Анализа: Грчките партии за договорот меѓу Македонија и Грција

 Постоењето македонски јазик и македонска националност во договорот меѓу Македонија и Грција се главните забелешки од грчките опозициски партии кај јужниот сосед, откако беше постигнато решение меѓу двете земји.

Како што јави дописничката на МИА од Атина, коментарите од опозициските партии во Грција се негативни, според досегашните јавни настапи, изјави и соопштенија и веројатно е дека нема да го поддржат договорот. Енигма останува дали можеби партијата Река сепак ќе заземе поразличен став од Движењето за промена, но она што е сигурно е дека на утрешната расправа во грчкиот парламент, сите партии ќе ги отворат картите и ќе ја изразат нивната позиција.

Од опозициските грчки партии, Сојуз на централисти и Златна зора, како и коалициониот партнер во владата, Независни Грци, не се согласуваат со сложено име со вклучен термин Македонија, па според тоа веројатно е дека би гласале против договорот.

Владиниот портпарол и министер без ресор, Димитрис Ѕанакопулос во интервју за грчкото радио „Реал фм“ изрази надеж дека кога македонската страна ќе ги заврши сите предвидени обврски и договорот дојде во парламентот, ќе биде прифатен од поширокото парламентарно мнозинство.

- До овој момент она што го гледам е дека Река, Движење на демократски социјалисти, Демократската левица, даваат изјави на позитивен начин во однос на договорот, рече Ѕанакопулос споменувајќи ги централно левичарските партии дел од коалицијата Движење за промена во кое е и ПАСОК.

МИА, ги пренесува позициите на грчките партии според нивните ставови откако беше постигнат договор меѓу Македонија и Грција.

Нова демократија

Најголемата опозициска партија во Грција, Нова демократија, не само што не се согласува со постигнатиот договор, туку ја вели дека владата нема политички легитимитет да го потпише, со оглед на тоа дека коалициониот партнер во владата не се согласува со решението.

Од Нова демократија, континуирано ја обвинуваат владата за тајна дипломатија, сметаат дека договорот е лош и проблематичен, „затоа што е спротивен на ставот на мнозинството од грчкиот народ, бидејќи ги отстапува на македонски јазик и македонска националност“, нешто што за грчката конзервативна партија е „неприфатлива национална отстапка“.

Како што веќе објави МИА, се поверојатно е дека од Нова демократија ќе достават барање за гласање недоверба на грчката влада.

Движење за промена

Коалицијата на централно левичарки ориентираните партии ПАСОК, Демократската левица , Река и Движење на демократски социјалисти, која веќе настапува како Движење за промена, според грчките медиуми до доцна синоќа разговарале и го разгледувале договорот на политичкиот совет на партијата.

Лидерката на ПАСОК, Фофи Генимата коментирала дека договорот е лош, додека пак лидерот на Река, Ставрос Теодоракис, лидерот на Движењето на демократски социјалисти, Јоргос Папандреу и атинскиот градоначалник Јоргос Каминис, според грчките медиуми, рекле дека и покрај тоа што договорот има некои „сиви точки“, се движи во позитивна насока.

Генимата, како што претходно објави МИА, рече дека доколку во ревизијата на Уставот се вклучи и прилагодување на националноста и јазикот согласно со новото име и доколку поканата за интеграција во НАТО се достави по завршувањето на процесот, тогаш договорот би можел да биде прифатен.

Комунистичка партија на Грција

Од Комунистичката партија на Грција не се согласуваат со договорот и ја обвинуваат грчката влада дека дава „писмо со препораки“ за интеграција во НАТО и прифаќа македонски граѓанин и македонски јазик.

Во телефонскиот разговор веднаш по постигнатиот договор во вторникот вечерта, генералниот секретар на партијата, Димитрис Куцубас, му истакнал на Алекис Ципрас дека со условите, договорот е во воздух додека да заврши предвидениот процес и потенцирал дека со договорот „останува семето на иредентизмот со прифаќањето на македонски граѓанин и македонски јазик“.

Сојуз на централисти

Малата грчка партија Сојуз на централисти што на последните избори во Грција, по прв пат влезе во грчкиот парламент е против сложено име со вклучен терминот Македонија.

Претседателот на партијата, Василис Левендис смета дека владата направила голема грешка што „го дава името Македонија, без да преговара“.

Златна зора

Од Златна зора, сметаат дека договорот е предавство и национално неприфатлив, а во сабота попладне ќе организираат протест во Солун.

Според лидерот на партијата, Никос Михалољакос, „никој нема право да го отстапи името Македонија, кое не е само едно име, туку душата на народот“. Тој упатува обвинувања и критики до грчкиот премиер дека го отстапил правото на македонски јазик и македонска националност.

„Не за предавството, тргнете ги рацете од нашата Македонија“ е слоганот под кој во сабота на 16 јуни во 19 часот во Солун, Златна зора ќе одржи протест против „распродавањето на Македонија“.

Независни Грци

И покрај тоа што се дел од коалиционата грчка влада, Независни Грци имаат дијаметрално спротивен став во однос на СИРИЗА и исто како и Златна зора и Сојуз на централисти, не прифаќаат сложено име со вклучен термин Македонија.

Откако беше постигнат договор, а текстот од договорот веќе испратен до сите партии и достапен и до граѓаните, преку медиумите, од Независни Грци не излегоа со став и коментар.

