Европската комисија соопшти дека новата понуда на британскиот премиер Борис Џонсон не дава основа за финализирање на договорот за излез на Велика Британија од ЕУ, објави „Скај њуз“.
Разговорите за планот на Џонсон за ирското гранично прашање нема да се одржат овој викенд, потврди портпаролката на ЕК, Наташа Берто за Скај.
Таа додаде дека на Велика Британија ќе и биде дадена „втора шанса во понеделник детално да ги презентира своите предлози“.
„Ако имавме разговори во текот на викендот, ќе изгледаше како вистинско преговарање , а ние сме далеку од тоа“, изјави европски дипломат за „Тајмс“.
Борис Џонсон повтори дека нема да бара одложување на Брегзитот, потсетува Ројтерс.
„Нов договор или никаков договор - но нема одложување“, напиша Џонсон на Твитер.
Сепак, неговата влада за прв пат вчера призна дека Џонсон ќе испрати писмо до ЕУ во кое ќе бара одложување на Брегзит доколку не се постигне договор до 19 октомври.