32% проценти од граѓаните во анкета на „Рејтинг“ мислат дека Заев е подобра опција за премиер од лидерот на ВМРО, Мицкоски, кој добил поддршка од 27 проценти граѓани, додека пак 20 проценти од испитаниците одговориле дека ниту еден од нив не бил добар за таа функција.
Според истражувањето, за граѓаните најголем проблем во земјава остануваат ниските плати и животниот стандард, додека пак на второто место се најде корупцијата и криминалот, а меѓу главните проблеми се најдоа и невработеноста, иселувањето и високите трошоци за живеење.
На прашањето која влада може да ги реши подобро наведените проблеми на земјава, 30 проценти од граѓаните одговориле дека тоа е владата предводена од СДСМ, наспроти ВМРО која добила поддршка од 26 проценти од анкетираните. Од друга страна 20 проценти од оние кои учествувале во истражувањето, сметаат дека ниту едната ниту другата може да ги реши наведените проблеми во анкетата.
42 проценти од испитаниците велат дека владата предводена од СДСМ може побрзо да обезбеди членство во ЕУ и НАТО, додека пак поддршката на ВМРО по ова прашање изнесува 22 проценти, а 27% не веруваат дека било која од нив може да го обезбеди членството.
Анкетата на „Рејтинг е спроведена на примерок од 1080 испитаници, од 18 до 29 Јануари, со метод лице в лице, а статистичката грешка изнесува од -3 до +3 проценти..