Македонија

„Африканската свинска чума“ нема, но АХВ превзема мерки за заштита

Агенцијата за храна и ветеринарство соопшти дека во Македонија се уште нема „Африканска свинска чума“, но тие превземаат посериозни мерки по информациите дека чумата се појавила во областа Русе во Бугарија.

Агенцијата за храна и ветеринарство донесе одлука за масовен лов на дивите свињи и сведување на нивната популација на биолошки минимум на територијата на целата држава како најзначајна превентивна мерка за заштита од африканската свинска чума која се пренесува токму преку дивите свињи а од која под закана е производството на домашно свинско месо.

Болеста ја има во цела источна Европа, воопшто не е опасна за човекот но за животните нема вакцина а алармот е вклучен откако и во соседна Бугарија секојдневно се појавуваат нови жаришта во регион кој е на 200 километри воздушна линија од нашата граница. Сликите каде ветеринарите во придружба со полицијата одат од двор во двор а мештаните ги кријат свињите за да не им бидат одземени и убиени бидејќи се во радиусот на жариштето може многу бргу да се преселат и кај нас ако не се спречи ширењето со контрола на популацијата на диви свињи. Со ваква мерка успешно се заштити Хрватска која нареди масовен на 13 илјади диви свињи а со ваква мерка Чешка успеа за една година да ја искорени болеста од својата територија а Данска гради жичана ограда кон Германија за да спречи влез на диви свињи и пренесување на болеста. За да се превенира ширењето и кај нас дивите свињи ќе се сведат на биолошки минимум.

Агенцијата за храна донесе и низа други мерки кои се однесуваат на малите семејни фарми во селските дворови кои се и најподложни на ризикот од зараза, каде се одгледуваат 60% од свињите во земјава. Производството на домашно свинско месо е една од најсветлите точки во македонското земјоделство со годишно производство на месо во вредност од над 100 милиони евра и со вработувања од кои зависат 10 илјади семејства чија егзистенција директно е поврзана со ефикасното спроведување на превентивните мерки.

Свет

Украина побарала помош од САД за напади на територијата на Русија

Украина се обратила до администрацијата на претседателот Џо Бајден со барање за помош да се лоцираат цели во Русија врз кои Киев би можел да нанесе удари со сопствено оружје, соопшти синоќа „Волстрит журнал“ повикувајќи се на извори во Белата куќа.

-Ти ги замолија (САД) за помош да се нанесат удари во Русија. Стануваше збор не само за вооружени системи но и дополнителна помош за нанесување удари по руски воени лица, изјави началникот на Генералштабот на вооружените сили на САД генерал Чарлс Браун.

Исто така, Киев го побарал од Вашингтон да дозволи користење американско оружје за удари по територијата на Русија. Барањето се случува откако Русија го искористи доцнењето на испораките на американско оружје со што нејзините сили извршија пробив во Харковска област, што стана најуспешната операција на Москва во изминатите година и пол. Барањето на Киев поставено минатата недела сеуште се разгледува.

Ако САД го задоволат барањето на Украина тоа ќе укажува на сериозни промени во политиката на американската администрација која се стреми да го намали ризикот од ескалација меѓу Вашингтон и Москва истовремено подржувајќи го Киев, истакнува изданието.

Според извор во Белата куќа, САД не ја подржуваат иницијативата на украинската страна

-Ние не охрабрувае и не дозволуваме удари по територијата на Русија, изјава Џон Кирби, директор за стратешки комуникации во Советот за национална безбедност во Белата куќа. /МИА

Живот

Елегантни моторџии низ скопските улици во обид да ја подигнат свеста за машкото здравје

Годинава, се очекува да има околу 170 учесници кои ќе поминат по улиците и булеварите во централното подрачје во Скопје.

Елегантни моторџии облечени во палто, елек и вратоврска денеска по деветти пат како дел од глобалното движење „The Distinguished Gentlmens Ride“ ќе дефилираат низ скопските улици со цел да ја подигнат свеста за машкото здравје и превенцијата од рак на простатата.

Годинава, се очекува да има околу 170 учесници кои ќе поминат по улиците и булеварите во централното подрачје во Скопје. Организаторите најавуваат учесници и од останатите градови од државата и гости од Косово. Меѓу нив има доктори, професори, личности од јавниот живот кои, како и секоја година, ќе донираат средства за фондацијата „Мовембер“ во Лондон за борба против рак на простатата.

„The Distinguished Gentlmens Ride“ годинава се одржува во 959 градови низ светот. Учествуваат 90.000 мотоцикли од 105 држави.

Скопје е дел од ова движење од 2016 година. Досега учествувале 1.172 учесници, а собрани се 18.836 евра.

Глобалното движење почна на иницијатива на Марк Хава во 2012 година во Сиднеј кога тој заедно со своите пријатели продефилира низ улиците на градот во чест на неговиот пријател кој починал од рак на простатата. Оттогаш движењето станува помасовно секоја година. Од основањето на „The Distinguished Gentlmens Ride“ досега собрани се 50,2 милиони долари на светско ниво кои се донираат во институции и болници кои се фокусирани на борбата за заштита на машкото здравје и борбата против рак на простатата. /МИА

Свет

Пронајдени телата на четворица мигранти, спасени 52 лица во близина на брегот на Тунис

Телата на четворица мигранти се пронајдени во близина на брегот на Тунис, а крајбрежната стража во посебна операција спасила 52 лица, соопшти Националната гарда.

Се додава дека гардата уапсила девет шверцери и ги запленила чамците.

Најмалку 23 туниски мигранти исчезнале откако со чамец се упатиле кон Италија, соопшти претходно Националната гарда.

Тунис се соочува со миграциска криза и ја замени Либија како главна појдовна точка за луѓето кои бегаат од сиромаштијата и конфликтите во Африка и Блискиот Исток во потрага по побезбеден живот во Европа. /МИА