Култура

„Дон Кихот во Скопје“ – концерт, изложба и промоција на книга за деца

Во фоајето на Националната опера и балет вечер од 19 часот премиерно ќе биде изведен мултимедијален настан „Дон Кихот во Скопје“, кој опфаќа концерт, изложба на уметнички слики и скулптури и промоција на книга.

Проектот е инспириран од култната приказна за славниот витез Дон Кихот на Мигел де Сервантес. Настанот е организиран од Амбасадата на Шпанија во Скопје по повод националниот ден на Шпанија - 12 Октомври.

-Светска премиера ќе доживее Концертот за пијано, гитара, наратор и камерен оркестар со наслов „Дон Кихот во Скопје“, чии автори се Дино Имери и Дијана Илкоска Имери. Под диригентство на маестра Дијана Илкоска Имери, ќе настапи Камерниот оркестар „ID“, а како солисти ќе се претстават: Дино Имери на пијано, Ади Имери на гитара и Тина Иванова, наратор и автор на текст, соопштија авторите на проектот за вечерашниот настан во НОБ за кој влезот за посетители е бесплатен.

Концертот во три става „Дон Кихот во Скопје“ за пијано, гитара, наратор и камерен оркестар, е напишан од двајцата автори – Дијана Имери Илкоска и Дино Имери во 2025 година.

-Како што кажува и самиот наслов, главна инспирација на авторите е од едно од најдобрите и централни светски и шпански книжевни дела - „Дон Кихот“ од Мигел де Сервантес. Музиката е програмска и ја отсликува приказната за патувањето на главниот лик Дон Кихот и неговиот помошник Санчо Панса во современа Северна Македонија, кои тргнуваат во потрага по нова авантура, со цел да помогнат во борбата против ветерниците и во оваа земја. Звучниот пејзаж е силно инспириран од шпанскиот и македонскиот фолклор, коишто се преплетуваат и создаваат автентична атмосфера. Текстот што го чита нараторот, пак, којшто е соединение на концертната форма, се провлекува низ делото како сценски контрапункт. Приказната, чија авторка е Тина Иванова, е своевидна поддршка на програмската музика. Ги следи тонските „потези“ и ги фиксира на звучното „платно“ токму како што мелодијата ја „озвучува“ наративноста, се наведува во соопштението.

Во фоајето на НОБ ќе бидат изложени уметнички слики од познатата колекција „Дон Кихот“ на реномираниот македонски уметник Владимир Георгиевски (1942-2017), во чии дела е користена фундаменталната мисла на метафората на главниот јунак, Дон Кихот: „Да се спаси човештвото од сите зла и болештини за среќа на сите луѓе на светот“.

Ќе бидат изложени и нови скулптури на младата уметница Јана Николовска, а ќе биде промовирана и илустрирана книга за деца „Дон Кихот“ на македонски јазик, објавена во 2017 година, но сега актуализирана по повод мултимедијалниот настан.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Автомобилизам

Нов кинески електричен автомобил ќе се натпреварува со популарните европски брендови

„Geely EX2“ би можел да биде еден од најпристапните електрични автомобили во Европа. Во Кина чини само 9.000 евра, но не очекувајте да биде толку достапен на европскиот пазар.

Кинескиот производител на автомобили „Geely“ се подготвува да лансира нов електричен модел „EX2“ на европскиот пазар.

Станува збор за компактен градски кросовер кој треба да се натпреварува со модели како „Renault 5 E-Tech“ и „Volkswagen ID. Polo“.

„Geely EX2“ користи електричен мотор сместен на задната оска, кој развива 114 КС и 150 Nm вртежен момент.

Енергијата ја обезбедува „LFP“ батерија со капацитет од 39,4 kWh, а проценетиот досег според „WLTP“ стандардот е до 325 километри.

Моделот поддржува брзо полнење со моќност до 70 kW, што не е меѓу најдобрите резултати во својата класа, но е доволно за секојдневна употреба.

Со должина од 4,13 метри и волумен на багажникот од 375 литри, „EX2“ ќе биде најмалиот модел во европската понуда на брендот „Geely“.

Внатрешноста има два дигитални екрани интегрирани во контролната табла, во согласност со современите трендови.

Продажбата во Велика Британија треба да започне кон крајот на годината, по што моделот ќе стигне и на другите европски пазари.

Во Кина, почетната цена е околу 9.000 евра, но во Европа се очекува да чини приближно 18.000 евра поради трошоците за транспорт, царината и прилагодувањето кон локалните прописи.

Доколку овие проценки се покажат како точни, „Geely EX2“ би можел да стане еден од најпристапните електрични автомобили во Европа и сериозен конкурент на веќе воспоставените европски модели.

Извор: Б92

Тагови: електричен автомобил

Македонија

Заврши меѓународната конференција „Дијалог за единство и мир 2026“ под покровителство на поранешниот Претседател Иванов

Конференцијата обедини поранешни и актуелни државници, дипломати, претставници на меѓународни организации, универзитетски професори, истражувачи, претприемачи и млади лидери од Европа и Азија.

Во организација на Кабинетот на поранешниот претседател на Република Македонија д-р Ѓорге Иванов, Меѓународниот центар Алијанса на цивилизациите и Асоцијацијата на алумнисти на Школата за млади лидери на Претседателот Иванов, во периодот од 22 до 24 јуни 2026 година во Скопје се одржа меѓународната конференција „Дијалог за единство и мир 2026“.

