Стево Пендаровски и Гордана Силјановска ја побараа довербата од сите етнички заедници и ветија дека ќе работат чесно.
И двајцата се уверени во победата на 5 мај и очекуваат исполнување на законскиот цензус.
„Кристално е јасно дека најголем дел од граѓаните, и од тие што гласаа и од тие што останаа дома се определени за европската иднина на нашата земја, за членство во НАТО и ЕУ, за пријателство со соседите, за да бидеме почитувани во светот, да имаме странски инвестиции, добро платени работни места и реформи според европски стандарди. Во име на овие заеднички вредности и цели ве повикувам во недела на 5 мај да излеземе масовно и да го заокружиме бројот 3. Од седење дома единствено корист ќе имаат ВМРО-ДПМНЕ, Силјановска, Мицкоски и Груевски. Режимот не смее повторно да добие шанса“, порача Пендаровски.
„Јас сум убедена дека успехот на 5-ти мај ќе отвори порта кон еден друг успех, кон градење на демократска, евроспка Македонија. Зошто очигледно е дека промени реформски може да направите само ако и себе се реформирате. Очекувам во недела граѓаните масовно да излезат, очекувам да го продолжат она што го направија во првиот изборен круг, да се зголеми поддршката за мене. Зошто? Бидејќи кандидатот на власта не може да направи ништо друго освен она што го правеше оваа власт зошто и самиот тврди дека 102% се согласува со лидерот на СДСМ“, рече Силјановска.
Левица, Нова либерална партија, ПОДЕМ, Партиите на Србите, Бошњите и Власите пак најавија поддршка за Силјановска в недела. Од Алтернатива на Африм Гаши повикаа на масовна излезност и гласање за опцијата која гарантира евроатлантската иднина на земјата повикаа и од Алтернатива на Африм Гаши.
„Гласајќи за Стево Пендаровски, ние практично потврдуваме на која страна сме и каква иднина им обезбедуваме на нашите поколенија. По низа активности и средби, одржани во текот на ова претседателска кампања, кога имавме можност да поразговараме со нашите граѓани за значајноста на овие избори, Централниот штаб и локалните штабови на Алтернатива вчера ја завршија кампањата и денеска и се обраќаат на јавноста да ги повикаме сите граѓани, а особено на нашите приврзаници“, рече портпаролот на партијата Орхан Муртезани.
Од партијата Глас за Македонија на Солза Грчева најавија бојкотна изборите в недела, порачувајќи дека единствено преку немањето цензус ќе се создаде терен за предвремени парламентарни избори.