Балкан

Албанија го отвори последниот кластер во преговорите со ЕУ

Албанија ја дувна свеќичката со број шест, симболично означувајќи го отворањето на последниот, шести кластер од пристапниот процес.

Со тоа, Тирана ја заокружи првата фаза по само 13 месеци преговори. Денеска во Брисел беше отворен кластерот „Ресурси, земјоделство и кохезија“ и пред Албанија, како што рече, премиерот Еди Рама сега е клучниот предизвик да ги затвори сите поглавја во наредните две години.

-Ние ќе направиме сè секогаш да бидеме таму каде што треба да бидеме, водејќи се од планот да ја завршиме оваа прва фаза и да ги заклучиме пристапните преговори во 2027 година. Запрете ме, бидејќи во спротивно нема да престанам да кажувам благодарам, благодарам, благодарам... , изјави Еди Рама, премиер на Албанија.

Албанија го отвори првиот кластер лани во октомври, непосредно откако Брисел одлучи да ја раздвои од преговарачкиот пакет со Македонија, а Тирана ги почна сама преговорите низ кластери. Денешниот ден не е посебен само за Албанија, туку и за ЕУ, рече еврокомесарката Марта Кос, која додаде дека сега Тирана треба да ги продолжи клучните реформи со правосудството, борбата против корупцијата и малцинските права.

-Албанија е најдобар пример за трансформираната моќ на проширувањето. Тоа покажува дека кога ЕУ испорачува, вие напредувате. Вие сте инспирација за многумина на Западен Балкан, за многу граѓани кои сакаат ја истата решителност и промени во нивната земја. Отворањето на сите шест кластери е успех, но нивното затворање е вистинска награда. , изјави Марта Кос, еврокомесарка за проширување.

Слични пораки се очекува да испрати и шефот на германската дипломатија, Јохан Вадефул, кој ја почна 3-дневната турнеја низ земјите од Западен Балкан, а во чии рамки ќе ја посети и Македонија. Тој денеска е во Подгорица, Тирана и Белград, а утре по посетата на Приштина ќе допатува и во Скопје. Од Сараево Вадефул порача дека целта на посетата е да се забрза евроинтеграцијата на регионот, но само доколку тие ги исполнат реформите.

-Едно е сосема јасно. Процесот на пристапување е и ќе биде процес базиран на заслуги. Тоа за земјите од Западен Балкан значи дека мораат да спроведат длабоки, често и многу тешки реформи. Не постои заобиколен или скратен пат. , изјави Јохан Вадефул, министер за надворешни работи на Германија.

Албанија и посебно Црна Гора беа означени како лидери меѓу земјите кандидатки за време на презентирањето на извештаите за напредокот пред две недели. Пофалби добија и Украина и Молдавија, кои се очекува да ги почнат преговорите ако Унгарија одлучи да го тргне ветото кон Киев.

Тагови: Албанија ЕУ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Црна хроника

20 лица се уапсени викендов поради трговија со дрога

Task Force и викендов активно против недозволената трговија со дрога: 20 лица лишени од слобода.

Од 2 до 4 октомври 2026 година, припадниците на Министерството за внатрешни работи, преку координирани активности на Работниот тим – Task Force, постапуваа во 13 случаи поврзани со недозволена трговија со дрога, на подрачјето на повеќе Сектори за внатрешни работи и Регионални центри за гранични работи.

Во рамки на преземените активности извршени се повеќе прегледи и претреси на лица, возила, домови и други простории, при што е запленета поголема количина наркотична дрога, а 20 лица се лишени од слобода, меѓу кои и двајца странски државјани – од Полска и Чешка.

Во текот на викендот, на подрачјето на СВР Струмица во еден од случаите полициските службеници пронашле и одзеле 59 стебла марихуана со вкупна тежина од околу 680 килограми, додека во друг случај пронајден е и одземен голем патнички куфер полн со марихуана. На подрачјето на СВР Скопје, при претреси на три локации што ги користело едно лице, одземени се осум кеси со околу 800 грама марихуана, при што лицето е лишено од слобода.

На подрачјето на СВР Велес, при претрес на дом и преглед на лице, одземени се 29 помали кеси со вкупно 15 грама кокаин, 14 грама кафеавкаста материја и околу 5.000 евра. Во рамки на активностите на Одделот за сузбивање на организиран и сериозен криминал, извршени се претреси на четири локации, при што две лица се лишени од слобода, а пронајдени и одземени се околу 200 грама кокаин, 505 милилитри масло од хашиш и 4,58 грама марихуана.

За преземените активности ќе следуваат соодветни кривични пријави.

Ова се конкретни резултати од координираната работа на полициските службеници на терен и продолжение на засиленото постапување против лицата и криминалните структури инволвирани во производство и недозволена трговија со наркотична дрога.

Министерството за внатрешни работи продолжува со засилени активности за сузбивање на недозволената трговија со дрога и откривање на лицата инволвирани во овој вид криминал, соопштуваат од МВР.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Црна хроника

Тројца малолетници од Скопје предизвикале пожар во парк шумата Гази Баба, уапсени се

Лишени од слобода тројца малолетници од Скопје поради предизвикување пожар, следува пријава.

На 04.10.2026 во парк шума Гази Баба во Скопје, полициски службеници од СВР Скопје лишија од слобода тројца малолетници од Скопје, постапувајќи по претходна пријава дека предизвикале пожар при што била опожарена сува трева.

Од Бригадата за противпожарна заштита пожарот бил изгаснат, а по целосно документирање на случајот Единицата за внатрешни работи Гази Баба при СВР Скопје ќе поднесе кривична пријава поради постоење основи на сомнение за сторено кривично дело „предизвикување општа опасност“ по член 288 од Кривичниот законик, соопштуваат од МВР.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Обвинителството ги оспорува заклучоците на вештакот ангажиран од д-р Нино Васев

Во Кривичниот суд продолжи судењето за предметот „Онкологија 1“. Денеска во Кривичниот суд беше испрашуван вештакот Владимир Даниловски, вешто лице ангажирано од страна на одбраната.

Неговите заклучоци за терапијата на онколошките пациенти беа оспорени од обвинителството на денешното вкрстено испрашување.

На судењето кое се води против поранешниот директор на Клиниката за онкологија, Нино Васев, и уште двајца онколози, обвинети за несовесно лекување пациенти, обвинителството поставуваше прашања за дозирањето и третманот на конкретни онколошки пациенти со лекови и терапија за кои, како што нагласи вештото лице, се произнесува во своето вештачење и наведува дека се дадени согласно европските протоколи и се во насока на тоа да се види стручноста на ова вешто лице.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.