Според Силјановска Давкова власта на СДСМ ги изманипулирала граѓаните со референдумското прашање на 30-ти септември, бидејќи прашањето не било соодветно поставено, односно како што рече таа за НАТО не е потребен референдум ако се земе во предвид дека тоа е меѓународна организација и е потреба само одлука донесена од страна на Собранието, додека пак за влез во Европската Унија е потребно да се распише задолжителен референдум.
Оваа власт ги злоупотреби Европската унија и НАТО во референдумското прашање, за да има алиби наместо отворено да праша дали сте за Преспанскиот договор или не, или да праша дали сте за промена на името или не, таа тргна со прашањето дали сте за членство во Европската Унија и НАТО со склучување на Преспанскиот договор. Знаеја дека голем дел од граѓаните се за членство во Европската Унија и НАТО, но што заборави, заборави дека кога ќе гласаме за влез во ЕУ а со нив не верувам дека ќе дојде тој ден брзо, ќе треба да распишеме задолжителен референдум. Заборавија дека за НАТО не е потребен референдум ако го третираме како меѓународна организација, туку е доволно Собранието да донесе одлука, вели Силјановска Давкова.
Силјановска Давкова истакна дека најголемо загрозување за суверенитетот на една држава е корупцијата и криминалот, потенцирајќи дека власта не само на централно туку и на локално ниво врши непотизам, односно како што рече таа ова во науката се нарекува клиентелизам.
Кои се вашите проблеми. Под еден, невиден раст на непотизам, читам и слушам дека локалната власт е фамилијарна власт. Каде што има фамилијарна власт има односи на потчинетост, ние тоа во науката го викаме клиентелизам, или јас вас ќе ве вработам а вие мене нешто ќе ми дадете, или јас вам нешто ќе ви понудам а вие мене ќе ми должите, а каде што има клиентелизам ќе има корупција и криминал, кажа таа.
Силјановска Давкова додаде дека ќе се бори за правда и владеење на правото бидејќи тие се принципите за кои треба да се залага секој претседател на државата.
Таа побара поддршка од граѓаните масовно да ја подржат кон овој пат се со цел да се донеси правда и правдина во Република Македонија, посочувајќи дека бојкотот не е решение и дека не треба да се бојкотираат овие претседателски избори.