Лидерот на партијата и министер за одбрана на Грција, Панос Каменос, на неколку часа пред соопштувањето дека постои договор меѓу Зоран Заев и Алексис Ципрас, во вторникот, на прес-конференција го повтори неговиот став дека нема да поддржи договор што ќе содржи име со терминот Македонија и смета дека е потребна лидерска средба под претседателот на државата за да се промени одлуката донесена во 1992, според која името треба да биде без терминот Македонија.

Ставот на Каменос, како што веќе објави МИА, го коментираше грчкиот премиер во синоќешното интервју за ЕРТ. Ципрас рече дека Панос Каменос го известил дека ќе си го задржи почетниот став и нема да гласа за договорот, но и нема да ја урне владата.

Спасен манастирот ,,Св Петка" од пламените јазици кај Пехчево

Натчовечките напори на жителите, пожарникарите и сите инволвирани во гаснењето ја спасија од опожарување манастир „Св.Петка” од пожарот кој повеќе од 10 часа беснее во Пехчево.

Моментално ситуацијата е под контрола, а гаснењето продолжува со четири возила кои пристигнаа на припомош од Бугарија. За време на пожарот како што информираат жителите кои цел ден учествуваа во гаснењето комбајните жнееле со цел да се спаси житото и да се спаси родот од пламените јазици.

-За среќа манастирот е спасен, изгасен е на време. Не е доцна за помошта што стигна од Бугарија бидејки има потреба од помош кај Чифлик, Умлена и Робово, бидејки од таму може да префрли многу лесно за Пехчево. Попладне дојде и хеликоптер на Армијата. Гаснеа и пожарникарите, од Шумско стопанство и населението. Се што дојде за помош е добредојдено, вели жител на Пехчево.

Додава дека според негова проценка штетата е катастрофална.

-Штетата е огромна, пределот не е најбогат но доста добар е, има доста борова шума, се е изгорено. Тоа на пладне беа страшни пламени јазици, вели тој.

Паралелно продолжува гаснењето на пожарот кај маалото Пасјак каде едно од вкупно 4 те возила кои пристигнаа како помош се вклучија во гаснење на огнената стихија над селото Нов Истевник.

Истражување: Заразата со корона е три пати помала меѓу вакцинираните

Целосно вакцинираните луѓе во Англија имаа три пати помала веројатност да бидат позитивни на коронавирус отколку невакцинираните, според британското истражување објавено денеска.

Ова е студија на научниците од Кралскиот колеџ во Лондон спроведена на 98.233 тестови за коронавирус помеѓу 24 јуни и 12 јули.

Вкупно 0,63 проценти од тестовите биле позитивни (или 1 на 158), при што процентот на позитивни кај невакцинираните изнесувал 1,21 проценти , а кај целосно вакцинираните 0,4 проценти. Студијата, исто така, посочува дека резултатите покажуваат дека вакцинираните луѓе имаат помала веројатност да го пренесат вирусот отколку невакцинираните, бидејќи количината на вирус во нивното тело е помала.

Сепак, некои британски претставници и научници повикале на претпазливост, откако владата ги олесни сите рестриктивни мерки на 19 јули, вклучително и укинувањето на задолжителното носење маски во одредени затворени простории.

Документ на американската влада протечен минатата недела предупредува дека инфекциите кај целосно вакцинираните луѓе не се толку ретки како што се мислеше и дека вакцинираните луѓе лесно можат да го пренесат вирусот.

Пол Елиот, професор во одделот за јавно здравје на Империјал Колеџот и директор за истражување, рече дека резултатите ги потврдуваат претходните податоци што покажуваат дека двојната доза на вакцината обезбедува добра заштита од инфекција.

„Сепак, ние исто така можеме да видиме дека сеуште постои ризик од инфекција, бидејќи ниту една вакцина не е 100 проценти ефикасна, и знаеме дека некои луѓе со двојна вакцинација сеуште можат да го добијат вирусот“, рече тој.

„Значи, дури и со олеснување на ограничувањата, сепак треба да дејствуваме со претпазливост за да се заштитиме едни со други и да ја спречиме стапката на инфекции“, додаде Елиот.

Бројот на дневни случаи во Велика Британија регистрирани од Министерството за здравство на Обединетото Кралство е намален по олабавувањето на мерките. Овој тренд ги изненади експертите кои предвиделе големо зголемување на бројот на заразени.

Стојанче Ангелов именуван за директор на ЦУК

Владата на денешната седница го именува Стојанче Ангелов за директор на Центарот за управување со кризи (ЦУК).

Ангелов досегаше беше на истата функција, но како вршител на должност.

По избувнувањето на пожарот во Кочани на 2 август и информацијата за несервисираните канадери, тој беше обвинет од опозицијата и од дел од јавноста, за лошо менаџирање на ситуацијата. ВМРО-ДПМНЕ побара од него и да си поднесе оставка.

Но, Ангелов неколку пати потенцираше дека не само што не направил никаков пропуст како прв човек на ЦУК, туку е и горд на реализираното во врска со гасењето на пожарот во Кочани.

-Најодговорно и категорично тврдам дека беа преземени сите мерки, се што ни беше на располагање се стави во функција тој ден. Не само што не направив пропуст, туку сум и горд на тоа што го направиме во Кочани, истакна Ангелов во денешното гостување на Канал 5 и најави тужба за пратеникот од Кочани доколку, како што рече, не му се извини за изнесените невистини.

За Ангелов, реакцијата на ВМРО-ДПМНЕ за пожарот во Кочани е невкусна и неточна, за добивање политички поени.

притисни ентер