Кошничката на домаќинствата“ во грчките супермаркет со конкретни основни производи чии цени треба да останат исти или да има минимални покачувања, од денеска е збогатена со т.н. „Божиќна кошничка“ во која се вклучени производи поврзани со претстојните празници, јави дописничката на МИА од Атина.
Покрај основните продукти, од денеска се додаваат уште шест категории, односно мисиркино, јагнешко и козјо месо, чоколади, милиброд и новогодишна погача.
Министерот за развој на Грција Костас Скрекас во интервју за грчката телевизија ЕРТ посочи дека оваа година, „Божиќната кошничка“ е поевтина во споредба со лани, но и дека поевтина ќе биде и божиќната трпеза за граѓаните.
-Гледаме дека имаме пониски или исти цени како лани, така што имаме или нула или негативна инфлација во однос на истиот период во 2022 година. На пример, мисирката е за пет отсто поевтина, козјото месо за 16 проценти, а јагнешкото е за 17 отсто поевтино, рече Скрекас.
Кошничката за домаќинствата во грчките супермаркети беше воведена лани во ноември, а содржи над 50 производи, меѓу кои ориз, леб, макарони, свинско и пилешко месо, риба, млеко и млечни производи, јогурт, јајца, различни видови сирење и кашкавал, зејтин, шеќер, кафе, чај, какао, сокови, средства за чистење, детергенти, тоалетна хартија, паста за заби, производи за лична хигиена, влошки, сапун, антисептик, пелени, храна за кучиња и мачки итн.