Првото топло добредојде му го упатија министрите за одбрана и економија, Шекеринска и Бектеши, кои заедно со владината делегација го пречекаа грчкиот премиер.
Преку автопатот именуван токму по воспоставеното пријателство меѓу двете земји, грчкиот премиер Ципрас се упати кон Владата, каде следуваше второто срдечно добредојде од домаќинот Заев, кој го дочекаа со зборовите „Нова историја“.
Со прегратки, но без интонирање на двете химни, поради доцнењето на авионот на Ципрас, како што појаснија од Владата, стартуваше првата официјална посета на грчкиот премиер во земјава.
Првиот поздрав Ципрас го упати до бројните новинарски екипи, по што следуваа и неколку селфи фотографии, помеѓу двајцата премиери, а потоа и со министрите и новинарите, а веднаш потоа и ракувањата со членовите на македонската Влада.
Околу два часа траеја меѓувладината седница и билатералните средби, време во кое животните сопатнички на двајцата премиери, Зорица Заева и Бети Базиана го искористија за приватна дружба. Од Владата велат дека двете дами имале своја засебна програма, која е затворена за јавноста. Паралелно со средбите кои се одвиваа внатре во Владата, недалеку од владиниот објект помала група демонстранти со знамиња со сонцето на Вергина протестираа против, како што рекоа, промената на името и присуството на грчкиот премиер во земјава.
Првата официјална посета на грчкиот премиер во земјава се одвива под засилени безбедносни мерки. Силно полициско обезбедување целодневно ги обезбедува рутите по кои грчката владина делегација се движи.
Во поширокото централно подрачје на главниот град е воведен посебен сообраќаен режим, се до 20 часот, за кога е планирано заминувањето на Ципрас од земјава.