македонско наследство“.