„Астерфест“ од 44 до 8 август во Струмица - Канал 5

Култура

„Астерфест“ од 44 до 8 август во Струмица

Од 4 до 8 август, во Струмица, традиционално по 21. пат ќе се одржи интернационалниот филмски фестивал „Астерфест“.

„Астерфест“ од 44 до 8 август во Струмица

Според овогодишното фестивалско мото „Со отворени очи“, независните филмски автори метафорично ја повикуваат публиката да гледа како животот тече како на филмска лента низ бројните приказни раскажани од различни краишта на светот. Физиономијата на фестивалот, кој е препознатлив не само во регионот туку и во меѓународната фестивалска мрежа, останува иста, со акцент на авторските филмови. И оваа година селектираните програмски блокови се разновидни и инвентивни, а покрај кусометражните, има и долгометражни филмски содржини.

Програмата опфаќа 20-тина строго селектирани квалитетни и нови филмови од повеќе видови и жанрови. Во програмите Глобална фикција, Астердокс, Анимоушн и Мери-дионс ќе можат да се видат: канадскиот „Девојчето што ронеше бисери“ на Крис Левис и Мациек Шчербовски, кои добија Оскар оваа година, данскиот „Душа птица“ на Тобијас Кампман (зад кој стои трикратната оскаровска ММ-продукција), грузискиот „Земјата на мажите“ (добитник на „Срцето на Сараево“) на Маријам Бакачо Хачвани, грчко-германскиот „Изгубени гардении“ на Галатија Лагутари, чешко-британско-македонскиот „Крајолици на човештината“ на Јана Хунтерова, британските „Нешто бесмислено“ на Ејса Бејли, со Овен Тил во главната улога, и „Без милост“ на Ема Зафировска, канскиот француско-палестинско-грчки победник „Драго ми е што си мртов“ на Тауфик Бархом, мексиканско-шпанскиот „Ние сме вода“ на Хорхе Малпика, кинеско-хонгконшкиот „Нилски коњи“ на Лин Џијанџие, бугарскиот „Оџачарот“ на Настимир Цачев, полскиот „Полека, брзо, полека“ на Јагода Чарнек, рускиот „Превозник“ на Максим Кулагин, норвешкиот „Примален нагон“ на Хенрик Ремеј, јужнокорејскиот повеќенаградуван „Разденување“ на Хе-о Пак, мозамбискиот „Рипка“ на Каушик Субраманијам, француската комедија „Франсин, исток-запад“ на Елвира Барбоза, како и македонските „Неми филмови“ на Крсте Господиновски и „Остров“ на Бранко Костески.

Покрај натпреварувачката, секоја вечер ќе има и ревијална програма со филмови кои се интересни од повеќе творечки аспекти. Специјална проекција ќе има филмот за еден од најзначајните филмски автори на векот – тоа е документарецот „Версус: животот и филмовите на Кен Лоуч“, во знак на 90 години од раѓањето на легендарниот филмски автор Лоуч и една деценија од продуцирањето на филмот од страна на „Шеснаесет филма“. Духовитиот, провокативен и прониклив филмски портрет на Луиз Осмонд навлегува во животот и кариерата на еден од најславните и најконтроверзни британски режисери. Осмонд во овој филм ја истражила кариерата на Кен Лоуч од неговите рани денови како театарски режисер, преку телевизиските драми, па сè до поново време. Овој изненадувачки искрен документарец е многу повеќе од обично сведоштво за творештвото на Лоуч. Повеќе е една разиграна студија за процесот и предизвиците при градењето на една толку уникатна кариера со извонреден опус.

На „Астерфест“ ексклузивна проекција ќе има и македонско-швајцарско-американскиот документарно-игран филм „Железна тврдина“, по сценарио и во режија на Митко Панов. По пандемијата, американскиот филмски режисер Кевин Китон доаѓа во Демир Хисар, за да води работилница за „Филмот како терапија“ за пациентите во психијатриската болница. И покрај огромните предизвици, ентузијазмот на пациентите и нивната креативност ја спасуваат работилницата, а и него, кулминирајќи со церемонијата „Демирхисарски Оскар – Златна пчелка“, каде што конечно се бришат границите меѓу документарното и фикцијата.

