Живот

5-те најголеми грешки при реновирање на бања

Прекрасно и функционално уредена бања ќе ви помогне да се чувствувате поудобно во вашиот дом.

Луѓето прибегнуваат кон реновирање на бањи од неколку причини: решавање технички проблеми како што се мувла, протекување вода и оштетени цевки; зголемување на функционалноста на просторот и подобар распоред во бањата; безбедносни подобрувања (главно за стари лица или лица со слаба подвижност); подобра пазарна вредност на недвижностите. Повеќето одлучуваат да ја реновираат бањата кога продаваат/издаваат куќа или стан или откако ќе купат постар стан.

Реновирањето на бањата обично се прави еднаш на 10-20 години, пред се поради високи цени. Цената за реновирање бања, која опфаќа замена на керамика, инсталации и санитарна опрема, се движи околу 600 евра/м2. Може да се каже дека реновирањето на бањата, во рамки на целосното реновирање на домот, претставува најголем трошок.

Секоја грешка при реновирање на бања дополнително ќе ја зголеми оваа цена. Затоа, внимателно испланирајте го секој чекор и обидете се да ги избегнете 5-те „стапици“ опишани подолу во текстот:

Погрешен избор на материјал

Изберете материјали наменети за влажни услови, бидејќи во бањата се создава голема количина на водена пареа. Како најдобро решение за подови и ѕидови во бања се покажаа керамички плочки. Плочките може да се залепат само на подот, на ѕидот само како цокле до висина од околу 10 сантиметри, до половина од ѕидот или до таванот. Бањите со плочки од подот до таванот успешно се спротивставија на „забот“ на времето и естетски се најатрактивни, иако и најскапи.

Таванот, како и ѕидните површини кои не се покриени со плочки, треба да се избелат. За таа цел, најдобро е да изберете специјални бои отпорни на вода и влага.

Обрнете внимание на материјалот на полиците. Поради високата влажност и недостатокот на вентилација, мебелот за бања може да изгние или да се деформира.

Претрупување на тесна бања

Честа грешка при реновирање на мала бања е пренатрупаноста. Во преполна бања нема да можете да се свртите. Погрешно уредување на санитарните јазли може значително да ја намали функционалноста на бањата.

Затоа, во тесни бањи изберете мебел со помали димензии. Побарајте повеќе решенија како што се вградени мијалници со ормани. Тесен, а долг ѕиден простор можете да го искористите за да поставите вертикална полица на која ќе ги распоредите вашата козметика. Аголните полици се исто така одлично решение, со кои се користат главно неискористени агли.

Во случај на мали бањи, добар избор може да бидат walk-in туш кабини, што се состојат од преграда (параван) и канал во кој тече водата. Бидејќи нема визуелни пречки како кај туш кабина со када, бањите со walk-in туш кабина „изгледаат“ поголеми. Добар избор се и конзолните (висечки) тоалети.

Недоволно електрични приклучоци

Друга честа грешка при реновирање на бања. Колку штекери ќе имате во бањата ќе зависи од бројот на наменети уреди. Размислувајќи однапред, дали можеби планирате да купите машина за сушење во иднина?

Направете список на сите уреди што ќе ги користите во бањата за да може електричарот да препорача соодветен број на електрични приклучоци. Последното нешто што сакате е да сфатите откако ќе ја реновирате бањата дека немате доволно штекери.

Занемарување на вентилацијата

Добро е познато дека бањата е нај влажната соба во домот. Поради прекумерната влага и топлина и лошата вентилација доаѓа до развој на мувла, пукање на бојата на таванот, гниење на дрвени елементи и непријатни мириси.

Затоа, при реновирање, треба да поставите вентилатор во бањата, а доколку веќе го имате, проверете ја неговата исправност.

Вентилаторот игра една од најважните улоги во бањата. Неговата задача е да ја исфрли влагата и непријатните мириси. Дури и ако имате прозорец во бањата (што е ретко во денешно време), се препорачува инсталирање вентилатор за бања. Во текот на зимата, природната вентилација значително ја лади просторијата, а поради тоа луѓето нередовно ги отвораат прозорците во студените денови. Бидејќи застарениот и влажен воздух мора да излегува надвор дури и во текот на зимата, набавете вентилатор со соодветна јачина.

Овде „се прикрадува“ уште една грешка - купување вентилатор со недоволна моќност. Ако се водите според параметарот CFM (кубни стапки во минута/cubic feet per minute), наведен во спецификациите на уредот, треба да знаете дека за секој м2 простор е потребна моќност на вентилаторот од 10 CFM. Обрнете внимание на дијаметарот на одводното црево. Ако дијаметарот е 10 цм, нема смисла да се земе вентилатор со моќност поголема од 50 CFM.

Лошо осветлување

Еден од основните елементи на секоја бања е и осветлувањето. Осветлувањето треба да се планира според големината на бањата, распоредот на елементите во бањата, дали има прозорец или дали природна светлина допира до бањата.

Поради слаба и недоволна светлина, бањата може да изгледа темно и да биде непрактична. Ако уредите за осветлување не се поставени правилно, тоа може да создаде сенки и да ги отежне активностите како што е шминкањето. На пример, подобро е да користите светла од двете страни на огледалото наместо само една горе, за да може подобро да се распредели светлината и рамномерно да го осветлите лицето.

Ако имате мала бања, вградено осветлување може да биде идеално решение.

Добар избор е комбинација од неколку извори на светлина, вклучувајќи централно осветлување на таванот, светлина над огледалото и амбиентални светла. Од енергетска гледна точка, изберете ЛЕД осветлување.

Шоу биз

Шварценегер: Имигрантите во САД се гости

Поранешниот гувернер на Калифорнија, Арнолд Шварценегер вчера имаше мал „судир“ со водителките на американската емисија „Поглед“ (The View), откако изјави дека доселениците во САД треба „да се однесуваат како гости“.

Поранешниот гувернер на Калифорнија, Арнолд Шварценегер вчера имаше мал „судир“ со водителките на американската емисија „Поглед“ (The View), откако изјави дека доселениците во САД треба „да се однесуваат како гости“ и да вложат максимални напори за да ѝ се оддолжат на земјата.

- Клучната работа, во истовреме, е тоа што мораме да ги правиме работите законски! Тоа е најважното, знаете!?, додаде тој.

Во разговорот за тоа како Шварценегер би се справил со сегашната состојба со немирите во Калифорнија доколку сè уште беше гувернер, водителката Џој Бехар истакна дека во еден миг и самиот австриско-американски глумец бил имигрант. Шварценегер одговори дека „имал големо искуство со доселувањето и останува благодарен за животот што го имал во Америка“... Но, исто така, тој додаде дека имиграцијата треба да се случува на „вистинскиот начин“, пренесува „Јаху ентертејнмент“ (Yahoo Entertainment).

- Треба да ги правите тие работи според прописите. А оние луѓе кои прават нелегални работи во Америка - тие се странците, тие не се паметни. Бидејќи, кога ќе дојдете во Америка, Вие сте гости. И треба да се однесувате како гости... Како кога одам во нечија куќа - како гостин, тогаш ќе направам сѐ што можам - да ги чувам работите чисти, да го наместам креветот и да направам сѐ што е правилно... Наместо да направам кривично дело, или да навредам некого, или нешто слично, истакна Шварценегер.

Поранешниот политичар притоа ги охрабри доселениците „да ѝ се оддолжат на Америка за нивниот подобар живот“ со тоа што ќе направат нешто „без пари“ во нивната нова заедница.

- Тоа е точно. Но, Арнолд, не заборавајте дека 90 отсто од луѓето што доаѓаат овде се обидуваат да ја направат вистинската работа, се надоврза водителката и глумица Вупи Голдберг. - И многу од она што се случува во мигов е тоа дека луѓето се грабнуваат, а не треба да бидат грабнати, и се носат вон земјата. Тоа се луѓе кои имаат визи, луѓе кои ги имаат сите тие работи. Значи, ние ги сакаме сите вистински луѓе. Не сакаме луѓе кои прават лоши работи, додаде водителката.

Следејќи ја мислата на Вупи, нејзината со-водителка Асунсион Хостин изјави дека е помалку веројатно тоа имигрантите да извршат злосторства во САД, отколку граѓаните родени во оваа држава.

Тагови: Арнолд Шварценегер

Свет

Волстрит џурнал: На Израел му снемува одбранбени пресретнувачи на ракети

На Израел му снемува одбранбени пресретнувачи на ракети „Аrrow“, објави „Волстрит џурнал“, повикувајќи се на неименуван американски функционер.

Системот „Аrrow“ не е единствената одбранбена мерка што се користи против иранските ракети.

САД, исто така, имаат системи за ракетна одбрана „Патриот“ и системи за воздушна одбрана на голема надморска височина на Блискиот Исток, способни да пресретнат балистички ракети.

Според агенцијата, разорувачи на американската морнарица, исто така, собориле ракети.

„Аrrow“ е горниот слој на ракетната одбрана на Израел, заедно со „Железната купола“, која ги елиминира заканите од краток дострел како што се минофрлачи и ракети. „Arrow-2“ постои со години и пресретнува балистички ракети со долг дострел. Поновата „Arrow-3“ е специјализирана за пресретнување на ракети додека тие сè уште се надвор од Земјината атмосфера.

Тагови: Израел

Македонија

Претседателот на Собранието Гаши во Азербејџан се сретна со министри

Во рамки на официјалната посета на Азербејџан, претседателот на Собранието Африм Гаши, оствари средби со министрите за надворешни работи и за енергетика, Џејхун Бајрамов и Парвиз Шахбазов.

Како што соопшти Собранието, на средбата со министерот за надворешни работи, Џејхун Бајрамов, Гаши го поздравил интензивирањето на комуникацијата меѓу владините претставници на двете земји и додал дека се отвораат можности за поголема соработка на сите полиња.

Бајрамов истакнал дека како две пријателски држави без отворени прашања, треба да ја унапредиме соработката, не само во делот на стопанството и енергетиката, туку и во делот на туризмот.

Двајцата соговорници, како што се посочува во соопштението, заклучија дека во услови на геополитички предизвици, унапредувањето на меѓусебните добри односи и соработка ќе претставува промоција на мирот и стабилноста за поширокиот регион.

На состанокот со министерот за енергетика Шахбазов, претседателот на Собранието Гаши ги поздравил заложбите за зајакнување на партнерството во областа на снабдување на гас, што биле искажани во досегашната комуникација меѓу двете држави.

- Тој потенцираше дека за нас многу е важно да обезбедиме долгорочни договори за снабдување со гас, како и потенцијални инвестиции во гасната инфраструктура во Македонија, посочуваат од Собранието.

Министерот Шахбазов најавил дека веќе се разгледуваат можностите за зголемување на соработката со Македонија во делот на снабдувањето со природен гас и најавил дека на почетокот на есента оваа година планира да ја посети нашата држава.

На состанокот присуствуваа и пратениците Петар Марков, претседател на Пратеничката група за соработка со Азербејџан, пратеничката Имрлије Салиу-Фетаи, како и генералната секретарка на Собранието, Марина Димовска.