Два часа по објавувањето на последниот текст во кој Героски пишува дека власта е во паника поради приказната за рекетарите и дека треба да се отвори истрага за рекетарската група, на новинарот му пристигна порака на фејсбук.
“Бранко, малку претеруваш со објавите. Знаеш како те фарбаа со боја, гледај да не те бањаат во Вардар.”- му напиштал извесен Борче Гиноски кој на социјалните мрежи се пофалил дека работи како обезбедување во СДСМ, а објавувал и слики со премиерот, претседателот и министри од власта.
Героски утрово отиде пред седиштето на СДСМ и побара одговори од партијата кое е лицето Борче Гиноски кој што се заканува на новинар и дали партијата ќе преземе нешто.
Партискиот портпарол Костадинов разговараше со Героски. Се оградуваат од поврзаност со Гиноски и тврдат дека тој не е вработен во СДСМ.
Но подоцна во СДСМ дознале дека сепак лицето е член на месен одбор на СДСМ, а на последните претседателски избори пак бил ангажиран како член на избирачки одбор во општина Ѓорче Петров, исто така на предлог на СДСМ.
Ова не е прва закана до Героски. Тој последните неколку месеци обвинува дека до него пристигнуваат опомени и закани бидејќи претерал со критики кон власта.
Осуда за закани до новинари пристигна од премиерот кој вели дека нема да дозволи загрозување на слобода на говорот.