Регион

Актерот Феѓа Штукан е „безбедносна закана“ за Србија, ќе биде депортиран во БиХ

Актерот Феѓа Штукан од Босна и Херцеговина денеска ќе биде депортиран во Сараево, откако вчера беше приведен на белградскиот аеродром Никола Тесла, а полицијата му врачила решение дека претставува безбедносна закана за Србија.

Актерот Феѓа Штукан од Босна и Херцеговина денеска ќе биде депортиран во Сараево, откако вчера беше приведен на белградскиот аеродром Никола Тесла, а полицијата му врачила решение дека претставува безбедносна закана за Србија, потврди неговиот адвокат за Хина.

Штукан во неделата вечерта требаше да биде гостин на регионалниот фестивал Крокодил, но беше приведен на аеродромот Никола Тесла.

Адвокатот на Штукан, Сеад Спаховиќ, вели дека во формална и правна смисла, Штукан „ниту бил приведен, ниту уапсен“, само бил оттргнат од редот за пасошка контрола и изолиран до првиот лет за Сараево.

„Нема правен лек за решението што му го врачила полицијата“, рече Спаховиќ, наведувајќи дека документот се заснова „на проценките на официјалните органи“, но не објаснува како Штукан ја загрозува националната безбедност на Србија.

„Бизарно е што Штукан е прогласен за опасност за безбедноста на државата, а во одлуката никаде не е наведена аргументацијата на МВР на Србија ниту како, на кој начин и што конкретно направил за да постави опасност за националната безбедност. Ова е несомнено политички чин, а начинот на кој е спроведен во закон се нарекува - злоупотреба на дискреционото оценување“, оцени Спаховиќ.

Речиси идентична ситуација со полицијата имаше и Феѓа Штукан и претходно кога не му беше дозволен влез во Србија, што следеше по неговото учество на протестите „Србија против насилството“ и неговата поддршка за стотици илјади граѓани кои со денови демонстрираа на белградските улици и други градови по двете масовни убиства во мај 2023 година

Претседателот на Србија, Александар Вучиќ, подоцна го нарече „криминалец“, а провладините таблоиди - „муслимански екстремист“, тврдејќи дека на протестот на опозицијата „повикувал на насилство и предлагал субверзивни акции“.

Штукан изјави за N1 Србија дека смета дека е бесмислено што бил етикетиран како „безбедносна закана за Србија“, оценувајќи дека тоа е „наместен“ процес.

Свет

ЕУ го стави на чекање грузискиот пат кон членство

Лидерите на ЕУ одлучија да ја запрат Грузија на патот кон Европската унија поради новиот закон за невладини организации (НВО) кои добиваат странски средства.

Според законот, независните медиуми и другите граѓански организации мора да се регистрираат како „странски агенти“ и да доставуваат податоци до државата доколку добиваат повеќе од 20 проценти од финансирањето од странство.

-Законот за невладини организации претставува назадување во однос на условите поставени за членство на Грузија во блокот, се вели во изјавата на лидерот на ЕУ, пренесува ДПА.

Во соопштението се повикуваат грузиските власти да ги поништат „тековните дејствија кои го загрозуваат патот на Грузија кон ЕУ, де факто доведувајќи го пристапниот процес до застој“.

Грузија е официјален кандидат за членство во ЕУ од декември 2023 година.

Масовните протести во Грузија и интервенцијата на ЕУ и Соединетите Американски Држави, кои се противат на законот, не ја поколебаа владата. Противниците веруваат дека законот, кој стапи на сила на почетокот на јуни, ќе служи за замолчување на организациите кои ја критикуваат владата на начин сличен на рускиот.

Владејачката партија Грузиски сон го оправда законот со зголемување на транспарентноста и зајакнување на суверенитетот на Грузија.

ЕУ досега разговараше за низа одговори на случувањата во Грузија, вклучително и замрзнување состаноци на високо ниво и насочување на финансирањето на ЕУ директно на невладините организации во земјата.

Исто така, имаше загриженост за поддршката на грузиската јавност, која останува цврсто проевропска.

-Главниот фокус е да се испрати силна порака до грузиската влада и да се поддржи грузискиот народ, изјави дипломат на ЕУ за ДПА.

Фудбал

Фоден се врати во Германија, а познато е и зошто го напушти ЕУРО 2024!

Фудбалскиот репрезентативец на Англија, Фил Фоден вчера се врати во Германија, откако ден претходно замина од Европското првенство во Велика Британија поради раѓањето на своето трето дете, откри Би-Би-Си.

