Почитувани црвени и сини! На праг ли сме да останеме вечен кандидат за членство во ЕУ, или не сме толку „луди“ да чекаме? Кој барем со мислите се сели во правна држава, земја каде се дише со полни гради, каде изборите се редовни, а политичката борба не се води со пукање бомби за противникот? Далечна ли е оваа посакувана реалност или секојдневието маестрално ни се наметна како логичен одговор на потезите на државниците? За изборите, политиката, судството, но глумата, книгите и суетите вечерва во „Само интервју“ со Гоце Михајлоски одговори бараме од актерот и борец за правичност, Сашо Тасевски.

Во пресрет на денот кога Лондон и Брисел ќе стават крај на врската, Скопје молчешкум, помалку и срамежливо, се надева на нови позитивни расплети. Во кого бара виновник Македонецот и како ќе суди на 12 април? Дали е доволно задоволен барем со НАТО, една од двете стратешки цели.

Остануваат ли функционерите од Скопје и Софија на „љубави“, откако Бугарите категорично ни го отфрлија јазикот. Дали бугарскиот амбасадор во земјава ни ја запечати судбината и потврди дека напредок кон ЕУ ќе има само со корекција на историјата и јазикот.

Но, остануваат ли во втор план интеграциите за обичниот граѓанин, кој само се обидува што подолго да ја испружи чергата. Некому успева, иако зачестува по обвинителствата. Истрагата за Рекет не се шири, но се одврзува клопчето на Меѓународниот сојуз, ќе испливаат ли нови детали, нови астрономски суми кеш и ќе се дознае ли има ли замешателство на веќе подзаборавените Кики и Фрики.

За вечните очекувања надежта последна умира, но кој ќе ја преземе вината или во огледалото се појавува одразот на власта. Дали СДСМ ќе може да очекува поддршка од неопределените? И веруваат ли разочараните шарени револуционери на власта дека опозицијата е виновна за се и ги кочи во работата. Плативме ли превисока цена со Договорите за она што за возврат го очекувавме, како да се биде успешен политичар а воедно да се остане принципиелен, дали спектаклот „Северно од Македонија“ на Сашо Тасевски ја прикажува болната слика на општеството, дебатираме во вечерашното „Само интервју“.