Во чест на наградените ќе се прикаже и тукушто произведениот „Филм до вжештување“ на Дарко Баиќ, кој имаше премиера на „Белдокс“. Тоа е своевиден биографски филм за Боро Драшковиќ, еден од најзначајните европски режисери, кој целиот свој живот го посветува на уметноста на раскажувањето преку филмот, театарот и книжевноста. Како професор и творец, тој патува низ светот и го пренесува своето знаење обликувајќи нови уметници, додека преку своите книги и сценски дела истражува што значи да се создава и како уметноста го разбира светот.

Со посредство на Шведскиот филмски институт, специјална проекција на „Астерфест“ ќе има и дигитално реставрираната верзија на „Жртвопринесување“ на Андреј Тарковски, во знак на 40-годишнината од продукцијата на ова ремек-дело. Во својот последен филм, филмскиот мајстор во егзил Тарковски го истражува светот на работ на нуклеарна војна. Идиличната роденденска прослава на Александар (Ерланд Јозефсон) на далечен шведски остров е прекината од веста за избувнувањето на Трета светска војна и претстојна нуклеарна катастрофа. Во очај, тој ветува дека ќе се откаже од сè што му е драго доколку тоа помогне да се спречи катастрофата. Снимен во Шведска со учество на некои од долгогодишните соработници на Ингмар Бергман, филмот носи елементи на омаж за шведскиот режисер. Сепак, филмот останува недвосмислено тарковскиевски, и стилски и тематски. Како и секогаш длабоко филозофски настроен, Тарковски поставува прашања за местото на духовноста во современиот свет управуван од технологијата.

Лауреат на престижната награда „Астер“ оваа година е Синоличка Трпкова (1965, Скопје). Признанието ѝ се доделува за највисоки достигнувања во македонскиот, балканскиот и светскиот филм, како и на телевизијата и во драмските уметности. Нејзиниот долгогодишен особен ангажман во полето на седмата уметност и сродните медиуми, независните продукции и образовната сфера, не само кај нас и во Југоисточна Европа туку и многу пошироко, се пример за посветена личност, актер, сестран автор и професионалец, кој уште од своите најрани улоги е главна алка во она што се нарекува „авторски филм“, придонесувајќи со својот раскошен талент за значајни триумфи во европската кинематографија и ТВ-продукцијата, одбележувајќи ги, меѓу другото, и успесите на режисерите Емир Кустурица, Столе Попов, Иван Митевски, Слободан Унковски и на многу други.

По тој повод, Синоличка Трпкова изјави:

– Интернационалниот филмски фестивал „Астерфест“ ми причини невообичаена радост со тоа што одлучи да го вброи моето име покрај Мигел Ермосо, Карољ Вичек, Данчо Чеврески, Пиро Милкани, Желимир Жилник… Оваа награда дејствително гради однос на доверба, која, пак, бездруго, оди рака подрака со одговорноста. Прва и досега единствена јавно покажана доверба во мене овде, дома, после повеќе децении моја академска, филмска и театарска дејност. „Астерфест“, благодарам!

Наградата на Синоличка Трпкова ќе ѝ биде врачена на свеченото отворање на Фестивалот, на 4 август.

Главна локација за вечерните проекции е летниот Амфитеатар во струмичкиот Градски парк, а вонредна локација е Домот на АРМ. Промоцијата на актуелната филмска литература, мини работилницата и мастеркласот ќе бидат одржани во Младинскиот културен центар, а ни оваа година нема да изостане посетата на филмските гости во монументалниот манастир „Воведение на Пресвета Богородица Елеуса“ во Велјуса.

За Гран-прито, за Златната, Сребрената и Бронзената потковица, како и за наградите за најдобро сценарио „Ѓорги Абаџиев“ и за најдобар режисер „Ацо Алексов“, ќе одлучува меѓународно стручно жири.

