Едноставните гестови како непотребното извинување или слабо поставените граници можат да ве наведат да ја занемарите сопствената вредност и чувството за себе. Ако постојано се чувствувате искористено или ве третираат неправедно, можеби е време да ја преиспитате својата улога во таквите ситуации, пишува Vice.

Еве четири начини на кои можеби несвесно ги учите луѓето да не ве почитуваат.

Не ги спроведувате поставените граници

Едно е да поставите граници, а друго е да ги спроведете. Можеби ќе кажете што не поднесувате, еднаш или двапати, но дали кога некој ќе ја премине границата, го сметате за одговорен? Ако одговорот е не, во суштина ги учите да продолжат да ги поместуваат вашите граници. На пример, замислете дека некој ве користи како терапевт за своите проблеми.

Се обидувате да поставите граници и го замолувате да не ве оптоварува со своите чувства или интимните детали од својот брак, но тој и понатаму го прави истото. По некое време, попуштате и слушате, мислејќи дека ви е потребна поголема енергија да инсистирате на своите граници, отколку само да го сослушате. За жал, со ова ја учите личноста да ги игнорира вашите граници и да го добие она што го сака.

Не ја искажувате вашата непријатност

Да кажете дека ви е непријатно поради нешто, не е секогаш лесно, особено ако имате работа со некој што ги омаловажува вашите чувства или го негира вашето искуство. Да речеме дека вашиот партнер е во пријателски однос со поранешната партнерка и сфаќате дека нивната врска сега е платонска. Најчесто, не ви пречи оваа динамика и му верувате на вашиот партнер, сè додека нема несоодветно однесување.

Сепак, сте кажале дека нивните интимни разговори или постојаната комуникација ви пречат. Но, додека лежите во кревет доцна навечер, забележувате дека вашиот партнер со денови води длабоко емотивна преписка со бившата. Секоја вечер чувствувате „дупка“ во желудникот, но поминувате преку тоа. Не кажувате дека ви пречи затоа што не сакате конфликт. За жал, тоа е лизгав терен што може да ги поткопа дури и најздравите врски.

Претерано се извинувате

Да ја признаете својата грешка и да преземете одговорност за своите постапки е доблест, но претераното извинување или извинувањето без причина може бргу да доведе до тоа некој да ги „истури“ своите емоции/гнев врз вас. Затоа добро размислете пред да се извините за нешто што не е ваша вина.

За жал, ова е честа навика, особено кај жените. Но, кога им дозволувате на другите да ве обвинуваат, или кога се обвинувате себеси за туѓите грешки, им давате можност на другите луѓе да не ве почитуваат.

Ги жртвувате вашите вредности за другите

Ова е подмолно, но опасно. Ако се фатите себеси како постапувате спротивно од сопствените уверувања или дури наоѓате изговори да ги прекршите сопствените граници само за да му угодите некому, во суштина не се почитувате себеси, што често ги охрабрува и другите да го сторат истото.

На пример, да речеме дека ја цените интимноста во рамките на врската, не ги осудувате другите кои се впуштаат во секс без обврски, но едноставно не го сакате тоа за вас. Сепак, кога ќе излезете со некого, му дозволувате да ве наговори на нешто што не го сакате.

Можеби вашите пријатели ви велат да се „опуштите“ и да бидете полежерни, или можеби станува збор за личност што сте ја запознале преку апликација за запознавање и која е премногу наметлива. Во секој случај, ако не се држите цврсто до вашите вредности, можете брзо да се изгубите себеси и да предизвикате да не ве почитуваат. Вашите вредности не мора да бидат општоприфатени за да бидат важни.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.