Македонија

Филипче: Барам извинување од Мицкоски и ВМРО за граѓаните на Македонија!

Денес сведочиме за најголемата политичка хипокризија и лицемерие во последните години.

ВМРО ги доби изборите со лажна теза дека Социјалдемократскиот сојуз на Македонија и сите ние сме предавници на македонскиот идентитет. Дека Преспанскиот договор е предавство. Дека ќе го поништат договорот.

Дека ќе го вратат старото име и дека никогаш нема да кажат „Северна Македонија“. Гордана Силјановска изјавуваше дека никогаш нема да изговори „С. Македонија“. Христијан Мицкоски велеше дека додека е тој во ВМРО, Преспанскиот договор не е завршена работа.

И што се случи сега? Претседателката Гордана Силјановска-Давкова јавно изјави дека Преспанскиот договор го потврдува и зачувува македонскиот национален идентитет.

Христијан Мицкоски јавно изјави дека Преспанскиот договор е ремек-дело на дипломатијата.

Министерот Тимчо Муцунски изјави дека НАТО е феноменална работа, дека дава безбедност и поволна клима за инвестиции. Да ги потсетиме што точно успеавме со

Преспанскиот договор. Се гарантира македонскиот јазик како официјален јазик на Република С.Македонија и во целиот свет.

Се заштитува македонскиот национален идентитет, културата и историјата како посебни и различни од другите. На секоја лична карта, пасош и официјален документ стои „македонско“. Секој граѓанин слободно зборува македонски јазик, кој е признат од секоја земја-членка на Европската Унија.

Македонските симболи, песни, фолклор и традиција продолжуваат да се слават секаде, без никаква забрана. Во Северна Грција, за прв пат луѓето слободно се собираат, пеат македонски песни и играат македонски ора. И сето ова, пред Преспанскиот договор, беше практично незамисливо.

Преспанскиот договор нема ништо што го загрозува нашиот национален идентитет. Напротив, го зајакнува. И ние во СДСМ сме горди на тоа, а денес треба да бидат горди и сите наши граѓани кои досега беа лажени. Од нашата независност во 1991 година, 27 години бевме Бивша Југословенска Република Македонија.

Тоа беше официјалното име во Обединетите нации. Благодарение на Преспанскиот договор, по 27 години блокада, денес сме полноправна и рамноправна членка на НАТО. Имаме отворен пат и шанса да станеме земја-членка на Европската Унија.

Внесувањето на малцинствата во Уставот, што е основен услов на Европската Унија – повторувам, на Европската Унија, не на Бугарија, како што ВМРО сака да го прикаже – не е предавство. Ние не преговараме со Бугарија, ние преговараме со Европската Унија.

И да се вратам на проблемот со Бугарија и уште еднаш да објаснам зошто внесувањето на малцинствата, конкретно бугарското, никако не е ризик за нашиот идентитет, бидејќи на граѓаните веќе им е јасно. Бугарската теза од пред многу децении дека сме ист народ во две држави, со ова паѓа во вода.

Од тој момент, кога Бугарите ќе бидат внесени како малцинство во Уставот, се прави јасна дистинкција помеѓу македонскиот народ и бугарското малцинство. Се руши целата пропаганда дека нема посебен македонски народ.

И со тоа, со уставните измени, го зајакнуваме – не го слабееме, ниту го ризикуваме – нашиот национален идентитет. И тоа е успех на нашата дипломатија, на Социјалдемократскиот сојуз на Македонија, со поддршка на Европа.

Драги граѓани, ова се позициите за кои СДСМ беше обвинет дека е предавничка партија. Тие не само што не се откажаа од Преспанскиот договор, туку, еве, го признаваат.

Тие не само што не го вратија старото име, туку секојдневно, на официјалните состаноци, како што ни кажуваат странските партнери со кои се среќаваат, во затворен дел го користат уставното име „Северна Македонија“. И каде е сега предавството?

Каде се сите ветувања на организираната криминална група на ВМРО од пред изборите? Знаеја дека НАТО е најдоброто нешто што ни се случило, но сепак, години наназад не престанаа да нè нарекуваат предавници и да сеат поделби.

И ова не е политика. Ова е чиста измама на сопствениот народ. Време е оваа организирана група на Христијан Мицкоски и ВМРО да им се извини на граѓаните за годините лаги и токсични поделби во општеството. Време е да престанат со театарот и да ја продолжат политиката на европска иднина. Доколку не сакаат, а не сакаат поради нивните бизниси, нека си заминат.

