Здравје

Истражување: Скопјани со најголеми, а крушевчани со најмали можности за здравствена заштита

Драстично големи разлики помеѓу 30-те здравствени региони во земјава во однос на можностите за здравствена заштита, покажува последното истражување на Центарот за граѓански комуникации.

Крушевчани имаат најмалку можности за соодветна здравствена заштита, каде во целиот регион има само 10 лекари во единствениот здравствен дом во градот. На врвот на ранг-листата се наоѓаат поголемите градови, предничи Скопје, а на дното се помалите градови. Сепак, според Герман Филков од Центарот за граѓански комуникации недостигот на здравствени услуги повеќе или помалку е присутен секаде.

-Можеби малку грубо ќе звучи, но нема поштеден град, што значи нема поштедени жители. Во секој град има по некоја здравствена услуга која што недостига или тешко се остварува така што за нас беше изненадувачка оваа голема разлика меѓу градовите и нееднаквост на жителите односно не е сеедно дали живеете во Скопје или Крушево ако сакате да добиете некоја здравствена заштита.

Според Филков најпоразителни податоци од извештајот е недостатокот на медицински кадар ширум земјата, обемот на здравствената заштита на децата од 0 до 6 години во градовите. Ако во Виница една педијатриска служба посетуваат 129 деца, во големите градови како Охрид, Прилеп и Скопје во една служба има повеќе од 3000 деца. Поразителен е и фактот што во 3 градови во земјава нема гинеколог. Според извештајот во однос на бројот на жени кои посетуваат една гинеколошка служба, најлоша е состојбата во Прилеп каде една служба покрива и до 36.000 жени.

-Она што е најзапрепастувачки е што во 6 градови има ваква служба за деца на претшколска возраст од 0 до 6 години, меѓутоа немаат лекар во службата така што за ваква потреба за ваков преглед мораат да патуваат во некој соседен град. Исто така интересни бројки се и за служби за здравствена заштита на жена, односно за гинеколози. 3 града немаат воопшто ваква служба, меѓутоа има градови што имаат служба а немаат исто така гинеколози.

Филков потенцира дека препораките од ова истражување е да се направи изедначување на можноста на пружање здравствена заштита во секој град и да не се дозволи да има недостаток од основни лекарски служби како гинеколози и педијатри.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Вооружен напад во Гватемала: Пратеник им подлегна на повредите, убиени се и тројца полицајци

Гватемалски пратеник и тројца полицајци беа убиени во вооружен напад во источниот град Рио Хондо, изјави во понеделник претседателот на Гватемала, Бернардо Аревало.

Тој го осуди насилството и им нареди на безбедносните сили да помогнат во идентификувањето на одговорните, објави Ројтерс. Пратеникот Хулио Сезар Портиљо Паз беше нападнат во петокот во градот Рио Хондо и првично беше однесен во болница со сериозни повреди.

Неговата партија Национално единство на надежта (UNE) подоцна соопшти дека тој починал.

Убиствата се случија околу три недели откако поранешниот антикорупциски обвинител на Гватемала, Хуан Франциско Солорзано Фопа, беше застрелан во Гватемала Сити.

Властите сè уште не утврдиле врска помеѓу двата напада.

Тагови: Гватемала напад

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Метео

Утре променливо облачно време со температура до 15 степени

Времето утре ќе биде променливо облачно со сончеви периоди, информираат од УХМР.

МАКСИМАЛНА ТЕМПЕРАТУРА

5 Попова Шапка, 6 Крушево, 8 Маврови Анови, 11 Прилеп, Берово, Крива Паланка, Виница, Тетово, 12 Лазарополе, Претор, Скопје – Зајчев Рид, Кавадарци, Штип, 13 Битола, Велес, Охрид, Демир Капија, 14 Скопје – Петровец, Струмица, 15 Гевгелија.

ВРЕМЕТО ДЕНЕСКА И ДО КРАЈОТ НА ДЕНОТ

Променливо облачно со сончеви периоди. Дуваше слаб до умерен ветер од северен правец. До крајот на денот ќе се задржи променливо облачно време. Ќе дува слаб до умерен ветер од северен правец.

ВРЕМЕТО УТРЕ

Променливо облачно со краткотрајни сончеви периоди. Во попладневните часови и во текот на ноќта, во западните делови ќе има услови за појава на локален дожд, а на повисоките планини од слаб снег. Ќе дува слаб до умерен ветер од југоисточен правец. Минималната температура ќе биде во интервал од -2 до 6, а максималната ќе достигне од 9 до 15 степени.

Во Скопје, претпладне претежно сончево, во вечерните часови ќе има услови за појава на локален дожд. Ќе дува слаб до умерен ветер од променлив правец. Минималната температура ќе се спушти до -1, а максималната ќе достигне до 15 степени.

ВРЕМЕТО ВО НАРЕДНИТЕ ДЕНОВИ

Во понеделник времето ќе биде претежно облачно со повремени локални врнежи од дожд. Потоа од вторник ќе биде стабилно со променлива облачност во текот на денот, а во петок ќе има услови за појава на слаб локален дожд. Ќе дува слаб до умерен ветер од југоисточен правец.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

НБМ: Денеска „АЛТА банка“ АД Битола им изврши исплата на 360 граѓани од Прилеп, Охрид и Ресен

Денеска во филијалата на „АЛТА банка“ АД Битола во Битола им беа исплатени средства на 360 граѓани кои имаат платежни сметки во Банката, а не располагаат со платежни картички.

Исплатата се одвиваше во најдобар можен ред, со добра организација и непречено опслужување на граѓаните. Особено успешно беше реализиран организираниот превоз на клиентите на „АЛТА банка“ од Прилеп, Охрид и Ресен до филијалата во Битола и назад. Превозот се одвиваше според предвидениот распоред, а граѓаните од трите града имаа можност на полесен начин да пристапат до средствата на своите сметки.

Граѓаните кои денеска ги подигнаа средствата можеа да повлечат до 20.000 денари, во рамките на максимално дозволениот износ за период од две недели.

Народната банка потсетува дека од понеделник, 9 ноември, ќе започнат со работа и шалтерите на „АЛТА банка“ во Тетово и Струмица. На овие шалтери, клиентите на Банката кои немаат платежни картички ќе можат да подигнат до 20.000 денари. Истовремено, од следната недела се зголемува и неделниот лимит за подигање готовина и плаќања на продажните места со платежните картички на Банката, од 10.000 на 15.000 денари.

Народната банка продолжува со преземање активности за постепено олеснување на условите за располагање со средствата на клиентите на „АЛТА банка“ АД Битола, со приоритет да им се овозможи полесен пристап до нивните средства и уредно опслужување на сите клиенти, соопштуваат од НБМ.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.