Американските хотели пред почетокот на СП: Инфантино излажа, имаме помалку резервации од порано - Канал 5

Фудбал

Американските хотели пред почетокот на СП: Инфантино излажа, имаме помалку резервации од порано

ФИФА го најави Светското првенство како голем економски поттик за Соединетите Американски Држави,но само пет недели пред почетокот на турнирот,хотелската индустрија вели дека резервациите во некои градови домаќини се на или под нормалните летни нивоа.

Американските хотели пред почетокот на СП: Инфантино излажа, имаме помалку резервации од порано

Според анкета објавена во понеделник, многу хотелиери го опишуваат турнирот како „настан без вистинско влијание“, според Форбс.

Послаби резервации во повеќето градови

Според анкета на Американската асоцијација за хотели и сместување (AHLA), речиси 80% од американските хотелиери во 11-те градови домаќини на Светското првенство велат дека резервациите се под првичните прогнози. Само една четвртина од анкетираните забележале „значително дополнително зголемување“, и тоа главно на пазари со инаку силна летна побарувачка или во градови кои служат како базни кампови за националните тимови.

Извештај објавен минатата недела од Оксфорд Економикс прикажува слична слика. Додека градовите домаќини во САД ќе „видат одреден раст на БДП ова лето“, фокусиран на секторите за забава и угостителство, тоа „нема да има значително влијание“ врз целокупното вработување и економското производство оваа година.

Намалени очекувања и логистички предизвици

Иако сè уште се очекува САД да имаат економска корист од домашниот дел, јасно е дека побарувачката за турнирот нема да биде ни блиску до „104 Супербоули“, како што вети претседателот на ФИФА, Џани Инфантино, минатата година. „Таа изјава не беше вистина кога беше дадена и нема да биде вистина“, изјави за Форбс Јан Фрајтаг, национален директор за аналитика на хотелскиот пазар во CoStar.

Анализата на ФИФА, која предвиде економско влијание од 30,5 милијарди долари, се базираше на пристигнувањето на милиони меѓународни туристи. Минатата година, ФИФА им објави на туристичките здруженија на градовите домаќини еднаков сооднос на домашни и странски посетители.

Сепак, околу седум од десет испитаници во анкетата на AHLA рекоа дека пречките за виза и пошироките геополитички проблеми значително ја намалуваат побарувачката од странство. „Недостатокот на меѓународни гости сигурно ќе има негативно влијание врз целокупните економски перформанси“, рече Фрајтаг.

Покрај тоа, самата големина на ова Светско првенство, кое се одржува во 16 градови во три земји, претставува логистички пречки за странските патници. „Клучната разлика е во тоа што овој турнир е многу поголем од претходните. Просторно е поразделен, поскап, а патувањето е покомплицирано“, објасни за Форбс Алан Фајал, продекан на Колеџот за менаџмент во угостителството Розен при Универзитетот во Централна Флорида.

Од разочарување до умерен оптимизам

Најголемото разочарување е во Канзас Сити, каде што 85-90% од хотелиерите пријавуваат помали од вообичаените резервации за јуни или јули. Во Бостон, Филаделфија, Сан Франциско и Сиетл, речиси 80% од хотелиерите велат дека резервациите се полоши отколку во текот на типично лето, при што многумина го опишуваат турнирот како „ненастан“.

Во Лос Анџелес, 65-70% од испитаниците пријавиле резервации под очекувањата, додека околу две третини од хотелите во Њујорк регистрирале побарувачка на ниво на нормално лето, без очекувано зголемување.

Од друга страна, во Мајами, повеќе од половина (55%) од испитаниците велат дека резервациите се подобри од очекуваното и ги надминуваат вообичаените летни бројки. Половина од хотелите во Атланта (50%) исто така гледаат исполнетост во согласност со очекувањата или подобра.

Во двата града домаќини во Тексас, Далас и Хјустон, околу 70% од хотелиерите велат дека резервациите се под прогнозите за Светското првенство, иако тие се претежно на ниво на типично лето, што укажува на „ограничен дополнителен раст“ поради турнирот.