Официјалниот плакат, кој кореспондира со овогодишното мото, е дело на Ване Костуранов, а уникатните статуетки ги креираше и ги изработи Никола Пијанманов.

Филмскиот фестивал „Астерфест“ е финансиски поддржан од Агенцијата за филм на РС Македонија и од Општина Струмица.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Болница принудила родители да си го земат мртвото бебе и да го однесат дома- не им се исплатувало поинаку (ФОТО)

Брачен пар од американската држава Вашингтон тврди дека биле принудени да го однесат телото на својот починат син дома откако момчето починало во болница која сега ја тужат за наводно предизвикување на тешка емоционална болка.

Болница принудила родители да си го земат мртвото бебе и да го однесат дома- не им се исплатувало поинаку (ФОТО)

Александар и Наталија Јеремеев добиле син, Мајкл, кој е роден во Сиетл на почетокот на 2024 година со Даунов синдром и други компликации поради кои ги поминал првите шест месеци од својот живот во болница.

Но, неколку месеци откако бил отпуштен од болница, кога Мајкл имал осум месеци, Јеремеев го однеле момчето на семејно патување во Орегон, каде што присуствувале на црковен собир, според неодамна поднесената граѓанска тужба, објави Дејли Меил.

Додека биле надвор од државата, неколку часа оддалечени од својот дом, бебето почнало брзо да дише доцна таа вечер, а неговите родители го однеле брзо во болницата Салем кратко по полноќ на 22 септември 2024 година, се наведува во тужбата.

Болничкиот персонал се обидел да преземе мерки за спасување на животот, но момчето било прогласено за мртво во 2:44 часот наутро. Во тужбата се тврди дека по смртта на Мајкл, на родителите им било кажано да се оддалечат од неговото тело додека чекале на лекарот, кој никогаш не се појавил. Тие наводно постојано прашувале за можноста нивниот син да биде вратен во Сиетл, но персоналот им кажал дека немаат потребна документација и дека транспортот на бебето до погребален дом би бил премногу скап, се тврди во тужбата. Наместо тоа, на родителите наводно им било советувано да се вратат дома со часови во својот автомобил, со безживотното тело на нивното бебе на задното седиште. Во тужбата се тврди дека персоналот не понудил да го смести телото на Мајкл во мртовечница и дека на родителите им била дадена само белешка од лекарот, напишана на формулар за рецепт, во која се наведува дека нивниот син починал во болницата. Родителите дополнително тврдат дека не им била дадена вистинска можност да ја обработат смртта на нивниот син, да организираат достоинствен транспорт на неговите останки или да се консултираат со семејството. Кога го прашале персоналот како безбедно да го транспортираат телото на Мајкл, на Јеремејеви првично им било кажано да го стават на седиштето во автомобилот.

Откако мајката на момчето рекла дека е загрижена дека неговото тело ќе се вкочани, на двојката им било советувано да го положат рамно на задното седиште со ќебе преку него.

Мајката на Мајкл на крајот била принудена да го изнесе неговото тело од болницата во семејниот автомобил пред таткото на момчето да се врати во Сиетл на долгото, четиричасовно возење, се наведува во тужбата.

На пат кон дома, родителите морале да се јават во неколку погребални агенции пред да најдат едно што ќе ги прифати останките на нивниот син. Откако пристигнале, таткото морал да ги исчисти телесните течности што се влеале на задното седиште од семејното возило.

Јеремееви ги навеле „Салем хелт“, „Салем хелт болници и клиники“, „Сервисот за итни случаи во Салем“ и д-р Стефани Соренсен како обвинети во нивната тужба.

Во граѓанската тужба се тврди дека обвинетите не ги следеле политиките во врска со документацијата, семејната поддршка и ракувањето со телото на Мајкл.

Јеремејеви бараат 10 милиони долари нематеријална отштета за екстремната емоционална болка и психолошката штета наводно предизвикана од постапките на обвинетите.

