Експресно и едногласно, апелциониот судија од Битола – Александар Камбовски со целосна поддршка од 13 гласа стана нов претседател на Судскиот совет.

„Констатирам дека со 13 гласа Судски совет го избра за претседател на Судски совет колегата Александар Камбовски со што донесе и одлука за избор на претседател на Судски совет.“

Камбовски кој е дел од Судскиот совет околу половина година, беше предложен како единствен кандидат од страна на членот на Советот – Исмедин Лимани, кој порача дека станува збор за судија со интегритет и кредибилитет кој доаѓа од Академијата на судии и јавни обвинители, кои вели, полека треба да ги преземаат позициите во правосудството. Збор за поддршка зедоа и членовите на Советот Димовска, Николовски, Чачарова-Илиевски и доскорешната претседателка Весна Дамева.

„Камбовски има кредибилитет и интегритет да помогне во создавањето услови што побргу судиите да можат понепристрасно и понезависно да го применуваат правото, а судовите да бидат понезависни. “

Новоизбраниот претседател Камбовски уверува дека институцијата ќе ја води со интегритет и непристрасност, а посочи дека безрезервна поддршка ќе има секој судија кој работи според законите и уставот. Прашан дали ќе има одговорност за апелациониот судија Енвер Беџети кој се најде на црната листа на САД, кажа дека, секаде каде што ќе се утврди незаконско работење, ќе има и одговорност.

„Мислам дека е крајно време да ставиме крај, бидејќи мислам дека во Македонија имаме околу 400тини судии и крајно време е тие што се 10,15,20 да ги тргнеме од нашите редови, не кажувам сега конкретно за судијата Енвер Беџети, бидејќи постапка треба да има. Меѓутоа секој оној судија кој што работи, не според законите, туку за некои негови лични интереси, дали потпаднал по влијание дали сакал да оствари некоја друга материјална или нематеријална корист, бидете уверени дека местото нема повеќе да му биде во судскиот систем.“

Камбовски посочи дека е подготвен да се сретне и со премиерот Мицкоски, велејќи дека треба да има соработка и меѓусебна контрола на трите власти во земјава, што е и смислата на самиот Устав.

„Кај нас некако тешко се воспоставуваат тие проверки и баланс помеѓу трите власти меѓутоа се надеваме дека ќе успееме да постигнеме некој повисок стандард на постапување и на соработка. Треба да соработуваме и не тоа да се сфаќа како мешање на извршната власт во судската или пак обратно. “

Претходно позицијата претседател ја извршуваше Весна Дамева која непосредно пред истекот на нејзиниот мандат поднесе оставка со образложение дека меѓу причините е и, според нејзе, политичкиот притисок од страна на Владата и премиерот.

До кога ќе остане Советот во овој состав засега не се знае, но веќе во јавноста кружат информации дека 4 или 5 судии кои беа избрани во законодавниот дом, можно е да бидат разрешени.