Фудбалската асоцијација на Англија првично објави дека Фоден отпатувал поради „итни семејни причини“, но сега се знае дека заминал да присуствува на раѓањето на своето трето дете.

Асот на англискиот шампион денеска треба да тренира со соиграчите и да им помогне во атакот на посакуваната титула.

Ѕвездата на Манчестер Сити, инаку ги започна сите три натпревари кои Англија ги одигра во групата Ц на ЕУРО, а за националниот тим дебитираше во 2020 година и одигра 37 натпревари.

Фудбалерите на Англија ќе играат во осминафиналето на ЕП против Словачка, а овој дуел е закажан за в недела од 18:00 часот на Велтинс Арената во Гелзенкирхен.

Живот

Триесет семејства од државава добија пчели и пчеларска опрема, донација од ТИКА

Триесет семејства од државава добија пчели и пчеларска опрема, донација од ТИКА, Турска агенција за соработка и координација, во рамките на проектот за развој на пчеларството.

На овој начин, како што беше кажано на настанот во неготинското село Курија, тие добиваат можност за зголемување на економскиот приход, се зајакнуваат социо-економските услови на населението, а се придонесува и кон руралниот развој. Истовремено, се промовираат здравата исхрана и здравиот начин на живот.

Програмскиот координатор на ТИКА во Република Македонија, Мехмет Бајрак рече дека реализираат проекти и активности низ државава почнувајќи од 2005 година, со формирање на програмската канцеларија во Скопје.

- Првиот проект што го реализиравме во областа на земјоделството и сточарството беше проектот за развој на пчеларството во Македонија, кој започна во 2007 година. Проектот беше инициран со обезбедување обука и пчеларници за 90 земјоделски семејства од регионите Радовиш и Конче, со тоа што истиот проект беше избран меѓу најдобрите проектни практики на УНДП во рамките на програмата за соработка Југ-Југ во 2008 година, појасни тој во изјава за медиумите.

Бидејќи проектот дал успешни резултати и придонел за зголемување на економскиот приход на семејствата корисници, го прошириле за да вклучат различни градови и села низ годините.

- До денес дониравме пчелни кошници на близу 300 семејства. Денес, нови семејства се приклучуваат на проектот со тоа што доставуваме 10 кошници со пчели и потребни работни материјали за производство на 30 семејства определени од регионите како Ресен, Центар Жупа, Пласница, Диржилови и Пагаруша, Радовиш и Неготино. Дополнително, нашите водечки фармери обезбедуваат поддршка за споделување искуства на семејствата вклучени во проектот онаму каде што е потребно, информираше Бајрак.

Тој истакна дека семејствата кои имаат корист од нивниот проект за развој на пчеларството, го консумираат медот што го произведуваат и го продаваат на локалниот пазар, давајќи дополнителен придонес за нивната семејна економија. Покрај зголемување на приходите на семејните бизниси кои живеат во руралните средини, проектот дава придонес и за руралниот развој.

- Нашите проекти не се ограничени на поддршка на пчеларски активности. До денес имаме донирано оранжерии за 1000 семејства од целата земја, со цел да го зголемиме квалитетот на производите и квантитетот на производството, особено преку поттикнување на оранжериското производство. На 600 семејства им обезбедивме и садници од калинка, орев, слива и цреша и садници од јагоди, погодни за производствените карактеристики на регионите, нагласи тој.

Притоа, подвлече дека имаат обезбедено и мотокултиватори, земјоделско прскање и прскање со вештачко ѓубриво, машини за садење и берба на кромид, што им се потребни на семејствата за обработување на нивните земјишта и ги ставиле достапни за заедничка употреба на семејствата.

- Проектите што се реализираат во областа на земјоделството и сточарството се важни за нас, бидејќи директно имаат позитивно влијание врз животот на семејствата. Поради оваа причина, ќе продолжиме да ги следиме нашите проекти на ова поле во наредните периоди. На пример, оваа година планираме да ги обезбедиме потребните резервоари за собирање млеко, за да можат семејствата кои се занимаваат со сточарство, да го собираат млекото под хигиенски услови, рече Бајрак.

Исуф Јакупи од Скопје, е нов пчелар, почетник. Во изјава за МИА, тој сподели дека порано неговиот татко бил пчелар, но, починал пред неколку години. Љубовта кон пчелите отсекогаш била присутна во нивната фамилија. Тој самиот извесен период бил „оладен“ за пчеларство, не мислел да се занимава со пчеларство. Но, како професор по спорт, залагајќи се за здрав живот, а со поттик и поддршка од ТИКА, преку проект и донација, решил да се врати на семејната традиција и ако може, да развие семеен бизнис.