Владата на вчерашната седница усвоила Информација која предвидува санација на живеалиштата кои се загрозени или целосно уништени од поплавите, кои ќе бидат категоризирани во четири групи согласно претрпените оштетувања од што ќе зависи висината на поддршката и помошта.

Прва категорија, појасни тој, се објекти кои немаат видливи конструктивни оштетувања, освен влагата и оштетувања на мебел и покуќнина, а во кои по нивното чистење и дезинфицирање непречено би можело да се живее.

Втора категорија се објекти кои немаат видливи оштетувања на конструктивните елементи, но за кои се потребни дополнителни санациски мерки и занатски работи како промена на под, врати, внатрешно санирање на просториите, санитарниот јазол... Трета категорија се објекти кои имаат делумно оштетени конструктивни елементи кои треба да бидат санирани со доѕидување, бетонирање..., а им се потребни и пообемни занатски работи кои би требало да бидат завршени не подолго од 10 до 30 дена.

Четврта категорија се објекти кои имаат делумно или целосно оштетени конструкциски елементи за кои се потребни поголеми санациски мерки и пообемни занаетчиски работи кои треба да бидат завршени за не повеќе од 30 дена. На лицата за чии објекти ќе биде заклучено дека не може да бидат санирани ќе биде обезбедено долготрајно сместување по критериум на лица во социјален ризик.

Тие објекти, како што истакна владиниот портпарол, ќе бидат срушени, и ќе им бидат изградени нови. Објектите би можеле да бидат изградени како монтажни. Новите живеалишта треба да бидат изградени за период не подолг од 12 месеци.

На седницата, Владата донела и одлука да биде исплатена оштета за уништените земјоделски површини.

- За таа цел во наредните денови тимови од МЗШВ ќе направат конкретна пресметка на оштетувањата на секое индивидално земјоделско стопанство, а потоа ќе биде определена сумата за помош и поддршка. Првичните проценки говорат дека вкупната површина погодена од поплавите се проценува на околу 10 илјади хектари. Од нив околу 4 илјади се под житни култури, а 600 хектари под овошен и лозов насад. Останатите 5 илјади хектари се под градинарски култури. Информациите од Земјоделски факултет и стручните служби говорат дека житните култури и овошните и лозовите насади не би требало да претрпат оштетувања од поплавите поради тоа што водата е веќе повлечена, рече Ѓорѓиев.

На владината седница, како што информира, е формиран и специјален тим кој ќе го предводи вицепремиерот Владимир Пешевски, а ќе треба да изготви извештај за вкупните инфраструктурни оштетувања и предлог-мерки за нивна санација. По завршувањето на извештајот, рече тој, ќе бидат определни и обемот на поддршката и помошта за општините во кои има вакви инфраструктурни оштетувања.

На наредната седница се очекува да се донесе одлука за отстапување на сточна храна за земјоделските стопанства од стоковите резерви на Република Македонија.

Владиниот портпарол на денешната прес-конференција информираше дека последици од поплавите претрпеле 831 семејство или околу 3.800 лица. Според него, првиот пакет мерки за интервентно и приоритетно задоволување на потребите на населението се спроведува и во текот на неделава треба да биде завршен.

- Денеска треба да биде завршена исплатата на еднократната парична помош од 15.500 денари по семејство. Средствата се трансферирани по основ на елементарна непогода и кога ќе легнат на трансакциските сметки извршителите треба да се воздржат од извршување на овие средства доколку некои од лицата имаат нерасчистени должнички обврски по друг основ, истакна Ѓоргиев.

Тој додаде дека до крајот на неделата треба да биде завршена доставата на облеката и обувките до загрозените лица. Секое од нив ќе добие по два комплети зимски и летни облека и обувки, односно ќе бидат распределни 16.200 комплети. Испорачени се вкупно 250 кутии на разновидни лекови, а во текот на денешниот ден ќе бидат испорачни уште 400 дополнителни.