Здравје

Африкански центар за превенција на болести: Потребни се милиони вакцини против мпокс

Африканскиот центар за контрола и превенција на болести денеска прогласи вонредна состојба во областа на јавното здравје поради епидемијата на мпокс (мајмунски сипаници).

Заразата се проширила од Демократска Република Конго во соседните држави, јавуваат локални медиуми.

Највисокиот здравствен орган на Африка минатата недела предупреди за загрижувачката брзина на ширење на вирусната инфекција, која се пренесува преку блиски контакти и се карактеризира со симптоми слични на грип и гнојни промени на кожата. Кај многу од заболени лица болеста има лесна клиничка слика, но постојат и случаи што можат да доведат до смрт.

- Денеска ја прогласуваме оваа вонредна здравствена состојба за континенталната безбедност, за да ги мобилизираме нашите институции, колективната волја и ресурсите за навремени акции, изјави генералниот директор на Африканскиот центар за контрола и превенција на болести, Жан Касеја, на брифинг пренесуван во живо на платформата „Зум“.

Епидемијата во ДР Конго започна со ширење на ендемичниот сој познат како „клад на Конго Басен“. Оваа варијанта на вирусот подоцна беше преименувана од Светската здравствена организација (СЗО) во клад I (Clade I). Сепак, сега станува збор за новата варијанта – клад Ib, која се шири полесно преку обичен блиски контакт, особено кај децата.

Касеја на брифингот изјави дека континентот има потреба од над десет милиони дози од вакцината против мпокс, но дека само двесте илјади од нив се достапни. Тој вети дека неговиот центар ќе работи на брзо зголемување на набавките. - Имаме јасен план за обезбедување на над десет милиони дози за Африка, почнувајќи со три милиони оваа година, изјави генералниот директор на континенталниот центар.

Највисокиот здравствен орган на континентот објави дека од почетокот на годината досега, во Африка се регистрирани 461 смртен случај од вирусот. Ова претставува зголемување од 160 проценти во однос на истиот период минатата година. За случаи на смрт известиле 18 африкански држави.

Мајмунските сипаници првпат биле откриени кај луѓе во ДР Конго во 1970 година. Полесна верзија на инфекцијата се прошири во над сто држави во 2022 година, главно преку сексуален контакт. /МИА

Свет

САД распоредуваат трет носач на авиони поблиску до конфликтот на Блискиот Исток

„Ју-Ес-Ес Џералд Р. Форд“ ќе замине за Европа следната недела, изјави официјален претставник на морнарицата, тоа ќе биде трет американски носач на авиони во близина на Блискиот Исток.

„Ударната група на носачот на авиони Џералд Форд ќе замине од Норфолк (Вирџинија) утрото на 24 јуни за редовно распоредување во зоната на одговорност на Европската команда на САД“, изјави официјален претставник на морнарицата.

Американскиот носач Карл Винсон е на Блискиот Исток од почетокот на оваа година, учествува во воздушна кампања против јеменските бунтовници Хути, поддржани од Иран.

И официјален претставник на американската одбрана потврди дека шефот на Пентагон, Пит Хегсет, наредил ударната група на носачот Нимиц да се испрати на Блискиот Исток, нагласувајќи дека тоа е „за да се одржи нашата одбранбена позиција и да се заштити американскиот персонал“.

Трамп изјави вчера изјави дека ќе одлучи дали да се придружи на нападите на Израел врз Иран во следните две недели, наведувајќи ја можноста за преговори за прекин на конфликтот.

Тагови: блискиот исток САД

Свет

Велика Британија го повлекува персоналот од Амбасадата во Иран

Велика Британија го повлекува персоналот од Амбасадата во Техеран поради моменталната безбедносна ситуација, соопшти Канцеларијата за надворешни работи, Комонвелт и развој.

Претходно, Велика Британија најави привремено повлекување на членовите на семејствата на вработените во Амбасадата и во Конзулатот во Израел поради безбедносни причини.

Додека претходно привремено беа затворени Амбасадата на Словачка и Амбасадата на Австралија во Техеран.

Тагови: Велика Британија Иран

Македонија

СДСМ нема да кандидира градоначалници во Сарај, Чаир, Тетово, Гостивар, Дебар, Струга и Желино

Со одлука на Извршниот одбор, СДСМ нема да има кандидати за градоначалници во неколку општини: Сарај, Чаир, Тетово, Гостивар, Дебар, Струга и Желино, само листи за советници, брифираат од партијата.

Претходно на прес-конференција, лидерот на СДСМ, Венко Филипче ги објави имињата на првите 19 кандидати за градоначалници од партијата.

За Општина Центар, актуелниот градоначалник Горан Герасимовски.

За Општина Аеродром, д-р Александар Трајановски.

За Општина Ѓорче Петров – претседателот на општинската организација, Костадин Ацески.

За Општина Чучер Сандево, актуелниот градоначалник Сашо Комненовиќ.

За Општина Берово, актуелниот претседател на општинската организација Илија Рунтевски.

За Општина Крива Паланка, актуелниот градоначалник Сашо Митовски.

За Општина Лозово, Ацо Велковски.

За Општина Чешиново-Облешево, Горанчо Крстев.

Општина Богданци, Блаже Шопов.

Општина Дојран, Ристо Џинев.

Општина Могила - Зоран Ристевски.

Општина Неготино, Петар Мантев.

Општина Новаци, Љубе Кузманоски.

Општина Росоман, Стојанче Николов, актуелниот градоначалник.

Општина Вевчани, претседателот на општинската организација Стефан Радиноски.

Во Крушево, актуелниот градоначалник Томе Христовски.

Во Ресен, претседателот на општинската организација Александар Бузлевски.

Во Штип, исто така, претседателот на општинската организација Павел Иванов.

И претседателот на општинската организација во Општина Гази Баба, Влатко Митовски.