Едукативна кампања за чистење пластичен отпад во Скопје

Едукативна кампања и акција за чистење на пластичниот отпад и намалување на употребата на пластични амбалажи ќе се одржи денеска во Градскиот парк во Скопје.

Како што информираат организаторите, ваквата кампања ќе трае една недела и главно ќе се води на социјалните мрежи, а дел и на улиците на главниот град.

Кампањата се води под името „Рециклирам 2019″, а целта е преку позитивен исход од акцијата да се стимулираат надлежните институции за посериозно ангажирање со проблемот./MИА

Две седници на Законодавно-правната комисија

Во Собранието на Република Северна Македонија денеска две седници ќе одржи Законодавно-правната комисија.

Единствена точка на дневниот ред на првата седница е Предлог законот за гаранција на Република Северна Македонија на обврските по Договорот за заем за дополнително финансирање за Проектот за изградба на Автопат – делница Кичево – Охрид кој ќе се склучи меѓу Експорт – импорт банката на Кина и Јавното претпријатие за државни патишта, по скратена постапка, во второ читање.

На втората седница Комисијата ќе ги разгледа предлог законите за изменување и дополнување на Законот за одбрана; за лобирање; за изменување и дополнување на Законот за правда за децата; и за Академија за судии и јавни обвинители, четирите во второ читање. /МИА

Земјотрес кај грчкиот остров Хидра

Слаб земјотрес со јачина од 4 степени по рихтер е измерен југоисточно од грчкиот остров Хидра.

Атинската национална опсерваторија соопштила дека потресот бил забележан во 10:15 во море на 51 километар од островот, пренесе „АНА“.

Како што се наведува епицентарот бил лоциран на 122 километри јужно од Атина.

На лондонскиот аеродром уапсен маж кој подготвувал терористички напад

Се сомнева дека тој учествувал во кривични дела во Сирија.

Британската полиција на лондонскиот аеродром Хитроу, уапсила маж кој пристигнал со лет од Турција заради сомнеж дека извршил кривични дела во Сирија, по што против него е покренато обвинение за тероризам.

Мамун Рашид утре ќе се појави пред судот заради обвинение за подготовка на терористички чин, соопшти британската полиција.

Ројтерс наведува дека тој е уапсен во вторник заради сомнеж дека е вмешан во кривични дела поврзани со конфликтот во Сирија.

Британската агенција, исто така наведува дека Турција почнала од своите затвори да праќа поранешни припадници на ИД во нивните матични земји.

Ројтерс не наведува од која земја е уапсениот Рашид.

притисни ентер