Конференцијата обедини поранешни и актуелни државници, дипломати, претставници на меѓународни организации, универзитетски професори, истражувачи, претприемачи и млади лидери од Европа и Азија, кои преку отворен дијалог разменија мислења за глобалните безбедносни предизвици, економската соработка, културната размена, дигиталната трансформација и улогата на младите во современиот свет.

Во своето обраќање на свеченото отворање, претседателот Иванов истакна дека во време на растечки глобални предизвици, мирот и стабилноста можат да се градат единствено преку дијалог, почитување на различностите и заедничка одговорност за иднината. Потоа следеа обраќања на вицепремиерот за политички систем Љупчо Димовски, амбасадорката на Народна Република Кина Џијанг Сјаојан и потпретседателот на Кинеската асоцијација за меѓународно разбирање Лиу Хонгцаи.

На првиот панел, на тема „Предизвици за меѓународниот мир, безбедноста и владеењето на правото“, учествуваа поранешниот Претседател Иванов, поранешниот министер за надворешни работи на Република Турција и актуелен шеф на турската делегација во Парламентарното собрание на НАТО, Мевлут Чавушоглу, поранешниот претседател на Генералното собрание на Обединетите нации, Вук Јеремиќ, поранешниот министер за надворешни и европски работи на Република Хрватска, Миро Ковач, и кинескиот инвеститор и политички аналитичар Ерик Ли, додека модератор на сесијата беше Иван Иванов од Меѓународниот центар Алијанса на цивилизациите. Учесниците разговараа за актуелните геополитички кризи, ерозијата на меѓународниот поредок, улогата на меѓународните институции и потребата од обновување на довербата меѓу државите и народите.

Вториот панел беше посветен на економскиот развој на Кина, регионалната поврзаност и соработката меѓу Кина и земјите од Централна и Источна Европа. Своите гледишта ги споделија првиот македонски амбасадор во Народна Република Кина Владимир Петковски, професорката Сонг Лилеи од Универзитетот Тонгџи, професорот Љубомир Кекеновски од Економски факултет при УКИМ, професорот Ванг Хонгји од Универзитетот за странски студии во Пекинг. Панелистите модерирани од коосновачот и генерален секретар на Пекиншкиот клуб Хуа Хан, ја нагласија важноста на инфраструктурното поврзување, трговската размена, образовната соработка и заемното разбирање како основа за одржлив економски развој.

Третиот панел, „Иднината на цивилизациската визија и културната размена“, беше посветен на улогата на културата, историјата и цивилизациското наследство во градењето меѓусебна доверба. Во дискусијата учествуваа истражувачот Џанг Гуоџин, професорот Лијанг Жанџун, директорот на Институтот за меѓународни стратешки и безбедносни студии Раби Седрак и професорот Далибор Јовановски. Модераторот Шенер Билали, советник на Премиерот за меѓуетнички односи, ги водеше панелистите низ дискусијата за тоа дека културната дипломатија останува еден од најефикасните инструменти за надминување на предрасудите и за јакнење на соработката меѓу различни цивилизации.

Вториот ден од конференцијата започна со панелот „Дигитална трансформација: вештачка интелигенција, креативност и човечки потенцијал“. Сесијата ја модерираше професорот Атанас Кирјаковски од Меѓународниот Балкански универзитет во Скопје, а учесници на панелот беа професорот Демин Дуан од Универзитетот во Пекинг, Игор Маџов од „Стартап Македонија“, Моника Ризовска Таневска од „Women in Tech“ и професорот Христијан Ѓорески од Факултетот за електротехника и информациски технологии при УКИМ. Панелистите разговараа за влијанието на вештачката интелигенција врз општеството, образованието и економијата, нагласувајќи дека технолошкиот напредок мора да биде насочен кон унапредување на човечкиот потенцијал и општествената благосостојба.

На последниот панел, „Младите во променлив и турбулентен свет“, свои искуства и визии споделија Илија Тоневски, извршен директор на „Делфино Мобилити Груп“, Виктор Јакимовски, извршен директор на платформата „Пантеон“, Огнен Огненоски, основач и директор на „БизнисМрежа“, Никола Николовски – Боемот, креатор на дигитални содржини, новинар и маркетинг професионалец, и Изабела Левенска Миљаниќ, иницијатор на платформата „Музеј на јавна уметност“, додека панелот го модерираше Анастасија Илиевска, претседател на Асоцијацијата на алумни на Школата за млади лидери на претседателот Иванов и менаџер за односи со јавноста и медиумите. Дискусијата беше посветена на лидерството, претприемништвото, дигиталната комуникација и општествената ангажираност на младите генерации, и, беше нагласено дека младите претставуваат двигател на позитивните промени и клучен фактор во обликувањето на поинклузивни и поотпорни општества.

Во заклучоците од конференцијата беше истакнато дека современите предизвици бараат поголема меѓународна соработка, почитување на различностите и подготвеност за дијалог. Учесниците ја потврдија потребата од јакнење на меѓусебната доверба, културната размена и партнерствата меѓу државите, институциите и граѓанските организации како предуслов за мирна и стабилна иднина.

Кабинетот на претседателот Иванов и ко-организаторите изразуваат искрена благодарност до сите говорници, панелисти, партнери и учесници кои придонесоа за успешната реализација на конференцијата „Дијалог за единство и мир 2026“, потврдувајќи дека дијалогот останува најсилниот инструмент за градење мир, разбирање и соработка меѓу народите.

Тагови: Ѓорге Иванов