Менопаузата е процес кој може да трае неколку години и е проследен со различни симптоми. Најчесто тоа се топлите бранови кои се појавуваат нагло и нагло престануваат, а покрај нив се јавуваат и промени во расположенито, промени на кожата, опаѓање на косата или намалување на волуменот, будење во текот на ноќта...
Д-р Тавина Банот од Велика Британија вели дека симптомите на менопаузата можат да се заменат со други состојби, на пример, ендокрини проблеми како хипотироидизам, но тука се вбројуваат и депресијата и фибромијалгијата.
- Менопаузата може да го зафати секој орган во телото и затоа е неопходно жената штом ќе влезе во овој период редовно да оди на прегледи - истакнува д-р Банот.
Д-р Сара Бревер исто така ги истакнува и следниве состојби: анксиозност, промени во расположението, „замаглување“ на мозокот, тешкотии при концентрација, промени во либидото, болки во зглобовите, пречки при варењето, дијареа, како и сува кожа и коса.
Еве кои шест состојби ги наведува таа за британски „Сан, а чии симптоми може да се поврзат со менопаузата, но всушност, може да се работи за болести за кои е потребно итно лекување.
1. Проблеми со тироидната жлезда
Кога тироидната жлезда лачи премногу хормони, таа го забрзува метаболизмот, што може да доведе до анксиозност, раздразливост, замор, несоница, чувствителност на топлина, потење, дијареа и менструални проблеми.
Од друга страна, неактивната тироидна жлезда може да предизвика зголемување на телесната тежина, замор и лошо расположение. Симптомите вклучуваат мускулни грчеви, болка и слабост, болки во зглобовите, сува кожа, кршлива коса, запек, обилни менструации, лоша концентрација и меморија.
2. Нарушено ментално здравје
Вообичаено е жените да доживуваат променливо расположение, раздразливост и анксиозност за време на менопаузата. Но, општите лекари не секогаш ги препознаваат овие симптоми како дел од некоја друга болест, т.е. честопати ги поврзуваат со менопаузата, иако можно е да се работи за нарушено ментално здравје, па затоа е потребно посебно да се обрати внимание на нив.
3. Мултиплекс склероза
Оваа болест обично се дијагностицира на возраст од 20 до 50 години и е една од најчестите причини за инвалидитет кај помладите луѓе.
Тоа се случува кога имунолошкиот систем го напаѓа мозокот или 'рбетниот мозок, а повторените епизоди на воспаление предизвикуваат губење на изолационата миелинска обвивка која ги опкружува нервите во мозокот и рбетниот мозок. Како последица се јавуваат следните симптоми: замор, проблеми со размислувањето и контрола на мочниот меур.
Малку е веројатно дека мултиплекс склерозата ќе биде погрешно дијагностицирана како менопауза. Сепак, можно е неспецифичните симптоми првично да бидат отфрлени како такви, велат експертите.
4. Рак
И менопаузата и ракот предизвикуваат широк спектар на симптоми, од кои многу се преклопуваат. Ноќното потење, на пример, се смета за еден од најчестите симптоми на ракот. Исто така, се јавува кај околу 60 проценти од жените кои се во менопауза. Не треба да се заборави дека различните видови рак можат да дадат различни симптоми, во зависност од тоа каде се наоѓаат. Ракот често се поврзува со замор и губење на енергијата, а некои видови на рак може да предизвикаат црвенило и потење.
Сепак, д-р Брајер како симптом кој е специфичен за ракот го наведува необјаснивото губење на тежина.
5. Деменција
Многу жени кои минуваат низ менопауза велат дека почнуваат да стануваат дементни, односно ја губат меморијата. Мозочната магла е симптом кој се јавува кај 68 проценти од жените во менопауза.
Деменцијата честопати погрешно се поврзува со староста. Раните симптоми на деменција не се препознаваат секогаш кај помладите луѓе и може да се припишат на други причини како стресот, депресијата, менопаузата, а тоа доведува до нејзино одложено дијагностицирање, велат експертите.
6. Фибромијалгија
Како и менопаузата, фибромијалгијата се јавува пред 55-тата година и е почеста кај жените. Оваа ревматолошка состојба може да се маскира под менопаузата, а вклучува болни зглобови, замор и недостаток на концентрација. Иако точната причина за фибромијалгијата е непозната, се смета дека таа е поврзана со абнормални нивоа на одредени хемикалии во мозокот и промени во начинот на кој централниот нервен систем ги обработува пораките за болка што се пренесуваат низ телото.
Поради сето наведено, многу е важно секоја жена која влегува во менопауза редовно да оди на лекарски прегледи и да му го сврти вниманието на својот матичен лекар на секој симптом што ќе го почувствува, за да може тој да ја упати кај специјалист.