Фондот за ПИОМ веќе со години мака мачи да го наполни буџетот – годинава за покривање на пензиите на 320 илјади пензионери потребни им се 917 милиони евра, но од придонеси ќе успеат да соберат едвај половина или 459 милиони евра.

Останатите 458 милиони евра, што се појавуваат како минус, ќе мора да бидат покриени од Буџетот.. Колку за илустрација, тоа е речиси колку сите пари што од државната каса се одвојуваат за здравството.

Од Министерството за труд денеска преку соопштение вината за состојбата ја посочуваат во претходните власти, кои ги зголемуваа пензиите и покрај тоа што Фондот со години е на стаклени нозе. Министерката Царовска, вчера кажа дека со измените сега што ги прават, сакаат да ги избегнат најнепопуларните мерки кои во спротивно може да бидат неминовни.

Дупката во ПИОМ власта се обидува да ја намали и со минималното зголемувањето на придонесите од почетокот на годината, за 0,5 проценти.. На овој начин очекуваат да соберат дополнителни 18 милиони евра, но сепак тоа е само капка во морето од долгови. Според проекциите на ПИОМ, број на пензионери следните две години ќе нарасте за 15.000 нови корисници и ќе надмине 335.000, а за сервисирање на нивните пензии ќе бидат потребни над 1 милијарда евра.

Со мерката што сега ја презема владата, за пресметка на пензиите повеќе нема да се зема предвид просечната плата, туку тоа ќе се прави само според трошоците на живот, 2 пати годишно.

Пензиите може дополнително да растат само во случај доколку растот на БДП надмине 4 %.