Централниот совет на Алтернатива, највисокото партиско тело, утре вечер ќе донесе конечна одлука дали партијата ќе стане дел од власта и дали нивните четири пратеници ќе бидат дел од владејачкото мнозинство, дознава Канал 5 од партиски извори. Нова средба меѓу Заев и Гаши досега не е закажана, тврдат од партијата, но не се исклучува можноста таа да се одржи во наредните два дена.
Каква ќе биде крајната одлука од Алтернатива засега не откриваат, а нема ниту конкретни информации дали на вчерашната средба со Заев биле договорени кадровските решенија за централната власт.
Во недостиг на официјални информации во јавноста се шпекулира дека апетитите на партијата на Гаши се движат од најмалку едно министерско и едно вицепремиерско место, до три министерски, но никој од двете страни ниту ова го потврдува, ниту го демантира.
Дали од СДСМ се подготвени да се откажат од важни ресори во Владата за да ги задоволат Алтернатива, особено ако се земе предвид фактот што ДУИ нема лесно да ги даде министерските позиции, останува отворено прашање.
Откако по вчерашната средба со Заев, Гаши доби јавна порака од коалицискиот партнер Алијанса за Албанците во која го прашаа дали е валиден нивниот коалициски договор кој поред нив Алтернатива го прекршила со средбите и разговорите со Заев за влез во Владата, од партијата на Гаши денеска одговорија дека Алијансата за Албанците останува нивен политички партнер и соработник, со можност соработката да продолжи и на следните избори кога и да се одржат.