Вакви потресувачки сеќавања од ноќта кога се случи трагедијата со пожарот во дискотеката Пулс во Кочани раскажа првиот сведок во судската постапка за случајот. Дејан Николов, како сведок на обвинителството одговараше на прашања пред судот. Ноќта на 16 март со неговиот син бил на концертот на ДНК, излегле надвор пред да избувне пожарот и биле во близина на објектот.

„Забележав дека снема струја и тогаш настанаа големи врисоци, страшни беа и почна силен дим да излегува од предниот дел. Од женското ВЦ видов дека вентилаторот не работеше, излегуваше црн чад. Децата ги фати паника. Првин почнав да прскам со цревото во вентилаторот. И тогаш слушнав гласови и тропање. Со решетки беше тој прозор, до него имаше уште еден прозор, кој беше заграден. Потоа ги скршивме прозорците а на самите решетки се фатија девојчиња, плачеа, врескаа, се обидов да ги смирам и одлучив да ги прскам со вода. Син ми до мене стоеше и цело време велеше „Те молам тато спаси ги“, ја велев дека ќе дојде противпожарна. Побараа, „Чичко прскај, полесно така дишеме“. Пожарникарите потоа брзо дојдоа.“

Родителите на загинатите низ солзи го слушаа ова сведочење. Тие претходно изразија сомнеж дека обдукциските наоди за причините за смртта се нецелосни и бараат дополнителни токсиколошки анализи. Пред стартот на судското рочиште, рекоа дека институциите потврдиле можност за присуство на цијанидни гасови во просторот, но не било испитано дали го имало и во телата на жртвите.

„Дали при обдукциите е направена конкретна токсиколошка анализа за цијанид и други отровни гасови во телата на нашите починати деца. Во обдукциските наоди како причина за смрт е наведено задушување од јаглерод моноксид, меѓутоа во самиот обдукциски наод јасно се наведува дека од телата се земени и крв и урина за одредување на јаглерод моноксид, како и за токсиколошката анализа, при што изрично стои дека останатите токсиколошки анализи ќе бидат дополнително доставени на семејствата.“

Ова следува по истражувањето на ИРЛ според кое детали од обдукциските наоди откриваат дека возможно е смртта да насапила како резултат на труење со цијановодород што се ослободува кога гори полиуретански сунѓер. Од Обвинителството велат дека причината за смртта на секој од починатите е неспорно утврдена и за најголемиот дел од нив таа е резултат на задушување од отровни гасови, а во обдукциските наоди е наведено дека станува збор за комбинација од јаглерод моноксид и други отровни гасови.

„Вештачењата на Институтот за хемија и анализата на МВР-ОФИ врз примероци од сите материјали вградени во клубот и начинот на нивно согорување ја потврдија веројатноста за испуштање на цијанидни гасови како последица на пожарот. „Во конкретниот случај кај починатите се констатирани, покрај присуство на карбоксихемоглобин, цијаниди и термички оштетувања на лигавицата од дишните патишта“, стои во дополнителното произнесување од Институтот за судска медицина, кој е дел од доказниот материјал. Исто така, на самото судење вешто лице од Институтот во детали ќе се произнесе за сите овие околности.“...велат од Обвинителството и додаваат дека не постои причина за дополнителна обдукција или ексхумација на починатите.

Воведни зборови на денешното рочиште дадоа и Александар Нацев, сопственикот на Рубикон, агенцијата која го обезбедувала Пулс и претставниците на останатите обвинети фирми. Нацев тврдеше дека вината била префрлена на него со цел да се скрие одговорноста на институциите. За фирмата пак која раководела со дискотеката обвинението е нејасно и без конкретно наведени дејствија.

„Пренасочувањето на одговорноста која ја имаат државните органи задолжени за превенција, надзор и контрола кон припадниците на обезбедувањето е само уште еден чекор за префрлање на вината.“

„За да се цени дали постои одговорност кај правното лице треба да постои раздвојување, односно точно определени одговорни лица и временска јасност.“

Следно рочиште е закажано за 29 декември за кога се очекува сведочења на раодителите.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.