Три извори запознаени со инцидентот изјавија за Гардијан дека бомбата експлодирала околу 9 часот наутро во вторник во станбена зграда во населбата Књазе-Волконское-1, каде што живее генерал-мајор Азатбек Омурбеков, кој командувал со руските сили за време на окупацијата на Буча.

Според два извори, напаѓачот поставил експлозив во поштенско сандаче помеѓу првиот и вториот кат и инсталирал камера. Подредениот офицер бил убиен во експлозијата, додека Омурбеков не бил повреден.

Русија и Украина засега немаат коментари

Европската унија воведе санкции против Омурбеков за неговата улога во масакрот врз цивилите во украинскиот град Буча, каде што руските сили се обвинети за убиство на повеќе од 400 цивили.

Ниту Русија ниту Украина не коментираа за атентатот. Украинските разузнавачки служби од почетокот на војната се насочени кон десетици високи руски воени офицери и функционери што Москва ги поставила на окупираните територии, обвинувајќи ги за воени злосторства.

Анонимниот Телеграм канал VChK-OGPU, за кој се вели дека има врски со руските безбедносни служби, објави во вторник вечерта дека Омурбеков бил цел на нападот и дека во експлозијата загинал потполковник идентификуван само по неговото презиме Кузменко.

Населба изградена околу воена база

Извори велат дека станбената зграда каде што живее Омурбеков, која главно ја користат воени функционери, е оградена и под надзор, а војската патролира низ областа.

Књазе-Волконское-1 е мала воена населба на периферијата на Хабаровск, на далечниот исток на Русија, близу до кинеската граница. За разлика од цивилните градови, тоа е гарнизонска заедница изградена околу воена база, со контролирани влезови и задолжителни дозволи за влез за секој што не живее таму.

Многу малку се знае за тајните украински мрежи зад атентати и напади врз воена инфраструктура во Русија и на окупираните територии.

Се верува дека Украина е одговорна и за обидот за атентат во февруари врз генерал-потполковник Владимир Алексеев, висок руски воен функционер со клучна улога во разузнавачките служби. Тој беше застрелан од непознат напаѓач во скалите на неговата зграда, но Алексеев го преживеа нападот.

Една од главните цели на украинското разузнавање

Профилот на Азатбек Омурбеков го прави една од главните цели на украинските разузнавачки служби.

За време на окупацијата на Буча во 2022 година, тој командуваше со 64-та моторизирана бригада на посебна гарда, елитна пешадиска единица, и се смета за еден од најбруталните команданти кои дејствувале таму.

На британскиот список со санкции се вели дека тој бил во „директна команда“ на силите вклучени во убивањето цивили. Во разговор за рускиот портал iStories, еден од неговите подредени од Буча рече дека командантот редовно наредувал убивање цивили, вклучително и напади врз возила што превезувале цивили.

Безбедносен пропуст

И покрај бројните докази, руските власти негираат дека нивните сили убиле цивили во Буча, а Владимир Путин му ја додели на Омурбеков титулата Херој на Руската Федерација, највисокото државно одликување, на тајна церемонија. Подоцна тој беше префрлен во 392-от округски центар за обука во Књазе-Волконское-1.

Иако нападот не ја погодил главната цел, фактот дека се случил во изолирана воена населба го покажува најновиот безбедносен пропуст на Руската Федерална служба за безбедност, според рускиот разузнавачки експерт Андреј Солдатов.

„Со оглед на огромните ресурси што ги има на располагање воената контраразузнавачка служба за заштита на персоналот, ова е безбедносен пропуст. Заштитата на воениот персонал долго време беше приоритет за ФСБ. Во воените области се назначуваат офицери кои се конкретно одговорни за нивната безбедност“, рече тој.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.