Надеж во навивачите во последен момент

За натпреварите во јуни, времето за резервација за странски навивачи полека истекува. „За навивачите на кои им е потребна виза, тој рок истекува или веќе е истечен“, рече Фрајтаг. „Ако навивачите од одредена земја не можат да добијат визи, останува да се потпрат на Американците кои ја следат таа репрезентација или на луѓе кои веќе живеат во земјата“.

Сепак, останува надежта дека подоцнежната фаза од натпреварувањето ќе донесе поголема побарувачка од странски патници, „ако можат да си го дозволат билетот“, додаде Фрајтаг. „Претпоставувам дека „дарежлив“ би бил вистинскиот збор за цените на црниот пазар“.

Зголемување на побарувачката за хотелски соби би можело да се случи во јули, по групната фаза од турнирот, според Фјал. „Ако некоја репрезентација игра добро и навивачите чувствуваат дека „ова може да биде наша година“, верувам дека многумина ќе сакаат да бидат таму.

Турнирот всушност се загрева дури кон крајот на јуни. Тогаш би можеле да видиме нагло зголемување“, рече тој. А ако странските навивачи не дојдат во голем број? „Стадионите ќе бидат прилично полни, претежно Американци. Некои ќе бидат преполни. Ќе изгледа одлично на телевизија, но нема да биде туристичка златна треска“, заклучи Фјал.

Тагови: Инфантино

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Меџити: Историската меморија се гради со оддавање почит на оние што оставиле трајна трага во идентитетот на Скопје

Во Старата скопска чаршија беше откриена спомен-плочата посветена на Адолф Циборовски, во знак на благодарност за неговиот придонес во обновата на Скопје по катастрофалниот земјотрес во 1963 година. 

Меџити: Историската меморија се гради со оддавање почит на оние што оставиле трајна трага во идентитетот на Скопје

Градоначалникот на Општина Чаир, Изет Меџити, заедно со градоначалникот на Град Скопје, Орце Ѓорѓиевски, и Јулија Циборовски, внуката на истакнатиот полски урбанист Адолф Циборовски, денес во Старата скопска чаршија ја открија спомен-плочата посветена на Циборовски, во знак на благодарност за неговиот придонес во обновата на Скопје по катастрофалниот земјотрес во 1963 година и за неговата посветеност на зачувувањето на историското наследство на градот.

Во своето обраќање, градоначалникот Меџити ја истакна важноста од негувањето на историската меморија и оддавањето признание на личностите кои оставиле трајна вредност во развојот на Скопје.

„Адолф Циборовски беше еден од оние луѓе кои разбраа дека градот не се гради само со создавање на новото, туку и со зачувување на она што го прави единствен. Неговиот придонес во зачувувањето на Старата скопска чаршија останува дел од историјата на Скопје, а спомен-плочата што денес ја откривме е израз на нашата благодарност за неговата визија и посветеност“, изјави Меџити.

За време на настанот беше истакнато значењето на меѓународната солидарност во обновата на Скопје по земјотресот во 1963 година, како и потребата од зачувување на историското и културното наследство како нераскинлив дел од идентитетот на градот и неговата колективна меморија.

Општина Чаир

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Трет пат за неколку дена авион Ф-16 соборува дронови, што навлегле во воздушниот простор на Романија

Романски борбен авион Ф-16 собори дрон кој влегол во воздушниот простор на земјата без дозвола, соопшти денес Министерството за одбрана во Букурешт, што е трет ваков инцидент за два дена, објави Ројтерс.

Трет пат за неколку дена авион Ф-16 соборува дронови, што навлегле во воздушниот простор на Романија

„Дронот беше безбедно соборен, на 12 километри од градот Сулина, во националниот воздушен простор, над територијалните води“, се вели во соопштението на министерството.

Властите вчера исто така соопштија дека е соборен еден дрон кој го нарушил воздушниот простор на Романија над ретко населена област во близина на границата со Украина.

Сличен инцидент се случи на 24 јули, кога дрон влезе во романскиот воздушен простор без дозвола над ненаселена област во округот Бузау.

Тагови: дрон Романија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Пирло нема да застане на чело на италијанската репрезентација- имал спорен договор со Русија

Андреа Пирло (47) се согласи да ја преземе италијанската репрезентација, но официјалната потврда сè уште не е пристигната. 