Наталија Јеремејев јавно го оплакуваше својот син на социјалните мрежи на првата годишнина од неговата смрт.

„Ни недостигаш и многу те сакаме! Се радуваме на вечноста, каде што повторно ќе се сретнеме и цврсто ќе те прегрнеме! Секогаш ќе бидеш во нашите срца“, напиша таа во објава на Фејсбук.

Според објавите на социјалните мрежи, семејството има четири преживеани деца, вклучувајќи близнаци што ги добија во август 2025 година. Мајкл беше нивното трето дете.

Тагови: бебе болница

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Сталоне ги откри деталите за долгогодишната кавга со Шварценегер: Не беше шега

Силвестер Сталоне отворено проговори за своето долгогодишно соперништво со Арнолд Шварценегер кое траеше повеќе од две децении. 

Сталоне ги откри деталите за долгогодишната кавга со Шварценегер: Не беше шега

Иако многумина мислеа дека нивното соперништво е само дел од холивудскиот имиџ, Сталоне потврди дека меѓу нив постоела вистинска нетрпеливост некое време.

Сè започнало на доделувањето на наградите Златен глобус

Сè започна на доделувањето на наградите Златен глобус во 1977 година. Неговиот филм „Роки“ ја освои наградата за најдобра драма, но Сталоне пропушти неколку индивидуални награди за кои беше номиниран. Тој тврди дека Шварценегер, кого едвај го познавал во тоа време, му се потсмевал во текот на вечерта.

Сталоне за Variety изјави дека во еден момент го изгубил трпението, зграбил голема чинија со цвеќе и ја фрлил кон Шварценегер. Тој инцидент, според него, го означил почетокот на нивното долгогодишно соперништво. На врвот на нивните кариери, двајца акциони херои се бореле за исти филмски улоги и се обидувале да се надминат еден со друг.

Сталоне ја споредил нивната врска со големите соперништва што ја обележале историјата. „Гледате свирепост. Беше смртен непријател“, изјави тој за Sunday Times. „Исто беше и со Арнолд. Бевме во сериозен конфликт, без шега. Беше како прашање на живот или смрт. Требаше да завршиме заедно во Римскиот Колосеум.“

Сепак, тој верува дека токму ова соперништво ги турнало да бидат подобри. „Како кога едниот борец го навредува другиот, па вториот тренира уште посилно за да го победи. Апсолутно ни требаа еден со друг“, рече тој.

Сепак, нивниот однос се промени со текот на времето

Сталоне зборуваше за нивната врска и претходно. Во 2022 година, тој призна дека имало период кога „не можеле да поднесат ниту да бидат во иста просторија“.

Сепак, нивниот однос се променил со текот на времето, а клучен момент бил заедничкото лансирање на синџирот ресторани Планет Холивуд. Шварценегер рекол дека дотогаш веќе „ја надминал таа фаза“ и дека идејата, која им ја предложиле нивните заеднички адвокати, му изгледала одлична.

Подоцна глумеле заедно во четири филма од франшизата „Платеници“. Сталоне се појави и во документарецот „Арнолд“ на Нетфликс од 2023 година, каде што рече дека Шварценегер е „супериорен“ и дека „има одговори на сè“.

Што рече Шварценегер

Минатата година, Шварценегер потврди и во радио емисијата на Енди Коен на „СириусХМ“ дека двајцата „навистина се мразеле“ во еден момент. „Се напаѓавме еден со друг, правевме грди работи и зборувавме ужасни работи, сите тие работи“, се присети актерот.

Други познати актери како Брус Вилис и Деми Мур, кои беа меѓу првите инвеститори, учествуваа во лансирањето на „Планет Холивуд“, кое се отвори во 1991 година. Шварценегер го продаде својот удел во синџирот ресторани во 2000 година.