Јавно го повикувам Христијан Мицкоски, носителот на оваа измислена лажна кампања, да излезе и да им се извини на сите граѓани на Македонија.

Барам извинување за изгубените години, за сите навреди што ги претрпеа оние што го поддржуваа Социјалдемократскиот сојуз на Македонија, за оние што веруваа во Европската Унија, за многумина кои поради евроскептицизмот и оваа лажна кампања ја напуштија земјата и се иселија.

Барам од Христијан Мицкоски да излезе и да се извини во свое име и во името на неговата партија. Кога умееше да клечи и да моли за да дојде на власт, може и сега да излезе и да се извини за лагите и пропагандата што ја спроведуваше години наназад.

Порака до сите кои гласаа за ВМРО затоа што поверуваа во оваа лажна кампања и манипулација на Христијан: драги сограѓани, ве лажеа со години наназад. Со многу силна пропаганда што ви се сервираше секојдневно преку целата медиумска и партиска машинерија.

Орбановите медиуми, фармата на тролови увезена од сестринската СНС партија од Србија и платформите со ботови. Немојте да се грижите. Ништо не е продадено, ништо не е загрозено.

Но сега, истите тие, истата група што го правеше ова со години, се обидува да го спречи нашиот европски пат.

Зошто? За да ги сочуваат своите позиции, за да продолжат да го ограбуваат народот и да продолжат со криминалот и корупцијата. Тие не ја сакаат Европа, затоа што Европа носи независни институции, носи независно судство, носи европско обвинителство.

И тогаш секој ќе одговара за криминалот и корупцијата. Ете затоа таа група сака да ја загрози иднината на вас и вашите деца. И тоа нема да им го дозволиме. Затоа што доаѓа време на вистината, правдата и одговорноста.

Да живее европска Македонија!

Прес конференција на претседателот на СДСМ, д-р Венко Филипче

Филипче: Сиљановска призна, ВМРО со години ги лажеше граѓаните за идентитетот и Преспанскиот договор

Претседателот на СДСМ, д-р Венко Филипче, на денешната прес-конференција порача дека претседателката Гордана Сиљановска Давкова со изјавата за Преспанскиот договор, призна дека ВМРО со години ги лажеше граѓаните за идентитетот и Преспанскиот договор.

„Гордана Силјановска изјавуваше дека никогаш нема да изговори Северна Македонија. Христијан Мицкоски велеше дека додека е тој во ВМРО, Преспанскиот договор не е завршена работа. И што сега се случи? Претседателката Гордана Сиљановска Давкова јавно изјави дека Преспанскиот договор го потврдува и зачува македонскиот национален идентитет“, рече Филипче.

Тој додаде дека ВМРО со години преку манипулации и пропагандата преку своите медиуми, ги лажеше граѓаните и побара премиерот Мицкоски да се извини за пропагандата што ја спроведуваше години наназад.

„Со многу силна пропаганда, се сервираше, секојдневно, преку целата медиумска и партиска машинерија.Орбановите медиуми, фармата на тролови увезена од сестринската СНС партија од Србија и преку платформата со ботови. Ништо не е продадено, ништо не е загрозено. Барам од Христијан Мицкоски да излезе и да се извини во свое име и во името на неговата партија. Кога умееше да клечи и да моли за да дојде до власт, може и сега да излезе и да се извини за лагите и за пропагандата што ја спроведуваше години наназад“, рече Филипче.

На прес-конференцијата, Филипче порача дека Преспанскиот договор не го загрозува македонскиот идентитет, туку напротив, го зајакнува.

„Во Преспанскиот договор нема ништо што го загрозува нашиот национален идентитет, напротив, го зајакнува. И ние во СДСМ сме горди на тоа, а денес треба да бидат горди сите наши граѓани кои досега беа лажени“, рече Филипче.

СДСМ

Тагови: Венко Филипче

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Жена лови риба на плажа, кога наеднаш се издигна огромен бран и ја „проголта“ (ВИДЕО)

Ова е застрашувачкиот момент кога жена која ловела риба на плажа во Калифорнија била однесена во морето од моќен, ненадеен бран.

Бе Кадоте, 47-годишна жителка на Пацификот, ловела риба на плажата јужно од Пацифик Мол кога бранот ја удрил, соборувајќи ја од нозе и влечејќи ја околу 30 стапки од брегот, објавува Њујорк пост.

Снимките од безбедносните камери го забележале драматичниот момент кога Кадоте била однесена во разбрануваното море.

„Се чувствував како да ме вртат во машина за перење“, изјави таа за АБЦ.

Таа го опиша бранот како сосема неочекуван и рече дека веднаш сфатила во каква опасност се наоѓа.

„Едноставно ме проголта. Знаев токму тогаш дека доаѓа по мене. Си одам. Ќе ме однесе. Нема шанси да се извлечам од ова“, рече таа.

Додека моќната вода ја однесе подалеку од брегот, Кадотова одлучи да не се бори против огромната сила на брановите, туку да ја препушти својата судбина на повисока сила.

„Ги затворив очите и се помолив: Боже, ако ова е твоја волја, разбирам, но те молам не дозволувај да го напуштам мојот син“, рече таа.

Terrifying video captures moment California woman is sucked into the ocean by sneaker wave in Pacifica https://t.co/b3ZP9wtCeJ pic.twitter.com/RUhLNPaqCb
— New York Post (@nypost) June 21, 2026

По неколку минути во вода, Кадотова успеа да се врати на површина. Рибарите во близина веднаш ѝ притрчаа на помош, ѝ фрлија конец и ја извлекоа назад на брегот.

„Ви благодарам што го ризикувавте вашиот живот за да го спасите мојот“, им рече таа по спасувањето.

Набрзо пристигнаа службите за итни случаи и ја пренесоа во болница во Сан Франциско, каде што беше лекувана од хипотермија и состојба опишана како „синдром на океански шок“ или повреди предизвикани од силно фрлање од брановите.

Ваквите ненадејни бранови, познати како „подмолни бранови“, се особено опасни бидејќи се појавуваат без предупредување и можат да ги однесат луѓето далеку од брегот пред да можат да реагираат.

Таа сега се опоравува дома. Неодамна се пријавени и други спасувања на океанот.

Овие бранови се особено чести по должината на крајбрежјата со стрмни, длабоки падови, вклучувајќи делови од северозападниот дел на Пацификот и северна Калифорнија.

„Помолните бранови“ се обично големи крајбрежни бранови кои можат да се искачат многу повисоко на плажата отколку што се очекуваше. Тие се тешки за предвидување и можат да удрат дури и во мирни, сончеви денови со мало или без никакво предупредување.

Некои истражувачи проценуваат дека околу три од секои 10.000 бранови на море достигнуваат овој опасен статус.

Тагови: плажа риба

Европа

Ужас во Унгарија: Полицијата откри морничава колекција кај болнички портир, призна дека јадел човечко месо

Националното биро за вонредни ситуации на Унгарија го истражува шокантниот случај на маж од Будимпешта осомничен за нелегално користење човечки тела откако полицијата пронашла неколку човечки тела на неговиот имот.

Одделот за заштита на животот на Националниот институт го отвори случајот откако властите добија информации за портир кој работел во болница во Будимпешта, кој наводно складирал делови од човечки тела на своето работно место и дома, пренесе Телеграф.

Истрагата откри дека тој имал голем интерес за анатомија и патологија и редовно дисецирал животни. Полицијата се сомнева дека делумно ги добил човечките останки преку својата работа, а исто така ископал тела од напуштени гробишта во Словачка и Унгарија.

Според властите, човекот не ја криел својата чудна страст, раскажувајќи им на семејството и пријателите за тоа, па дури и фотографирајќи ја својата колекција.

Полицијата го уапсила човекот во Будимпешта на 17 јуни, а потоа претресла неколку имоти и возила поврзани со него. За време на претресот, запленети се компјутери, лаптопи, мобилни телефони и разни уреди за складирање податоци.

Полицијата соопшти дека за време на претресот се пронајдени неколку човечки останки. Меѓу запленетите предмети беа полнето човечко лице и кожа, коски ставени во куфер, комплетна потколеница, човечки мозок, надлактица и неколку черепи.

Пронајден е и орган складиран во тегла, кој моментално се испитува за да се утврди дали е од човечко или животинско потекло.

Запленетите остатоци ќе бидат испитани од судски експерти, кои исто така ќе бидат одговорни за утврдување на нивното потекло и извор.

Признал дека јадел човечко месо

Мажот е осомничен за кривично дело нелегална употреба на човечко месо. Според полицијата, тој признал дека го сторил кривичното дело за време на испрашувањето.

Во своето сведочење, тој рекол дека бил особено привлечен од делови од човечкото тело и дека претходно подготвувал разни јадења од нив и ги јадел.

По испрашувањето, тој бил приведен, а потоа судот наредил да биде ставен под кривичен надзор.

