Работната група ги разгледала притигнатите 166 предлози на 29 институции и 38-те што ги селектирала ги исполнувале критериумите за значајност и критериумот временски интервал.

Меѓу јубилеите за настани кои се предлага да бидат одбележани идната година, се 70 години од: кодификација на македонскиот јазик и усвојување на македонскиот правопис; завршувањето на Втората светска војна; Првиот црковно-народен собор за возобновување на МПЦ; формирањето на првата народна Влада на ДФМ (на Трето заседание на АСНОМ); формирање на Македонскиот народен театар; објавување на првиот број на весникот „Флака е влазеримит“ и од првото основно училиште на албански јазик „Лирија“ во Скопје. Во годишнините за настани се предлагаат и: 90 години од објавувањето на Абецедарот, 110 години од излегувањето на весникот „Македонија“, 110 години од масакрот во прилепското село Загоричани, 50 години од објавувањето на Историјата на македонскиот јазик од Блаже Конески.

Во јубилеите за значајни личности, меѓу другите, се предлагаат 110 години од смртта на Никола Карев, Александар Турунџев и Христо Узунов, 150 години од раѓањето на Ѓорче Петров и 175 на Димитар Поп Георгиев Беровски, 100 години од загинувањето на Јане Сандански, еден век од раѓањето на Мирче Ацев, Антон Попов, Кузман Јосифовски-Питу и Венко Марковски, 90 години од раѓањето на Кирил Македонски и на Властимир Николовски и исто толку од смртта на Тодор Паница, 500 години од мачеништвото на св. Ѓорѓи Кратовски, 40 годни од смртта на Ристо Крле...

Од албанската заедница за одбележување се предложени 275 години од раѓањето на Али-паша Тепелена, 150 години од раѓањето ан Ибрахим Темо, 80 години од раѓањето ан Али Вишко, 50 години од смртта на Фан Ноли, 20 години од смртта на Антон Чета и 10 години од смртта на Мурат Исаку...
Носители на одбележувањето на годишнините во наредната година ќе бидат државни и локални институции.

Членови на работната група што ги селектираше предлозите посочи дека предлог-програмата е избалансирана, но нема предлози од други етнички заедници - турската, ромската, влашката.

И оваа година институциите не биле ажурни да одговорат на повикот за доставување предлози, не пратиле предлог, а повеќето (освен пет) не ни одговориле дека немаат предлог за годишнина во 2015 година.

Претседателката на Комисијата Силвана Бонева рече дека пратиле дописи до 120 институции, а одговори добиле од 29, и покрај рокот од два месеца кој им бил даден. Членовите се согласија дека Македонија има можност да направи многу побогата програма на настани и личности, но дека таа зависи од институциите кои од година во година се повеќе затајуваат.

На денешната седница беа поддржани во прво читање и Предлог-законот за издавачката дејност и Предлог-законот за изменување и дополнување на Законот за заштита на културното наследство. Нив ги образложи заменик-министерот за култура Драган Недељковиќ. Тие донесуваат многу измени во постојните закони со кои се дорегулираат овие две области.

Во Предлог-законот за заштита на културното наследство, на пример, новини се: археолошки катастар, согласност од Управа за заштита на културно наследство при трансформација на земјоделско во градежно земјиште, измени во условите за стручен раководител на археолошки истражувања (се предлага едно лице веќе да не може да биде стручен раководител на две или повеќе археолошки истражувања) итн...

Поради значајноста на двата предлог-закона и за да се слушне ставот на експертите, за нив Комисијата за култура ќе организира одделни јавни расправи.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.