Тагови: Арнолд Шварценегер Силвестер Сталоне

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Бугарија ќе се бори против кладилниците: Градовите ни се претворија во Лас Вегас

Кладилниците и казината повеќе нема да можат да доминираат на улиците со своите осветлени реклами, додека сериозните царински прекршоци во иднина би можеле да ескалираат од административен прекршок во кривично дело.

Бугарија ќе се бори против кладилниците: Градовите ни се претворија во Лас Вегас

Бугарија подготвува голем пакет промени со кои властите истовремено сакаат да ја заострат борбата против шверцот и драстично да го ограничат присуството на индустријата за коцкање во јавниот простор.

Премиерот Румен Радев ги објави новите мерки пред владина седница, велејќи дека владата сака многу построг модел на регулирање на коцкањето, поголема транспарентност и ограничување на зависноста од коцкање, како што објави eKapija.

Тој особено ги издвои рекламите и изгледот на самите објекти.

- Не сакаме нашите градови да изгледаат како Лас Вегас - е пораката на бугарскиот премиер, како што објавија локалните медиуми.

Кладилниците и казината повеќе нема да можат да блеснат на секој чекор

Една од најголемите промени ќе се однесува на рекламирањето на коцкањето.

Владата предлага речиси целосна забрана за рекламирање на игри на среќа, со цел повеќе да не бидат изложени на граѓаните, особено на децата и младите, на дневна основа.

Промените нема да завршат само со телевизиските, интернет или други класични реклами. Според најавите од Софија, ќе бидат воведени ограничувања и за надворешниот изглед на казината и обложувалниците.

Идејата е излозите и фасадите повеќе да не бидат покриени со агресивни осветлени реклами и екрани што го привлекуваат вниманието на минувачите. Владата најавува и промени во даночниот третман на секторот, објаснувајќи дека сака пофер оданочување и поголема транспарентност.

Повеќе од 45.000 луѓе веќе се во регистарот

Податоците од Бугарската национална агенција за приходи, исто така, покажуваат дека проблемот не е само естетски. Повеќе од 45.000 луѓе се во регистарот на лица кои треба да бидат заштитени од пристап до игри на среќа поради проблеми со коцкањето.

Даночните инспектори спроведоа 626 инспекции на коцкарници во текот на изминатата година и открија 766 прекршоци. Изречени се санкции во вредност од околу 632.000 евра, а приближно половина од откриените неправилности се поврзани со неправилно водење евиденција.

Една од важните задачи на инспекторите е да проверат дали обложувалниците и казината дозволуваат влез на лица од регистарот на ранливи граѓани.

Истовремено, се преземаат мерки против шверцот

Додека ги заострува правилата за индустријата за коцкање, бугарската влада отвора уште еден фронт, царината.

Предложени се измени според кои одредени царински прекршоци повеќе нема да се третираат како само административни прекршоци. Посериозните случаи треба да станат кривични дела, додека шверцот ќе се третира како сериозен криминал.

Целта е да се зголеми одговорноста за нелегалниот увоз и промет на стоки и да се зајакне одвраќачкиот ефект на казните.

Овие промени доаѓаат по неколку големи акции на бугарските институции. Само овој месец, локалната полиција и царината открија шема за извлекување и продажба на конфискувана шверцувана стока од царинските складишта.

Во акцијата првично беа уапсени девет службеници и цивили, вклучувајќи шест царински службеници, додека обвинителството потоа поднесе обвиненија против пет лица под сомнение за учество во организирана криминална група.

Бугарија ги заострува правилата

Двете иницијативи на прв поглед имаат малку заедничко - едната се однесува на обложувалниците и казината, другата на царината. Сепак, обете се дел од поширок обид на државата да ја заостри контролата врз областите каде што се тргува со големи пари.

За граѓаните, највидливата промена сигурно ќе биде на улиците. Доколку се усвојат предложените мерки, бугарските обложувалници и казина ќе мора да станат значително помалку впечатливи отколку што се денес.

Пораката од властите е доста едноставна - градовите не треба да изгледаат како Лас Вегас.

Тагови: кладилници Лас Вегас

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер