Знаеме како Груевски избега од земјата, тврди премиерот Зоран Заев во интервју објавено во германскиот весник „Франкфуртер алгемајне цајтунг".

Како што објави денеска Дојче Веле на македонски јазик, во интервју за ФАЦ, премиерот Заев првпат открива детали од бегството на Груевски за кои досега се шпекулираше во јавноста. Од Обвинителството не ги потврдуваат тие информации. Заев тврди дека ја знае траекторијата на движењето на Груевски во клучните часови на бегството од земјата.

Екс премиерот Груевски е во Унгарија каде доби азил.Поранешниот претседател на ВМРО-ДПМНЕ беше осуден на две години казна затвор поради влијание во набавката на луксузниот „мерцедес“.

„Сега знаеме како. Груевски со лифт се симнал во подрумот на зградата, а таму се сокрил во багажникот на автомобилот кој го однел надвор од државата. Во Албанија, го чекало унгарско дипломатско возило“ вели Заев во интервјуто.

На прашањето зошто потрагата по Груевски започнала три дена подоцна, дури во понеделник, иако уште во изминатиот петок тој требало да се пријави на отслужување на затворската казна Заев истакнува дека такви се правилата за осудениците.

„Во земјата вообичаено е криминалците кои се повикани во петок за отслужување на затворска казна, викендот да го поминат дома. Не можевме тоа да го смениме само за Груевски“, објаснува Заев.