Пирло нема да застане на чело на италијанската репрезентација- имал спорен договор со Русија

Помеѓу поранешниот одличен играч од средниот ред и изборната клупа беше неговата соработка со Фонбет, голема руска компанија за обложување, што го претвори случајот во политичка и репутациска контроверзност.

Според информациите од италијанските медиуми, Пирло се договорил со Италијанската фудбалска асоцијација за четиригодишен договор вреден околу 1,5 милиони евра по сезона, со бонуси. Тој беше избран откако Пеп Гвардиола ја одби понудата, а проектот треба да трае најмалку до Светското првенство во 2030 година. Ројтерс објави дека ФИГЦ сè уште официјално не го потврдила договорот.

Пирло е амбасадор на рускиот бренд за обложување

Пред да потпише, Пирло мора да биде ослободен од договорот со Јунајтед ФК, клуб од Дубаи кој се натпреварува во втората лига на фудбалот на Обединетите Арапски Емирати. Сепак, во последните денови, неговата соработка со Фонбет, чиј глобален амбасадор е, стана многу поголем проблем.

Претседателот и сопственик на Јунајтед ФК, Сергеј Ломакин, има значајни деловни интереси во Фонбет, а со ангажирањето на Пирло, клубот го искористи неговото глобално признание за промоција на обложувалницата. На крајот на мај, Пирло учествуваше на фудбалскиот настан на Фонбет во Москва, што предизвика критики поради руската инвазија на Украина.

Самата соработка не беше нелегална. Како независен професионалец, на Пирло му беше дозволено да склучи комерцијален договор со Фонбет, а секторот за обложување не е опфатен со санкциите на Европската Унија. Сепак, должноста на италијанскиот тренер е некомпатибилна со активен договор за рекламирање со обложувалницата, па затоа тој ќе мора да ја прекине таа соработка пред да потпише со ФИГЦ.

Италијанските политичари бараат прекин на соработката

Случајот предизвика реакции од италијанските политичари. Лидерот на партијата Азионе, Карло Календа, рече дека луѓето кои учествувале во руската пропаганда по 2022 година не треба да бидат на национални функции.

На критиките се придружи и потпретседателката на Европскиот парламент, Пина Пичиерно, која смета дека Пирло, со својот углед, учествувал во нормализацијата на режимот на Владимир Путин. Бенедето Дела Ведова од партијата +Европа побара да се раскине договорот со Фонбет, додека Мауро Беруто од Демократската партија нагласи дека самата поврзаност на идниот селектор со индустријата за обложување е проблематична.

Поради притисокот од јавноста, се појавија информации дека претседателот на ФИГЦ, Џовани Малаго, го преиспитува назначувањето. „Кориере дела Сера“ пишува дека Пирло ги сметал критиките на политичарите за лицемерни и инструментализирани, но исто така дека е свесен дека неговиот договор сега е во опасност. „Ла Република“ исто така наведува дека соработката со руска компанија би можела да го попречи назначувањето.

Адвокатите се убедени дека назначувањето не е во опасност

Адвокатите на Пирло тврдат дека нема законска пречка. Според „Газета дело Спорт“, договорот со Фонбет содржи клаузула што дозволува раскинување во секое време и без исплата на надомест. Неговите правни застапници исто така работат на раскинување на неговиот договор со Јунајтед ФК и се уверени дека потоа ќе може да потпише за Италијанската фудбалска федерација.

Сепак, конечната одлука сè уште не е објавена. „Газета“ наведува дека контроверзноста веројатно нема да ги промени плановите на ФИГЦ, но дека ако договорот не успее, имињата на Антонио Конте и Роберто Манчини ќе бидат повторно отворени.

Пирло играше 116 пати за Италија и беше еден од клучните играчи во тимот што го освои Светското првенство во 2006 година. Како тренер, тој го водеше Јувентус, со кого го освои Купот на Италија и Суперкупот, а работеше и во „Фатих Карагумрук“, „Сампдорија“ и „Јунајтед ФК“.

Тагови: Андреа Пирло

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер