Култура

47. издание на ИФФК „Браќа Манаки“ од 19-25 септември

Лауреат на наградата Златна камера 300 е данскиот кинематографер Дан Лаустсен.

-ИФФК „Браќа Манаки“ е еден од најзначајните проекти на Друштвото на филмски работници. 47. издание за нас претставува особена чест и задоволство што повторно го организираме, но претставува и огромна одговорност затоа што ИФФК „Браќа Манаки“ е еден од најзначајните фестивали во нашата земја и низ годините успеавме да изградиме бренд по кој сме препознатливи во светот, рече денеска Марија Димитрова, претседателка на Друштвото на филмски работници.

Димитрова посочи дека ИФФК „Браќа Манаки“ е мошне значаен за филмаџиите затоа што им дава можност да се сретнат, да комуницираат и да се запознаат со најголемите директори на камера на денешницата, како Дариус Конџи, Роџер Дикенс и многу други врвни кинематографери.

-Фестивалот на филмаџиите исто така им дава можност да ги претставиме нашите филмови пред светот, но и пред домашната јавност и сигурна сум дека и годинава ќе имаме значајни македонски филмови кои ќе бидат дел од селекцијата, истакна Димитрова и упати благодарност до Агенцијата за филм како најголем поддржувач на ИФФК „Браќа Манаки“ со чија поддршка се организира фестивал од светски размери.

Димитрија Доксевски, директорот на ИФФК „Браќа Манаки“ рече дека 47.издание на фестивалот според бројките и статистиките до денес претставува најамбициозно издание досега.

-Среќен сум што достоинствено се доближуваме до 50. издание и што фестивалот расте од година во година и станува еден од најзначајните фестивали не само во регионот, туку и во светот. Во прилог на ова би сакал да посочам дека оскаровецот Воли Фистер кој минатата година беше наш лауреат, годинава се враќа повторно во Битола и ќе биде член на жирито, рече Доксевски.

Доксевски го соопшти лауреатот на наградата Златна камера 300- визуелниот гениј на Холивуд, Дан Лаустсен (Dan Laustsen).

-Од 19 до 25 септември, Битола ќе биде домаќин на светската филмска елита предводена од еден од најголемите визуелни магнати на денешницата. Двапати номиниран за Оскар, но дефинитивно број еден во срцата на љубителите на вистинскиот филмски спектакл. Лаустсен е дански директор на фотографија чија четиридецениска кариера остави длабок белег во современата светска кинематографија. Како активен член на Американската асоцијација на кинематографи (ASC) и Данската асоцијација на кинематографи (DFF), Лаустсен е препознатлив по својот специфичен визуелен јазик, кој успешно ги спојува европската уметничка сензибилност и холивудската техничка прецизност, информираше Доксевски.

Роден на 15 јуни 1954 година во Олборг, Данска, Лаустсен го започнува својот формален уметнички пат студирајќи модна фотографија. Набрзо го пренасочува својот интерес кон подвижните слики и дипломира на Националната филмска школа во Данска во 1979 година. Неговите рани ангажмани во скандинавската кинематографија му носат критичко признание и ја поставуваат основата за неговиот препознатлив стил - фокус на длабока атмосфера, висок констраст и стратешка употреба на светлината.

Глобалниот успех на Лаустсен во голема мера е резултат на неговите долгогодишни партнерства со истакнати холивудски автори, како: Гиљермо дел Торо и Чад Стахелски.

Соработката со Гиљермо дел Торо резултираше со некои од визуелно највпечатливите филмови на 21 век: „Обликот на водата“ (The Shape of Water, 2017), „Алејата на кошмарите“ (Nightmare Alley, 2021) и „Франкенштајн“ (2025).

Во творештвото на Чад Стахелски, Лаустсен е визуелниот архитект на култната акциона франшиза „Џон Вик“ (John Wick), поточно на второто, третото и четвртото продолжение, каде ги редефинираше стандардите за снимање на комплексна акција и неонска естетика.

За својот исклучителен придонес, Лаустсен е повеќекратен добитник на меѓународни награди. Номиниран е за Оскар за филмовите „Обликот на водата“ и „Алејата на кошмарите“.

Неговата способност да ги трансформира наративите во уникатни визуелни искуства го позиционира меѓу највлијателните кинематографи на денешницата, а македонската публика и филмските професионалци ќе имаат ретка и ексклузивна можност да застанат очи в очи со легендата.

Во однос на програмата Доксевски рече дека годинава има рекордна бројка на пријавени филмови-повеќе од 600 филмови, што е првпат во историјата на фестивалот, како и работилници со студенти од земјава и странство со еминентен директор на фотографија од Белгија, но и со Марија Џиџева и Фејми Даут, работилница поврзана со програмата Еразмус итн.

Директорот на Агенцијата за филм, Сашко Потер Мицевски истакна дека со големо задоволство ја продолжуваат соработката со ИФФК „Браќа Манаки“.

-Годинава фестивалот доби зголемена поддршка од Агенцијата за филм во износ од 12 милиони денари, за разлика од минатата година кога поддршката изнесуваше 9. милиони денари. Агенцијата за филм верува во брендот што го изгради Друштвото на филмски работници заедно со сите директори на фестивалот на „Браќа Манаки“. Секако голем успех е што фестивалот доби награда од Британската асоцијација на кинематографери во Англија каде членуваат голем број од светските кинематографери кои доаѓаат и го следат нашиот фестивал, рече Мицевски и посочи дека како Агенција за филм се гордеат со ИФФК „Браќа Манаки“, кој е исклучителен бренд што ги обединува Агенцијата за филм и Друштвото на филмски работници, Кинотека и Град Битола.

Тагови: Браќа Манаки

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

И Здравје и Работа: Државата треба да го слуша стручниот глас за „Иловица Штука“

Во последните години сведоци сме дека секоја јавна расправа за рударството, а особено за проектот „Иловица – Штука“, сè почесто се претвора во натпревар кој погласно ќе зборува, наместо кој ќе понуди повеќе факти!

Веруваме дека е време ова прашање конечно да се врати таму каде што припаѓа – кај науката, експертите и институциите. Кога се одлучува за проекти што влијаат врз животната средина, здравјето на граѓаните, економијата и иднината на државата, пресудни треба да бидат фактите, стручноста и законите, а не гласните ставови без стручна основа.

Даваме целосна поддршка на универзитетските професори и експерти кои јавно ги презентираа своите стручни ставови за современите рударски технологии и проектот „Иловица – Штука“. Во демократско општество, научната аргументација мора да биде охрабрена и почитувана, а не замолчувана преку притисоци и дискредитации.

Во современите демократии, одлуките за вакви проекти се носат врз основа на научни анализи, експертски мислења, законски процедури и независни институции. Денешното рударство е суштински различно од она од минатото. Напредокот на науката и технологијата овозможува далеку повисоко ниво на еколошка контрола, управување со ризици и заштита на животната средина. Затоа, секој проект треба да се оценува според конкретните решенија и стандарди што ги применува, а не според застарени претстави и искуства.

За „Иловица – Штука“, надлежните институции треба темелно да ги разгледаат сите стручни анализи, Студијата за оцена на влијанието врз животната средина и законските критериуми. Ако проектот не ги исполнува условите, не треба да добие одобрение. Но доколку ги исполнува највисоките технички, законски и еколошки стандарди, тогаш заслужува поддршка и фер можност за реализација.

Истовремено, не смее да се занемари неговиот развоен потенцијал. Македонија има потреба од нови инвестиции, нови работни места и посилен економски раст. Проектот „Иловица – Штука“ може да донесе значајни економски придобивки, нови можности за домашните компании и поттик за развојот на југоисточниот регион. Во време кога државата се соочува со иселување на младите и недостиг од инвестиции, секоја сериозна развојна шанса заслужува објективна и професионална оценка.

Затоа ги повикуваме Владата и надлежните институции да продолжат да одлучуваат врз основа на науката, стручноста и законите. Само така ќе обезбедиме и висока заштита на животната средина и здравјето на граѓаните, но и ќе го искористиме природниот потенцијал на Македонија за повисок животен стандард, економски напредок и посигурна иднина за младите генерации.

се вели во соопштението на „И здравје И работа“

Технологија

Компјутерите стануваат поскапи, продажбата опаѓа: Еве кој профитира најмногу

Глобалните испораки на персонални компјутери се намалија за речиси 5 проценти на 68,2 милиони единици, според истражувачката фирма „IDC“.

Ова е прв пад за две години и доаѓа по девет последователни квартали раст. Сè започна кон крајот на 2025 година. Тоа е приближно времето кога глобалната криза со меморијата се претвори од обична пречка во целосен колапс.

Секој што воопшто ја следи технолошката индустрија веќе ја знае причината за падот. Тоа е недостаток на меморија предизвикан од експанзијата на вештачката интелигенција (ВИ), за која „IDC“ вели дека нема да заврши до 2028 година. Тоа доведе до скок на цените низ целата индустрија и пошироко.

Сепак, постои уште еден пресврт во оваа приказна. „IDC“, исто така, известува дека приходите на производителите на персонални компјутери сè уште растат затоа што „продавачите ги зголемуваат цените побрзо отколку што побарувачката опаѓа“. Тежиштето на оваа криза со меморијата го носат клиентите, а не компаниите.

„Вистинската приказна овде е јазот помеѓу продадените единици и заработените пари: испораките опаѓаат, но приходите растат“, рече Џитеш Убрани, истражувач во „IDC“. „Производителите се подготвуваат за повеќе зголемувања на цените што ги очекуваат во 2027 година.“

Убрани, исто така, очекува уште поостар пад подоцна во годината, бидејќи тековните залихи почнуваат да се намалуваат, а потрошувачите се погодени од нови зголемувања на цените. Тој предупредува дека ова би можело сериозно да го забави вообичаениот циклус на замена и надградба на компјутери.

Сепак, постои една компанија која не само што ја издржа оваа бура, туку всушност виде раст на испораките на компјутери. Тоа е „Apple“, а заслугата за тоа му припаѓа на неверојатно популарниот модел „MacBook Neo“. Компанијата испорача 800.000 компјутери повеќе во овој квартал во споредба со истиот квартал во 2025 година, зголемувајќи го својот пазарен удел на речиси десет проценти, од 8,5 проценти во претходниот квартал.

Секако, „Apple“ не е имун на зголемувањето на цените на меморијата, па затоа најновото зголемување на цената би можело малку да ја намали вредноста на „Neo“. Почетната цена на овој „MacBook“ скокна од 600 на 700 долари. Но, другите компјутери на „Apple“ беа погодени многу повеќе. Основниот „MacBook Air“ сега чини 1.300 долари.

„Понудата е мала во време кога потрошувачите сакаат уреди, а производителите на меморија ни наплаќаат огромни зголемувања на цените“, неодамна изјави извршниот директор во заминување Тим Кук. „Секако треба да ги вратиме цените на меморијата и понудата на разумно ниво за производите за широка потрошувачка.“ Значи, тие производители на меморија ги зголемија своите цени, а „Apple“ го стори истото за потрошувачите.

Патем, „Apple“ неодамна објави дека има 68,5 милијарди долари во последниот квартал, што е зголемување од 41 процент во однос на претходната година. Компанијата моментално е проценета на повеќе од 4,6 трилиони долари, пишува Б92.

Фото: ВИ

Тагови: компјутери

Македонија

Ѓорѓиевски: Трајно се санира големиот дефект на булеварот „Борис Трајковски“

Трајно се санира големиот дефект на булеварот „Борис Трајковски“ - по три години привремени решенија.

[📍] Денес, на булеварот „Борис Трајковски“, во близина на бензинската станица „ЛукОил“, екипите на ЈП „Водовод и канализација“ работат на целосна санација на сериозен дефект кој со години претставуваше проблем за жителите на Пинтија, Усје, Долно Лисиче, Драчево, Батинци, Студеничани и Зелениково.

[🫵] Станува збор за оштетување на водоводна цевка Ф600, настанато при градежни активности пред три години.

Наместо трајно решение, дефектот досега бил саниран само привремено, поради што проблемот постојано се повторувал.

[💧] Со денешниот зафат се врши целосна замена на оштетениот дел од цевката во должина од пет метри, со што конечно се обезбедува сигурно, квалитетно и долгорочно решение, пред изградбата на булеварот ,,Борис Трајковски”.

[♥️] Им благодариме на граѓаните за трпението и разбирањето во текот на интервенцијата.

[🫡] Посебна благодарност до екипите на ЈП „Водовод и канализација“, кои со максимална посветеност и ангажман работат овој тригодишен проблем уште денес да стане минато.

[✔️] Решаваме темелно и трајно!- објави градоначалникот на Град Скопје, Орце Ѓорѓиевски.

Тагови: Орце Ѓорѓиевски