Истрагата е сè уште во тек. Властите моментално се обидуваат да го утврдат точното потекло на запленетите човечки остатоци.

Во зависност од исходот од истрагата, бројот на кривични дела за кои се товари човекот може подоцна да се прошири.

Тагови: Унгарија

Живот

Милионерот Брајан Џонсон (48): Не планирам да умрам, моето тело е старо само 18 години (ВИДЕО)

Брајан Џонсон, 48-годишниот милионер кој посветил голем дел од своето време и пари на истражување на долговечноста, тврди дека „нема планови да умре“.

Џонсон, кој тврди дека неговата „биолошка возраст“ е значително помала од неговата хронолошка возраст, верува дека неговата генерација може да биде првата што ќе живее значително подолго благодарение на научниот напредок од која било претходна.

„Не планирам да умрам“

Во видео објавено на платформата X, тој ја претстави својата визија за иднината. „Ние сме првата генерација што нема да умре. Буквално. Не планирам да умрам“, рече тој.

Додаде дека неговите здравствени индикатори одговараат на оние на многу помлада личност. „Имам 48 години хронолошки, но мојата кардиоваскуларна кондиција е како на 18-годишник, мојот капацитет на белите дробови е како на 18-годишник, моите теломери и хромозоми се како на 18-годишник. Моето тело функционира на многу начини како да имам 18 години.“

Тој, исто така, објасни како биолошката возраст може да се разликува од вистинската, хронолошка возраст. „Затоа велам дека здравјето треба да биде приоритет. Разликата помеѓу здрав и нездрав живот е поголема отколку што мислат повеќето луѓе“, рече тој.

Bryan Johnson says this is the first generation that won’t die

“We are the first generation that won’t die, like actually won’t die, I don’t plan on dying”

“I’m chronologically 47, but biologically my cardiovascular abilities are age 18, my lung capacity is age 18, my telomeres… pic.twitter.com/y8qfdE4rPV
— Third (@thirdmetax) June 22, 2026

Проект вреден два милиони долари годишно

Џонсон верува дека напредокот во биотехнологијата и подоброто разбирање на човечкото тело би можеле значително да го зголемат животниот век. Во последниве години, тој го претвори своето тело во еден вид експеримент насочен кон забавување на стареењето.

Тој се придржува до строго контролирана исхрана, секојдневно следи бројни здравствени параметри и се подложува на разни третмани и терапии. Се вели дека неговата програма, позната како Project Blueprint, чини околу два милиони долари годишно, според претходните извештаи.

Иако Џонсон и некои застапници на долговечноста веруваат дека развојот на медицината, биотехнологијата и вештачката интелигенција еден ден би можеле значително да го продолжат човечкиот живот, научниците предупредуваат дека досега нема докази дека е можно да се избегне стареењето или да се постигне еден вид бесмртност.

View this post on Instagram

A post shared by Bryan Johnson (@bryanjohnson_)

Совети за долговечност

И покрај критиките, Џонсон тврди дека собрал голем број корисни сознанија за здравјето и стареењето во текот на годините. Неодамна сподели со своите следбеници 41 лекција за која вели дека ги научил инвестирајќи милиони долари во истражувања за долговечноста.

„Еве го тоа. Сè што научив трошејќи милиони за долговечност“, напиша тој на X.

Иако неговиот режим е исклучително скап, многу од советите што ги споделува се базираат на навики што им се достапни на повеќето луѓе. Тој ја нагласува важноста на квалитетниот сон, редовното вежбање, исхраната богата со интегрални храни и избегнувањето пушење и други навики што можат да му наштетат на здравјето.

Тој го опишува спиењето како „најмоќниот лек на светот“ и препорачува да си легнувате приближно во исто време секоја вечер, по можност пред полноќ, избегнувајќи екрани најмалку еден час пред спиење.

View this post on Instagram

A post shared by Bryan Johnson (@bryanjohnson_)

Тој исто така советува лесна активност по оброците, како што се одење, редовно истегнување и тренинг за сила за зачувување на мускулната маса.

Меѓу препораките се доволен внес на течности, изложеност на утринското сонце за витамин Д и заштита на кожата за време на најсилното дневно сонце. Тој исто така го смета менталното здравје за важно, па затоа охрабрува редовно дружење со пријателите и умерено користење на социјалните мрежи.

Иако нема докази дека ваквите навики можат да го спречат стареењето, експертите генерално се согласуваат дека тие можат да придонесат за поздрав начин на живот и да го намалат ризикот од многу болести.

Тагови: милионерот тело