На Матурската парада 2013 учествуваа средношколци од вкупно 19 скопски училишта, како и матурантите од Куманово, Струмица, Гевгелија, Охрид и Струга. Сите девојки носеа жолти маички, а момчињата темно сини.
- Европската унија, вашиот иден дом, е како овој танц, сите различни, а сепак исти, рече евроамбасадорот Аиво Орав, поздравувајќи ги матурантите.
Зорица Стаменковска од Агенцијата за млади и спорт изрази задоволство од огромниот број матуранти, учесници на парадата, кои, како што рече, годинава ќе успеат да влезат во Гинисовата книга на рекорди.
- Верувајте во себе, инспирирајте ги луѓето околу вас, не престанувајте да ги реализирате своите соништа, желби и замисли, им порача Стаменковска на средношколците.
Собирањето и подготовките на матурантите за парадата почна во 9 часот. Пред официјалниот дел тие продефилираа низ центарот на Скопје. Од градскиот плоштад продолжија да се движат по кејот „13 Ноември“, пред хотелот „Холидеј ин“ и паркот „Жена борец“, а потоа поминаа и низ портата „Македонија“.
Покровители на манифестацијата се Град Скопје и Агенцијата за млади и спорт, поддржувач е Делегацијата на ЕУ во Македонија, а за организацијата се погрижија Дирекцијата за култура и уметност - Скопје и танцовиот клуб „Ритам плус“.
Според идејата на организаторите, со матурантите на градскиот плоштад излегоа и матурантите од 1963 година кои одбележуваат пет децении од својата матура. /МИА