Македонија

Годинава потрошени 770.000 евра за прскање против комарци, но кој е ефектот?

И покрај потрошените 770 илјади евра годинава за борба против комарците, општините од Македонија се уште не можат да го решат овој проблем.

Истражувањето на Центарот за граѓански комуникации покажало дека 48 општини презеле мерки за уништување на комарците – 35 од нив се бореле со комарците од земја, шест се справувале од воздух, додека пак седум општини имале земјено и воздушно прскање.

Најголем договор за уништување на комарците имал Град Скопје, кој лани, за двегодишен третман против комарците од воздух и земја платил половина милион евра.Потоа следуваат Велес и Кавадарци, со потрошени 32 илјади, односно речиси 26 илјади евра.

Нешто помалку чинел договорот на Кочани, 24.790 евра, а Куманово и Штип платиле по околу 21 илјади евра.

– КОМАРЦИ

ГРАД СКОПЈЕ – 526.827 ЕВРА (ЗА ДВЕ ГОДИНИ)

ОПШТИНА ВЕЛЕС – 32.464

ОПШТИНА КАВАДАРЦИ – 25.979

ОПШТИНА КОЧАНИ – 24.790

ОПШТИНА КУМАНОВО 21.138

ОПШТИНА ШТИП – 20.060

Сепак, проблемот со комарците во земјава секое лето предизвикува главоболка кај граѓаните, кои гласно критикуваат.

Професорката по паразитологија, Јована Стефановска вели дека проблемот со комарците не може да се реши целосно. Од пред шест години во земјава е регистриран и тигрестиот комарец, кој е многу поагресивен од сите останати видови. Според професорката Стефановска најдобар начин за справување со комарците, вклучувајќи го и тигрестиот комарец, е прскањето од земја.

Методот кој го воведе Хрватска со пуштање на 100.000 стерилни комарци за справување со овие инсекти, кај нас тешко да се случи, додава таа.

„Неодамна во јуни, по воздушно прскање против комарци имаше и помор на птици во Скопје и скопскиот регион. За анулирање на тигрестиот комарец најважно е прскањето од земја таму каде што е зголемена неговата популација. Техниката на пуштање на стерилни мажјаци во природата се развива за тигрестиот комарец. Многу е интересна и прогресивна, но Македонија се уште нема средства да оддели за имплементација“,изјави, Јована Стефановска – професор од Ветеринарен факултет – Скопје.

Инаку, тигрестиот комарец бил детектиран во 2016 година во реонот на Богданци, а две години подоцна се проширил во Дојран и повеќе општини во Скопје. Денес го има насекаде.

Експертите од земјава исто така регистрирале зголемување на бројот на видовите комарци и нивното присуство е различно од место до место.

Свет

Британскиот тинејџер ја призна вината за убиството на трите девојчиња во Саутпорт

Британски тинејџер денеска се изјасни за виновен за убиство на три девојчиња во северна Англија во јули, злосторство што ја згрози нацијата и предизвика неколкудневни немири.

Аксел Рудакубана (18) го промени своето признание во невин и се изјасни за виновен на првиот ден од судењето во Ливерпул.

Тој призна дека ги избодел Беби Кинг (6), Елси Дот Стенкомб (7) и Алис Дасилва Агиар (9), кои биле на час по танц на тема Тејлор Свифт во Саутпорт.

Во нападот беа повредени уште десет лица, меѓу кои осум деца.

Рудакубана се изјасни за виновен по десет точки од обвинението за обид за убиство, како и за производство на смртоносниот отров рицин и поседување на прирачник за обука на Ал Каеда.

Пресудата се очекува в четврток.

Фудбал

Тренерот на Порто доби отказ по само шест месеци на позицијата

Порто го отпушти тренерот Витор Бруно, објави португалскиот клуб по двата порази од Национал и Жил Висенте, а двократниот освојувач на Лигата на шампионите е трет во табелата во локалната лига по 18 натпревари.

Бруно беше назначен во јуни 2024 година, потпишувајќи двегодишен договор, кога го замени Серхио Консеиао, кој си замина по седум сезони во кои освои 11 титули, вклучувајќи три титули во португалската лига.

Односот на Бруно со играчите се влоши откако Порто испадна од Лига купот по поразот од Спортинг со 1-0 во полуфиналето, а играчот од средниот ред, Пепе го критикуваше тренерот на социјалните мрежи.

Порто, една од 32-те екипи кои се квалификуваа за проширеното Светско клупско првенство во 2025 година, што ќе се одржи во САД од 15 јуни до 13 јули, ќе се соочи со Олимпијакос во четврток во натпревар од Лигата на Европа.

Свет

Украина планира советувалишта за бегалците кои сакаат да се вратат дома

Украина сака да ги зголеми напорите да ги убеди бегалците во Германија да се вратат, а украинската влада планира советувалишта за бегалците кои сакаат да се вратат во Украина, изјави денеска украинскиот вицепремиер, Олексеј Чернишов.

-Голем број бегалци во Германија сериозно планираат да се вратат во Украина и ние мора да им помогнеме во тоа, изјави Олексеј Чернишов за германските медиуми.

Чернишов, кој го предводи новоформираното Министерство за враќање на бегалците, минатата недела беше во Берлин подготвувајќи се да изгради центри каде што украинските бегалци во Германија би можеле да добијат совети и помош при враќањето во Украина.

Тој објасни дека Украина страда од недостиг од војници, како и од работна сила во важни сектори. „Ситуацијата е особено критична во енергетскиот сектор, воената индустрија и градежништвото“, рече Чернишов.

Тој им рече на регрутите дека ќе бидат ослободени од воена служба доколку се стават на располагање на еден од секторите со дефицит. „Секој што работи во електраната нема да биде регрутиран. Тоа е загарантирано“, изјави украинскиот вицепремиер.

Според него, центрите ќе даваат поддршка и за оние кои не сакаат да се вратат во Украина, а се невработени во Германија.

Од почетокот на руската агресија врз оваа земја во Германија пристигнале 1,1 милион бегалци од Украина.