Правото на глас денеска ќе го остварат болните и немоќните лица, затворениците и раселените.
Утринава, точно во 7 часот беше отворено и гласачкото место 2536 во затворот Идризово, каде право на глас имаат 817, од вкупно 1640 затвореници ширум затворите во државата.
На ова избирачко место, освен за претседателските избори се гласа и за избор на градоначалник во Ново Село и Охрид.
Директорот на затворот Боби Мојсовски информираше дека споредено со првиот круг до 11 часот излезноста е поголема.
До пристигнувањето на екипата на Канал 5 гласањето се одвиваше мирно.
Единствениот проблем е што одредени лица не можат да се пронајдат во избирачкиот список.
„ Кај нас секогаш има одреден број на затвореници кои не може да се најдат во избирачкиот список затоа што во периодот од кога е затворен избирачкиот список до денеска има голем број на луѓе што се новодојдени, а има и луѓе што се заминати, затоа бројката е малку помала на луѓе што ќе гласаат.” – изјави Боби Мојсовски, директор на КПУ „Идризово“.
„Гласањето тече во најдобар ред, започнато е во 7 часот, досега немаме никакви проблеми, се надеваме дека така ќе остане и до крајот. “ – изјави Соња Стојановска, претседател на избирачкиот одбор на ИМ.
Право на глас денеска имаат и 4407 болни и немоќни лица.За прв пат оваа година се гласа и во два старечки домови од Скопје, едниот од нив е домот “Мајка Тереза” , од каде не информираа дека гласањето завршило за само неколку часа и поминало мирно.
„ Гласавме беше се свечено, убаво, ние вака малку старите ние сатифакција добивме. Од новиот претседател очекуваме малку и на нас да обврне внимание на постарите, а и на сите, не само на нас туку и на младите да добијат шанса да останат тука да работат, да помагаат на нас старите. “ – изјави Благоја Давитковски.
Од Државната изборна комисија на пресконференција точно напладне информираа дека гласањето се одвива непречено, како и на домашните избирачки места, така и во 32 дипломатско конзуларните претставништва во странство, каде што 1781 лице имаат можност да остварат своето гласачко право. На овие места излезноста до 10 часот изнесува 7.71%.
Од ДИК велат дека на избирачките места каде што беа констатирани одредени нерегуларности во првиот круг гласањето во вториот круг ќе одвива на ист принцип како и во сите останати избирачки места.
Таму каде што беа констатирани нерегуларности избирачките одбори се разрешени и се назначени нови.