Навивачите на Лирија се соочуваат со тригодишна забрана за влез во СЦ „Борис Трајковски“

Навивачите на кошаркарскиот клуб Лирија од скопски Сарај може да бидат казнети со тригодишна забрана за присуство на натпревари во арената „Борис Трајковски“.




- „Борис Трајковски“ е национална спортска арена и во неа нема место за некој што има други претензии освен спортско и фер навивање. Вечерва од страна на навивачите на Лирија беше децидно прекршен Законот за спорт и Законот за пушење во спортски сали поради што во понеделник пред Одборот ќе предложам навивачката група на Лирија да биде казнета со тригодишна забрана за присуство на натпревари во овој објект, истакна Ратко Капушевски, директорот на Спортскиот центар „Борис Трајковски“.

Тој на прес-конференцијата доцна синоќа ги информира присутните дека ваква санкција веќе имаат добиено неколку правни субјекти и верува дека тоа е, како што рече, вистински начин за да се справиме со овој вид на проблеми.

Синоќешните инциденти јавно ги осуди и Македонската кошаркарска федерација.

- Јавно ги осудуваме сите немили настани кои се случија на Куп-натпреварот помеѓу Лирија и Куманово и кои немаат ништо заедничко со спортот. Напорно работевме заедно со клубовите, посветивме сериозно внимание, но сета превенција се покажа дека не беше доволна, соопштуваат од МКФ.

Федерацијата најави ригорозни казни за сите предизвикувачи на следните вакви проблеми.

- Ригорозно ќе се спротиставиме на сите вакви следни проблеми, кои несомнено ќе ги има затоа што живееме во време полно со тензии. Но, нема да потклекнеме и да ја прегазиме кошарката. Спортот е нешто свето и сите ние заедно го градиме со многу труд, енергија и емоции. Арената „Борис Трајковски“ е арена за спорт и ќе остане само за спорт. Секој залутан кој ќе дојде и ќе мисли дека ќе може да ја злоупотреби за други цели, се лаже дека ќе му овозможиме место за егзибиционизам. На секое националистичко навивање, на секое непочитување и навредување на противникот, ќе има празнење на сала, изјавуваат од МКФ. 

На синоќешниот дуел од Купот на Македонија меѓу Куманово и Лирија, поради навредливо навивање на национална основа и прекршување на Законот за спорт се случи прекин подолг од еден час и имаше делумно празнење на салата. Натпреварот го доби Куманово со 103:89.
притисни ентер