Свет

Столчето на Орбан на самитот на лидерите на ЕПП во Брисел остана празно

Коментарот на Јункер од пред четири години на Самитот во Рига, веројатно најдобро го отсликува она што се случува денес.

Прв пат по девет години, столчето на унгарскиот премиер Орбан на Самитот на лидерите на ЕПП во Брисел остана празно, откако вчера неговата Фидес беше суспендирана од најголемата политичка партија во Европскиот парламент. Членството на Фидес останува замрзнато на неопределно време, партијата ќе биде под надзор на три член тим, кој во иднина ќе одлучи дали Орбан го подобрил антиевропското поведение, од што ќе зависи и дали ќе се врати во друштвото на десниот блок.

-Практично, тоа значи дека Фидес нема да може да кандидира лица за слободни позиции во партијата, нема да можат да гласаат на состаноците и нема да присуствуваат на средбите. Додека суспензијата е на сила, Фидес нема да има никакво влијание врз политиките на ЕПП, изјави Манфред Вебер, лидер на пратеничката група на ЕПП

И покрај тоа што суспензијата е јасен политички пораз, Орбан се обиде да ја ублажи тежината и рече дека доброволно го ставил членството во мирување.

-Во мојата десна рака за време на состанокот имав писмо каде што веќе беше кажано дека ќе заминеме. Значи, ако го немавме овој компромисен предлог, денеска ќе заминев од Европската народна партија, изјави Виктор Орбан, премиер на Унгарија

Одлуката синоќа беше донесена со 190 гласа „за“ и 3 против. Од сестринската ВМРО-ДПМНЕ, која традиционално има добри односи со „Фидес“, експлицитно не потврдуваат дали застанеле зад мнозинството да се суспендира партијата на Орбан.

-Најдобро ќе биде да причекаме денеска, утре да се врати делегацијата и ќе ви дадеме одговор на сите прашања и точно за што се гласало. Веќе пуштивме соопштение и наведовме детално за што се разговарало, вели Владо Мисајловски, потпретседател на ВМРО-ДПМНЕ

Во вчерашното соопштение на ВМРО-ДПМНЕ се вели дека делегацијата на партијата, која присуствувала на Парламентарното Собрание на ЕПП, го поддржала компромисот, според кој, посебна Комисија треба да ја мониторира имплементацијата на забелешките на ЕпП и да ги утврди фактите.

Свет

Хаос на аеродромите во Британија: Заглавени илјадници патници поради компјутерска грешка(ВИДЕО)

Аеродромите низ Велика Британија се во хаос откако сите порти беа затворени поради компјутерска грешка кај граничните служби.

Сликите на социјалните мрежи покажуваат огромни редици пред портите додека илјадници луѓе чекаат да им ги проверат пасошите, пишува Дејли мејл.

Се шират гласини дека Хитроу не е единствениот аеродром погоден од наводната грешка, туку и Манчестер и Гетвик.

Персоналот на Хитроу, наводно, им рекол на патниците дека ова е национален проблем.

Една патничка изјавила за Дејли Мејл дека чекала во ред цел час, а персоналот на аеродромот почнал да дели вода.

Таа додаде дека на луѓето им било кажано дека аеродромот работи на алтернатива за проверка на документите на патниците.

Свет

Хамас планира да предаде 33 заложници, некои од нив се мртви

Хамас планира да ги предаде останките на неколку заложници кои се меѓу 33-те за кои велат дека ќе бидат ослободени во првата фаза од предложениот договор за прекин на огнот.

Во извештајот, во кој се цитираат две лица блиски до преговорите за договорот, се вели дека Хамас ги информирал посредниците дека не се сите живи оние што требаше да бидат ослободени, пишува Њујорк Тајмс.

Се очекуваше во првата фаза да бидат ослободени жени, деца, стари и болни лица, потсетуваат израелските медиуми.

Израел претходно инсистираше да се ослободат само живите заложници во таа фаза и се согласиле со помалку од 40-те луѓе што првично ги барале, со разбирање дека сите што требало да бидат ослободени се живи. Хамас синоќа соопшти дека го прифатиле договорот предложен од посредниците. Израел, пак, оцени дека договорот е многу различен од она на што се согласила земјата.

Претставници на Хамас рекоа дека првата фаза од договорот ќе вклучува 42-дневно примирје и ќе ослободат 33 израелски заложници во замена за голем број палестински затвореници кои се чуваат во израелските затвори.

Кабинетот на израелскиот премиер Бенјамин Нетанјаху оцени дека понудата на Хамас не ги исполнува основните израелски барања, но најави дека ќе испрати преговарачи да продолжат со преговорите со американските, египетските и катарските посредници.

Се верува дека уште 128 заложници се држат во Газа, од околу 250 киднапирани во нападите на палестинските екстремисти предводени од Хамас на 7 октомври минатата година, но не се знае дека сите се живи. За време на еднонеделниот прекин на огнот на крајот на ноември минатата година беа ослободени сто и пет цивили, а пред тоа четворица.

Тројца живи заложници беа ослободени од војниците, а телата на 12 од нив беа пронајдени, меѓу кои и тројца кои војниците по грешка ги убиле.

Израелската војска ја потврди смртта на 35 заложници кои сè уште ги држи Хамас, повикувајќи се на нови разузнавачки информации од војниците кои дејствуваат во Газа.

Свет

Австралискиот превозник Квантас продавал билети на откажани летови- 100 милиони долари казна

Qantas постигнал договор со австралиската влада за надзор на потрошувачите да плати повеќе од 60 милиони долари казни за продажба на билети на откажани летови.

Превозникот, исто така, се обврзал на дополнителна компензација за патниците на кои им продавале билети за „непостоечки“ летови.

Qantas и Австралиската комисија за конкуренција и потрошувачи (ACCC) спогодбено ги решија судските постапки кои се во тек од август минатата година. ACCC започнале правна битка против Qantas за рекламирање и продажба на билети за летови откажани од авиокомпанијата.

Комисијата тврди дека Qantas продал билети за повеќе од 8.000 летови помеѓу мај и јули 2022 година, во просек две недели, а во некои случаи и 47 дена по нивното откажување, пренесува Aero Time.

Најголемата австралиска авиокомпанија во октомври минатата година соопшти дека биле направени одредени грешки, но дека ACCC „ја игнорира реалноста на авиоиндустријата“. Авиокомпанијата ги отфрли тврдењата дека продавала билети за т.н. непостоечки летови.

По неколку месеци расправија, двете страни конечно постигнаа пријателско решение. Qantas вчера објави дека се согласиле да платат 100 милиони австралиски долари или 66 милиони американски долари казна.

Превозникот ќе им исплати и надомест на патниците во износ од 225 до 450 австралиски долари (150 до 300 американски долари) покрај парите што веќе им ги вратиле за откажаните летови. Во соопштението на Qantas се вели дека компензација во вкупна вредност од 13 милиони долари ќе биде исплатена на повеќе од 86.000 патници.

Извршниот директор на Qantas Group, Ванеса Хадсон, им се извинила на патниците чие „известување за откажување на летот не пристигнало навреме“, признавајќи дека авиокомпанијата не обезбедила соодветна поддршка на патниците.

притисни ентер